¹ Takar si Elifas, tou en Teman, si miningkot: ² “Sapa ku’a re’en sitou makapunya hikmat si mingkot ampit en tine’u e reiy’ sisapa, wo mumpun eng genangna ampit e reghes? ³ Sapa ku’a re’en sia si matogor ampit en sesusuiyen e reiy’ sika’ara’an, wo ampit e lelila’an e reiy’la sipenoron? ⁴ Awes kangkasi nikoo koo rime’ila em pedaman meide’ wo kimurangla em pedaman ormat wia si Empung. ⁵ Kaselokannu mouw e minajarla en sumamu, wo em baasa ne tou wiles em pinelengmu. ⁶ En sumamu mouw nuesa e minanginselokela nikoo, reiy’ niaku; en sumpingmu nuesa e minamuali sairi mapero nikoo. ⁷ sapa ku’a re’en nikoo koo neiy i patoula tanume sitou kasa ketare, ka’apa siniwola lebe rerior ta’an eng kakenturan-kakenturan? ⁸ Sapa ku’a re’en nikoo koo kimi’it limingala witu eng gorem musyawarah ni Empung wo kima’apang eng hikmat i wee en toumu? ⁹ Sapa ku’a re’en eng kete’uannula, e reiy’ kinete’uan neiyla? Sapa ku’a re’en em pinakasilimu, e reiy’ terang i wee nikeiy? ¹⁰ Witu e nelet meiy kangkasi wawean tou si puti’ wu’uk wo si pinakatu’a e numurna, si lebe tu’a e numurna ta’an si ama’mu. ¹¹ Reiy’ awes ku’a re’en em penoronna i wee nikoo em pangiboran ni Empung, wo e lelila’an ampit e rinda neiy i tuyula wia nikoo? ¹² Ka’a koo neiy i ayurla em pedaman e natemu wo ka’a em berennu melaya-layas, ¹³ i ka’ayo koo limengela e natemu masu’usuk si Empung, wo en sumamu e marou’mi lelila’an mange’an e ni’itu? ¹⁴ Ma’an tu’una sitou si weresi, ma’an tu’una si ulit si minatoumi waki si wewene? ¹⁵ Eng kaulitna, em baya ne suci-Na se reiy’ pa’emanen-Nala, e minapekasa langit tu’u e reiy’ weresi witu em paloo’an-Nala; ¹⁶ lebe-lebepe’ kasi sitou kasa wu’ul wo kasa teri, si maserop eng kawilesan tanu en dano. ¹⁷ Niaku ku laa meteterangla e wo’o sapa wia nikoo, linganola aku, wo sapa e linoo’oku mola, e laaku i susuiyla, ¹⁸ nyi’a i yi’i sapa neiy i abarla ne tou se minakapunyala eng hikmat, e reiy’ neiy i kirongla ne nene moyang nea. ¹⁹ katoroan wia i te nisea em banua i ti’i neiy i weela, wo reiy’la siesa tou wo’oseiy tu’u si ghumorem witu eng keuneran nea. ²⁰ Tou fasik se matenggo’ogho’ eng kelabotan em patou-touanna, tuanakan kangkasi se tou wengi’is eng keurean en te’un-te’un en sinadiala i wee nisia. ²¹ Legu’an hebat e mina’ayome witu en talingana, witu e masa dame nisia si nieiy ne tumeteri. ²² Sia si reiy’ ma’eman, kaa nisia si laa marengi waki kareiydeman: sia si neiy mouw i tantula kaa laa kaanen en santi. ²³ Sia si limepu kaa laa mesesero kumaan, andi minea wisa. Sia si mete’u, kaa e nendo kareiydeman en timiro’ mengena-ngena’la nisia. ²⁴ Sia si’i keide’la eng kase’esekan wo eng kapesetan, si malupula nyi’a tanumokan si raja timiro’ merera’akep. ²⁵ Karengan nisia si rimenetola e lawasna mesaru si Empung wo berani mekawar Si Kasakuasa; ²⁶ ampit minenteng e lee’ sia si matingka-tingkas mesarula Nisia, ampit eng kekelungna e linapis kakuraber. ²⁷ Giona em pinenetnala ampit em barewes, wo e lapis em barewes em pinakenala witu e rereenanna; ²⁸ sia si maena’ waki kota-kota e minakemu mouw, waki wale-wale e reiy’ mouw mete’u ena’anla ni tou, e neiy i tantula kaa laa mena-ena’ mamuali riberek. ²⁹ Sia si reiy’ laa mamuali kaya wo eng hartana e reiy’ ke’ekel, ma’an eng kapunya’anna tu’u e reiy’ maawes-maawes wia em bumi. ³⁰ Sia si reiy’ laa i kaliseiyi waki kareiydeman, suruna e laa welesen e layasna napi, wo sia si laa re’inla e nasengan en suma-Na. ³¹ Te’a mouw sia ma’eman wia e reiy’ sipenoronna, si laa kale’ekokanouw sia, karengan e reiy’ si penoronna e laa mamuali sesu’ianna. ³² Nu reiy’pe’ lekep e masana, em pateanna e laa i ka’ayo; wo em pangana tu’u e reiy’ laa lumisouw. ³³ Sia si tanu nakana e nanggor rima’aragh em bu’ana wo tanu nakana en zaitun limenta’ em bungangna. ³⁴ Karengan se kawang ne tou-tou fasik se reiy’ minua’, wo e napi eng kimaan mina’apu en dasing-dasing ne tou se kimaan e wewoko. ³⁵ Nisea se gimandongla em bencana wo tumimea’la eng kalewo’an, wo e le’ekok wiles eng ginandong e nate nea.”