¹ Te’a mouw mepa’a-pa’ar, heiy Israel! Te’a mouw merio-rio tanu se bangsa-bangsa! Karengan nikoo koo simiwo mola en sa’amek ampit timele’ula si Empungmu, nikoo koo mineupusola en tetoro sa’amek waki e reiy’ sa mina’asa tampa pakusuan eng gandum. ² En tampa pakusuan eng gandum wo en tampa papuusan e nanggor e reiy’ laa mee nisea kumaan, wo e nanggor e laa moki’la ghenang nisea. ³ Nisea se reiy’ laa minena-ena’ mena’ witu en tana’ ni TUHAN, ta’an si Efraim si lewo’ sa reiy’ mareng mea waki Mesir, wo waki Asyur nisea se laa kumaan eng kekanen makari’irisen. ⁴ Nisea se reiy’ laa mapasempela en tetule tinoa’ anggor wia si TUHAN wo en tetule-tetule rineret nea e reiy’ laa sumenaangla e nate-Na. Roti nea nyi’a mouw en tanu e roti pengasi’an, em baya ne tou se kumaan nyi’a se laa mamuali makari’irisen, karengan e roti nea nyi’a mouw ni’i wee en touna nuesa, e reiy’ toro alin mea witu eng gorem em bale ni TUHAN. ⁵ Sapa ku’a re’en e laa pesesiwon niouw witu e nedo pinasungkulan wangko’ wo witu nedo e nendo wangko’ ni TUHAN? ⁶ Karengan ma’anouw tu’u sea lumiseiymi en tou waki papunengan, Mesir e laa merurla nisea, Memfis e laa kumuburla nisea. Rukut e laa tumutuwla em barang-barang perak nea maka arga; tetune e laa tumou witu en dasing-dasing nea. ⁷ E mineiy mouw e nendo-nendo peukuman, e mineiy mouw e nedo-nendo pasuli’an, Israel si laa me’anla nyi’a, “Nabi nyi’a mouw siesa tou we’engel, sitou wuta e roh nyi’a mouw sitou sepereng!”, eng karengan eng kaselana eng kaselokannu wo eng kaselana em pinasu’usukannu: ⁸ Efraim, umat ni Empungku, se kasuatan mategha’ si nabi, tetempang pasikop wara em bitu eng kelabotan e lalanna, mesesu’usukan em bitu em bale ni Empungna. ⁹ Wu’ul kasa em pasiwo-siwon nea tanu witu e nendo-nendo Gibea; Sia si laa ghumenang eng kaselokan nea wo laa mukum en dosa nea. Wua’na eng kareiy’lale’an ni Israel ¹⁰ Tanu e wu’ana-wu’ana e nanggor waki padang gurun Niaku ku minatola se Israel eng kasa ketareanna; tanu em bu’ana polon tanume e wua’na kasa ketare e nakana ara Niaku limoo’ se nene moyangmu. Ta’an nisea i ti’i se minea mouw wia si Baal-Peor wo limukarola en tou wia si dewa makasese’en, i ka’ayo sea minamuali kari’irisan masuat tanu en sapa neiy nea i koupusla i ti’i. ¹¹ Kamulia’an ni Efraim en timelew tanu si wara: e rereiy’la si timimea’la, si maali-ali nouwak wo si megandong! ¹² Ma’anouw tu’u sea simelami se oki-oki’na, Niaku ku laa sumiwo nisea malo’ogas, i ka’ayo e reiy’la sitou kasi. E nulit, cilaka mouw kangkasi sea witu e nedo Niaku nu ma’akati waki nisea! ¹³ Efraim, tanu e linoo’o-Ku, si simiwo mola se oki-oki’na minamuali tekapen pengasun; Efraim si neiy i kapupus sumarakanla se oki-oki’na wia si memunu’. ¹⁴ I wee mouw wia nisea, ee TUHAN – sapa ku’a re’en e laa i pewewee-Mu? I wee mouw wia nisea eng gandongan pesel wo em bu’ana em be’ewer pera. ¹⁵ E reiy’ sa mina’asa eng kalewo’an nea e minamuali waki Gilgal, e nulit, maname Niaku ku muleiy mari’iris nisea. Karengan eng kalewo’na em pasiwo-siwon – pasiwo-siwon nea Niaku ku laa sumere’mi nisea waki wale-Ku. Niaku ku reiy’ mouw laa moupusla nisea kasi, em baya ne pamuka-muka nea nyi’a mouw se rumerangu. ¹⁶ Efraim si winewe mola, kalatna e minapera mouw, nisea se reiy’ mouw laa mua’la wu’ana. Awes tare ma’anouw tu’u sea timimea’la se oki’, Niaku ku laa matela em bu’ana eng gandonganna maka arga. ¹⁷ Empungku si laa tumerek nisea, karengan nisea se reiy’ minelelingala Nisia, takar nisea se laa lumepu waki elet ne bangsa-bangsa.