¹ Sengonouw en sesebungen! Regoan e nasar si rajawali witu em bale ni TUHAN! Eng karengan nisea se kime’angola en teta’arang-Ku wo mina reiy’ mouw malinga-linga witu en teturu’-Ku ² Wia-Niaku sea mengale-ngaleiy: “Oh Empungku, nikeiy, Israel makasine’u Nikoo!” ³ Israel si simede’ mola e le’os – ma’anouw si kesaru si kumi’it nisia! ⁴ Nisea se minopo mola raja, ta’an reiy’ ampit e ni’iyonang-Ku; nisea se minopo pamuka-muka, ta’an ampit e reiy’ kinete’uang-Ku. Waki e mas wo em perakna sea simiwo se berhala-berhala i wee en touna nuesa, i ka’ayo sea re’inla. ⁵ Niaku ku sumede’ sioki’ ni sapimu, heiy Samaria; nupi’-Ku e melayas witu nisea! I ka’ayo pirala eng keure e reiy’ mete’u sucin, ⁶ tou-tou Israel i ti’i? Ni’itu en siniwo ni meneniwo, wo e ni’itu e reiy’ Empung! E nulit, si laa makemu sioki’ ni sapi Samaria i ti’i! ⁷ Karengan nisea se kimeror e reghes, takar nisea se laa mupu’ e ma’edo lewo’; eng gandum reiy’pe’ kimunir e rereiy’la wia nisea; en tanemen-tanemen i ti’i e reiy’ minua’la topong; wo sa mee wua’na, takar se tou-tou walina se nume’enep nyi’a. ⁸ Israel si line’ouw mouw; en teakan nisea i ti’i se witu e nelet ne bangsa-bangsa se tanu em barang e reiy’ kepa’arla ne tou. ⁹ Karengan nisea se minea mouw waki Asyur, e nasarla si keledai en talun si timewala en tou; Efraim si minemete-metengola en tetaber e rendem. ¹⁰ Ma’anouw tu’u sea minemete-meteng en tetaber i ti’i witu e nelet ne bangsa-bangsa, en teakan i yi’i Niaku ku laa merurla nisea, wo e reiy’ mouw ure kasi nisea se laa mena’ meisu’la si raja wo em baya ne pamuka-muka. ¹¹ E nulit, Efraim si minepelakerola e mezbah; e mezbah-mezbah i ti’i en simiwo nisea makadosa. ¹² Ma’anouw tu’u Kumatikla i wee nisia kelakerna en teturu’-Ku, ni’itu ni’i papokeiy neala tanume e nesa reiy’ kasine’uan. ¹³ Nisea se meupusela en tetule rineret; nisea se minapasempela e le’ona wo mekaan nyi’a; ta’an si TUHAN si reiy’mepa’ar wia nisea. En teakan Nisia si laa ghumenang eng kaselokan nea wo laa mukum en dosa nea; nisea se lewo’ sa reiy’ mareng mea waki Mesir! ¹⁴ Israel si limiurola si Simiwo nisia wo rimedeiy mola e istana-istana; Yehuda si minepelakerola eng kota-kota makarereen; ta’an Nikau ku laa mayala e napi witu eng gorem eng kota-kota nea, i ka’ayo em puri nea eng kaanen ma’apu.