¹ sakawisa Aku lume’osla si Israel, takar i kaongka’ mouw eng kaselokan ni Efraim wo eng kalewo’an-kalewo’an ni Samaria: karengan nisea se timuanala em pale’ekokan: rongkit si timubal ghimorem, rambangan se mekaat witu luar. ² Wo e reiy’ kinaghenangan nea kaa Niaku ku maghenang e reiy’ sa mina’asa eng kalewo’an nea. En teakan tu’u em pasiwo-siwon – pasiwo-siwon nea eng kimepung nisea, em baya nyi’a em bitu en sinaru eng gio-Ku. Dosa ni Israel witu en supu agama wo eng kanegara’an ³ Nisea se minangimpa’arla si raja ampit eng kalewo’an nea, wo em baya ne pamuka-muka ampit eng katowoan nea. ⁴ Minapekasana nisea se tou-tou masiwo en sa’amek, nasarla e nawu reramporan e melayas mapawee-wee, eng katoroan si tumetunu roti nu mena’ maselala e napina, eng kasuatan nisia nu maro’omes e adonan i ka’ayo simegha kaa e ragi. ⁵ Witu em pelesir ni raja ta nisea se simiwo minerara’an em baya se pamuka-muka ampit e nanggor mekenanaren; sia si minaasa’an ampit em baya ne sumesero’. ⁶ Em batin nea en tanu e napi reramporan; nate nea e melaya-layas; esa nga wengi-wengian e nupi’ nea e minompas, witu e nendo memo’odo e lumayas sumoup tanu e napi masila’. ⁷ Nisea nu waya se pasu’ mouw tanu e nawu reramporan, wo kumaan mina’apu em baya ne akim nea. Em baya ne raja nea se minate mouw, e reiy’la siesa tou witu e nelet nea si minaleiy wia-Niaku. ⁸ Efraim si simewokla en touna witu e nelet ne bangsa-bangsa, Efraim si minamuali mouw roti tabuleleng e reiy’ winiling. ⁹ Tou-tou luar se kimaan mina’apu eng kaente’anna, ta’an nisia nuesa si reiy’ minete’ula nyi’a; o kangkasi nisia si lakerouw wu’uk puti’, ta’an nisia nuesa si reiy’ minete’ula nyi’a. ¹⁰ Katingkeiyan ni Israel e minamuali sairi witu en touna, ta’anouw nisea se reiy’ minurikit wia si TUHAN, Empung nea, wo reiy’ simero Nisia ma’anouw tu’u em baya nyi’a i yi’i. ¹¹ Efraim si minamuali mouw pombo we’engel, reiy’ siakal, ampit kimeret wia si Mesir, ampit minea wia si Asyur. ¹² Sakawisa sea mea, Niaku ku laa mitare em pure’eket-Ku witu natas nea; Niaku ku laa tumumpami nisea tanu se wara-wara waki reghe-reghesan, Niaku ku laa sumiasa nisea karengan eng kalewo’an-kalewo’an nea. ¹³ Cilaka mouw sea, karengan nisea se timingkasi en tou waki-Niaku! Mapunengouw sea, karengan nisea se rimangu witu Niaku! Niaku i yi’i ku pa’ar metetubuus nisea, ta’an nisea se timowo witu Niaku. ¹⁴ E naleiy nea wia-Niaku e reiy’ kimaluari waki atena, ta’an nisea se ma’arip witu en tetekelan nea. Nisea se minenori-nori’ en tou karengan eng gandum wo e nanggor, wo nisea se rimangu witu Niaku. ¹⁵ Ma’anouw tu’u Niaku ku limati mola wo minente’la e lalupa-lalupa nea, ta’anouw nisea se timiro’ eng kalewo’an witu Niaku. ¹⁶ Nisea se minurikit wia si Baal, nisea nyi’a mouw se tanu em borang le’ekok; pamuka-muka – pamuka-muka nea se laa mate kaa en santi karengan eng kapasusuiy nea eng kekasar. Nyi’i mouw e laa mamuali sesero’an wia nisea waki tana’ Mesir.