¹ “Meiy, kita laa mareng wia si TUHAN, karengan Nisia mouw si rima’akepola wo si laa lume’osla nikita, si minewe mola wo si laa sumalipupu nikita ² Nisia si laa tumoula nikita nu reiy’ mouw e rua nga endo, witu e nendo katelu Sia si laa tumo’orla nikita, wo nikita ta laa tumou witu en sinaru-Na. ³ Meiy mouw kita sumine’u wo me’inakut makauli-ulit sumine’u si TUHAN; Sia si tantu modol tanu em beena, Sia si laa meiy wia nikita tanu e naro, tanu e naro witu eng kesampetan e noras e maweemi rano em bumi.” ⁴ Sapa ku’a re’en e laa-Ku tuananla wia nikoo, heiy Yehuda? E nupus lale’mu tanu en semu memo’odo, wo tanu e leleiydem limiong memo’odope’ kasa. ⁵ Kaa ni’itu Niaku ku rimimu’umukola nisea ampit e nieletan ne nabi-nabi, Niaku ku minunu’ mola nisea ampit e lelila’an en suma-Ku, wo e nukum-Ku e rimou’mi tanu en sena’. ⁶ Karengan Niaku ku mepa’arla e nupus o lale’, wo reiy’ en tetule rineret, wo mepa’arla em pasine’uala si Empung, lumebela ta’an en tetule-tetule tinunu. ⁷ Ta’an nisea i ti’i se kime’angola en teta’aran waki Adam, maname nisea se sime’epangola witu Niaku. ⁸ Gilead nyi’a mouw eng kota em baya ne lumelewo’, wuta ampit e nenus raa’. ⁹ Tanu se rambangan mapontar tuana mouw em paasa-asa’an em baya ne imam; nisea se mawunu’ waki lalan mengea waki Sikhem, e nulit, nisea se matuanala em pasiwo-siwon kewur. ¹⁰ Witu e nelet ne kaum Israel e linoo’o-Ku mola eng kapualitan-kapualitan mekeide’en; maname wawean si Efraim mesa’amek wo si Israel si simeremorola en tou. ¹¹ O kangkasi i wee nikoo, heiy Yehuda, neiy mouw i tantula em peupu’an: Sakawisa Aku sumegaya’la eng ka’ada’an ne umat-Ku,