¹ Israel nyi’a mouw e nakana anggor masela eng kapatouna, e mawua’la wu’ana. Mekelakerla em bu’ana, e mekelakerla siwonna e mezbah-mezbah. Makale’osla en tana’na, makale’osla siwonna en tugu-tugu berhala. ² Nate nea em biles, en teakan nisea se lewo’ sa reiy’ tumanggong e wua’na eng kaselokanna: Sia si laa kumemula e mezbah-mezbah nea, laa rumewala en tugu-tugu berhala nea. ³ E nulit, en teakan nisea se meila’: “Nikita ta reiy’ mouw makapunya raja kasi, karengan nikita ta reiy’ meide’ wia si TUHAN. Sapa ku’a re’en en toro siwonla ni raja i wee nikita?” ⁴ Nisea se mawela’awa’, mapopo en tiwa’ towo, mewa’akes teta’aran, i ka’ayo tumou e nukum tanu e nakana e napouw waki lare’-lare’ em penguma’an. ⁵ Penduduk Samaria se kori’ en tanume sioki’ ni sapi em Bet-Awen. E nulit, se rakyatna se laa mengasi’ eng karengan nisia, wo se imam-imamna se laa ma’arip eng karengan nisia, eng karengan eng kamulianna e minera momi waki nisia. ⁶ Sioki’ ni sapi i ti’i nuesa si laa alin mea waki Asyur tanume si sesempe wia si Raja ‘Wangko’. Efraim si laa tumanggong e nirang, Israel si laa maka’ato e nirang karengan en tetiro’anna. ⁷ Samaria e laa kemunla; rajana si tanu esa nga ketor pu’upuk limentut witu en dano. ⁸ Kakenturan-kakenturan tetulean Awen, nyi’a i yi’i en dosa ni Israel, e laa punengela. Kongkom tetunean wo e rukut tetunean e laa tumou witu natas e mezbah-mezbahna. Wo nisea se laa lumila’ wia se kuntung-kuntung: “Tawunanomi nikeiy!” wo wia se kakenturan-kakenturan: “I karewa mouw tumoro nikeiy!” ⁹ Rengan e nendo Gibea nikoo koo simiwo mola en dosa, heiy Israel; maname nisea se timo’or masu’usuk. Reiy’ ku’a re’en em paseke’an masu’usuk se tou-tou wiles e laa ma’ayola nisea waki Gibea? ¹⁰ Niaku ku mineiy mouw kaa laa sumiasa nisea; bangsa-bangsa se laa merur sumu’usuk nisea, sakawisa sea siasan karengan en selokna eng kimabar. ¹¹ Efraim eng kasa ketareanna siesa nga ipus oki’ ni sapi minelati, si pa’ar makusu, wo Niaku i yi’i ku moupusela e lo’ongna kewangun, Niaku ku minaas si Efraim; Yehuda si lewo’ sa reiy’ majeko, Yakub si lewo’ sa reiy’ sumisir en tana’ i wee nisia nuesa. ¹² Kumerorouw i wee nikoo minatoroan ampit eng ka’adilan, mupu’ mouw i ki’it e nupus o lale’! Muka’ mouw i wee nikoo en tana’ weru, karengan e nedona mouw laa sumero si TUHAN, i ka’ayo Sia meiy wo mura’arakla nikouw ampit eng ka’adilan. ¹³ Nikouw kouw minajeko mouw eng kawurukan, minupu’ mola eng kawilesan, kimaanola em bu’ana eng katowoan. Eng karengan nikoo koo timede mola en tou wia eng karetamu, witu eng kelakerna ne pahlawan-pahlawannu, ¹⁴ takar eng karungkea’an em paseke’an e laa lumentut witu e nelet ne bangsamu, wo e reiy’ sa mina’asa e reenmu e laa kemunla tanu si Salman nu kimemula em Bet-Arbel witu e nendo paseke’an: ina’ ma’an se oki-oki’ se rinimu’umukla. ¹⁵ Tuana mouw e laa-Ku tuananla wia nikoo, heiy kaum Israel, eng karengan eng kahebatna eng kalewo’annu. Witu e nedo em beena si laa re’inla kasa uli-ulit si raja Israel.