¹ Eng katoroan si Israel nu mudape’, Kuminoupusela nisia, wo waki Mesir Kukumereti sioki’-Ku i ti’i. ² Kasa kereteng-Ku sea, kasa marou’mi sea i ti’i waki sinaru-Ku; nisea se minapasempela en tetule wia em baya se Baal, wo matunu en tetule wia se patong-patong. ³ E nulitna Niaku mouw si minajar si Efraim kumelang wo minopo nisea witu e lawas-Ku, ta’an nisea se so’o mawena’as, kaa Niaku ku lime’osla nisea. ⁴ Niaku ku kimeong nisea ampit en tali kelale’an, ampit e wewa’akesan e nupus. I wee nisea Niaku ku tanu sitou minopomi em bongkouw waki e ruiy nare nea; Niaku ku minengkur wia nisea kaa laa mewewee nisea kumaan. ⁵ Nisea se lewo’ sa reiy’ mareng waki tana’ Mesir, wo si Asyur si laa mamuali raja nea, karengan nisea se simede’ kaa laa makedo’. ⁶ Santi e laa rumangu waki kota-kota nea, e laa munengla eng kekelam-kekelam em pepalen nea, wo laa kumaan nisea waki benten-benten nea. ⁷ Umat-Ku se aruiy witu metaburila Niaku; nisea se makeret wia si Baal wo minena’ merakekla e ngaran-Ku. ⁸ Ma’an tu’una Aku mayala nikoo, heiy Efraim, sumarakanla nikoo, heiy Israel? Ma’an tu’una Aku mayala nikoo tanu si Adma, sumiwo nikoo tanu si Zeboim? Nate-Ku e minareng witu en tou-Ku, en tongkoupuseng-Ku en timo’or minakarengan. ⁹ Niaku ku reiy’ laa tumuanala e nupi’-Ku melaya-layas i ti’i, reiy’ laa munengla si Efraim sumoup. Karengan Niaku i yi’i ku Empung reiy’ tou, Si Kudus witu eng keunerannu, wo Niaku ku reiy’ mineiy kaa laa mererengisla. ¹⁰ Nisea se laa kumi’itla si TUHAN, Sia si laa meger tanu si singa. E nulit, Sia si laa meger, takar se oki-oki’ se laa meiy ampit e matenggo’ogho’ waki talikuran, ¹¹ tanu si wara ampit e matenggo’ogho’ waki Mesir o meiy, wo tanu si pombo waki tana’ Asyur, o laa Niaku ku laa tumampala nisea kasi waki wale-wale nea, tuana mouw e nuwu’ ni TUHAN. ¹² Ampit eng katowoan Niaku ku kinepungola ni Efraim, ampit e le’ekok ne kaum Israel; kasuatan si Yehuda si limiongi waki reten ni Empung, waki reten Ni Kasakudus lale’.