¹ Linganouw e nuwu’ ni TUHAN, heiy tou israel, karengan si TUHAN si makapunya perkara ampit se penduduk em banua i yi’i, karengan e reiy’la kelale’an wo reiy’la upus, wo reiy’la pasine’uala si Empung wia em banua i yi’i. ² Ta’an i te makutok, matowo, mawunu’, marongkit, masiwo en sa’amek, matuanala eng kawengi’isan wo em patoa’an raa’. ³ Kaa ni’itu em banua i yi’i e laa mengasi’, wo se minapekasa pendudukna se laa tumekur; o kangkasi se tekapen-tekapen waki padang wo se wara-wara waki reghe-reghesan, awes tare se sera’-sera’ waki tasik se laa mate mapuneng. ⁴ Ta’an i te te’a mouw wawean tou si rumapot, wo te’a mouw wawean tou tumogor, karengan witu nikoo mouw e rerapot-Ku i ti’i, heiy imam! ⁵ Nikoo koo laa i kare’esok i ka’anu witu e nendo oat, o kangkasi se nabi se laa i kare’esok i ka’anu mewali-wali nikoo witu e nendo wengi; wo Niaku ku laa munengla si ina’mu. ⁶ Umatku se mapuneng karengan reiy’ sumine’u si Empung; karengan nikoo mouw si simede’ em papasine’uan i ti’i takar Niaku ku simede’ nikoo mamuali imam-Ku; wo karengan nikoo koo limiurla en teturu’ ni Empungmu, takar Niaku kangkasi ku laa lumiurla seoki-oki’mu. ⁷ Maka awesla eng kelaker nea, maka berdosala sea wia-Niaku, eng kamulia’an nea e laa-Ku to’oran ampit eng kahina’an. ⁸ Nisea se maka’ato wene’ waki dosa ne umat-Ku wo maarapla se umat-Ku i ti’i sumiwo en selok. ⁹ Takar tanu e nasib ne rakyat en tuana mouw e nasib ni imam: Niaku ku laa mukum nisia karengan e winta’-winta’na wo Niaku ku laa sumuli’la em pasiwo-siwon – pasiwo-siwonna wia nisia. ¹⁰ Nisea se laa kumaan, ta’an se reiy’ mawesu, nisea se laa suma’amek, ta’an reiy’ melaker, karengan nisea se timele’u mola si TUHAN kaa laa tumiboiy wia en sa’amek. ¹¹ E nanggor wo e ranona nanggor e makaliongen eng kaketeran maghenang. ¹² Umat-Ku se mawueiy wia siakana, wo em bulu’na e laa makite’u wia nisia, karengan e roh pesa’amekan en sumeipla nisea, wo nisea se sima’amek timele’ula si Empung nea. ¹³ Nisea se mapasempela en tetule waki toka eng kuntung-kuntung wo matunu en tetule waki atas eng kakenturan-kakenturan, witu e wawa’ e nakana wangko’ wo nakana eng hawar wo e nakana rirung, karengan en teterunganna e leos. Ni’itu mouw eng karenganna se oki-oki’mu wewene se masiwo en sa’amek wo se manuang-manuangmu wewene se mesa’amek. ¹⁴ Niaku ku reiy’ laa mukum se oki-oki wewenemu ma’anouw tu’u sea masiwo en sa’amek, ka’apa se manuang-manuangmu wewene, ma’anouw tu’u sea mesa’amek; karengan nisea nuesa se simea’la en tou mewali-wali ampit se wewene-wewene sa’amek wo minapasempela tetule mewali-wali ampit se sumesa’amek-semesa’amek lukar, wo se umat reiy’ makakasilighan se laa rumewa. ¹⁵ Sa nikoo i yi’i koo masiwo en sa’amek, heiy Israel, te’a mouw si Yehuda i kaki’it simelok! Te’a mouw me’a waki Gilgal, wo te’a mouw melelongkot waki Bet-Awen, wo te’a mouw metetiwa’: “Demi si TUHAN matou-tou!” ¹⁶ Karengan si Israel si kete watu tanu si sapi kete watu, ma’an tu’una en teakan si TUHAN si rumawirla nisea, tanu se domba waki pelein? ¹⁷ Efraim si minaasa’an ampit se berhala-berhala, i waya mola sia! ¹⁸ Pinaesa’an em baya ne tetoeken! nisea se simarakanla en tou kasa makauli-ulit wia em pesa’amekan; nisea se lebe moupusla eng kahina’an ta’an eng kemasyuran nea. ¹⁹ Reghes e timutuwi nisea witu eng kale’ekew-kale’ekewna, wo nisea se laa maka’ato e nirang karengan se tetule-tetule nea.