¹ I lila’ mola wia se patuari-patuarimu tuama: “Ami!” wo wia se patuari-patuarimu wewene: “Ruhama!” ² “I rapotola si ina’mu, i rapotola, karengan nisia si reiy’ tu’awewene-Ku, wo Niaku i yi’i ku reiy’ tu’atuamana; ma’anouw i wa’akatnala en sa’amekna waki giona, wo em pesa’amekanna waki elet em bu’ana em be’ewerna, ³ rio te’a Aku mangkulela e labungna i ka’ayo sia poteiy, wo mayala nisia tanu witu e nendo nisia nu neiy i patoumi, sumiwo nisia tanu em padang gurun, wo sumiwo nisia tanu en tana’ pera, laa o mayala nisia mate kare’oan. ⁴ En tanume se oki-oki’na, Niaku ku reiy’ moupusela nisea, karengan nisea nyi’a mouw se oki-oki’ sa’amek. ⁵ Karengan si ina’ nea si minamuali mouw sa’amek; sia si gimandong nisea si mininta’ mouw e reiy’ waar. Karengan nisia si limila’: Niaku ku pa’ar mekeki’itla em baya se i koupuseku, se minee roti wo e rano kumoo’ku, wu’uk ni domba wo e roko’ lenanku, lana wo eng kekoo’ongku. ⁶ Kaa ni’itu, eng kaulitna, Niaku ku laa sumemper e lalanna ampit en tetune-tetune, wo rumedeiyla e rereen beton kumurung nisia, i ka’ayo sia reiy’ mete’u matola e lalanna. ⁷ Sia si laa mekeki’it em baya se i koupusena, ta’an si reiy’ laa ma’ayola nisea; sia si laa sumero nisea, ta’an si reiy’ minaatoan ampit nisea. Takar nisia si laa lumila’: Niaku ku laa mareng sumoup wia si tu’atuamaku kasa ketare, karengan e nedo ni’itu niaku ku lebe aruiy ta’an en teakan. ⁸ Ta’an nisia si reiy’ minawena’as kaa Niaku mouw si minee wia nisia eng gandum, nanggor wo e lana, wo si minepelaker i wee nisia em perak wo e mas en siniwo nea minamuali patong Baal. ⁹ Kaa ni’itu Niaku ku laa medomi sumoup eng gandum-Ku witu e masana wo e nanggor-Ku witu e norasna, wo laa kumaat e roko’ wu’uk ni domba wo e roko’ lenan-Ku e lewo’ sa reiy’ tumutuwla e nauratna. ¹⁰ Wo en teakan, Niaku ku laa mongka’la e mekeirangenna, witu en saruan em beren em baya ne i koupusena, wo siesa tou tu’u si reiy’ laa mayami nisia waki lawas-Ku. ¹¹ Niaku ku laa mapaena’la e reiy’ sa mina’asa kelaya-laya’anna, e nendo wangko’na, en sumedot weruna wo e nendo Sabatna wo e reiy’ sa mina’asa em pelesirna. ¹² Niaku ku laa munengla e nakana e nanggorna wo e nakana arana, en tanume nyi’a e neiy i lila’nala: em baya nyi’a i yi’i neiy i wee wia niaku, neiy i taberla em baya ne i koupuseku wia niaku! Niaku ku laa sumiwo nyi’a mamuali talun, wo se tekapen-tekapen waki padang se laa kumaan nyi’a ma’apu. ¹³ Wo Niaku ku laa mukum nisia karengan e nendo-nendo eng katoroan nisia nu timunu en tetule i wee em baya se Baal, limo’or ampit se karabu-karabuna wo se kulalona, wo maki’itla em baya se i koupusena wo limiurla Niaku,” tuana mouw e nuwu’ ni TUHAN. ¹⁴ “Kaa ni’itu, eng kaulitna, Niaku i yi’i ku laa melur nisia, wo mali nisia mea waki padang gurun, wo sumusuiy mapalomponla e natena. ¹⁵ Niaku ku laa meemi wia niasia e numa anggorna maname, wo sumiwo eng kewong Akhor mamuali pepalen paarapan. Takar nisia si laa meela en tou maname tanu witu e masa mudana, tanu e nedo nisia nu minae rimou’mi waki tana’ Mesir. ¹⁶ Takar witu e nedo ni’itu, en teinti’i mouw e nuwu’ ni TUHAN, nikoo koo laa kumeret Niaku: Tu’atuamaku, wo reiy’ mouw kasi kumeret Niaku: Baalku! ¹⁷ O laa Niaku ku laa ma’akati e ngaran em baya ne Baal waki sumamu, takar e ngaran nea e reiy’ mouw kasi totoren. ¹⁸ Niaku ku laa ma’akes en teta’aran i wee nikoo witu e nedo ni’itu ampit se tekapen-tekapen waki padang wo ampit se wara-wara waki reghe-reghesan, wo se tekapen-tekapen maoyouw wia en saruan em bumi; Niaku ku laa rume’imi em borang em pana, en santi wo em pakakas i paseke’ waki wanua, wo laa sumiwo nikoo ghumoleiy ampit eng kalenerna. ¹⁹ Niaku ku laa sumiwola nikoo ka’awu-Ku i wee eng keure-urena wo Niaku ku laa sumiwola nikoo ka’awu-Ku witu eng ka’adilan wo eng kaulitan, witu e nupus o lale’ wo e nupus o rendem. ²⁰ Niaku ku laa sumiwola nikoo ka’awu-Ku witu eng kelale’an, i ka’ayo koo laa sumine’u si TUHAN. ²¹ Takar witu e nedo ni’itu, en tuana mouw e nuwu’ ni TUHAN, Niaku ku laa lumingala e langit, wo e langit e laa lumingala em bumi. ²² Bumi e laa lumingala eng gandum, nanggor wo e lana, wo nisea i yi’i se laa lumingala si Yizreel. ²³ Niaku ku laa kumerorla nisia i wee-Niaku wia em bumi, wo laa moupusela si Lo-Ruhama, wo Niaku ku limila’ wia si Lo-Ami: Umat-Ku koo! Wo nisia si laa lumila’: Empungku!”