¹ Nuwu’ ni TUHAN e mineiy wia si Hosea bin Beeri witu en zaman ni Uzia, Yotam, Ahas wo ni Hizkia, raja-raja Yehuda, wo witu en zaman ni Yerobeam bin Yoas, raja Israel. Me’urang ni Hosea tanume eng gambaran ne Israel se reiy’ lale’ ² Eng katoroan si TUHAN nu muleiy masusuiy ampit e nieletan ni Hosea, o mee mouw nuwu’ Sia wia si Hosea: “Mea mouw, kawengenola siesa wewene sa’amek wo i papaurangola se oki-oki’ sa’amek, karengan em banua i yi’i se mesa’amek kahebat ampit timaburimla si TUHAN.” ³ Takar mea mouw sia wo kumawengla si Gomer binti Diblaim, laa o gumandongouw si wewene i ti’i wo tumimea’la i wee nisia siesa oki’ tuama. ⁴ Kamurian o mee mouw nuwu’ si TUHAN wia si Hosea: “Weeanouw ngaran Yizreel wia sioki’ i ti’i, karengan e noki’pe’ edo kasi takar niaku ku laa mukum se me’urang ni Yehu karengan e nutang raa’ ni Yizreel wo Niaku ku laa kumawusla em paperenta’an ne kaum Israel. ⁵ Takar witu e nedo ni’itu Niaku ku laa rumepu’la em borang em pana ni Israel waki kewong Yizreel.” ⁶ O laa si wewene i ti’i si gimandong kasi wo tumimea’la siesa oki’ wewene. O mee mouw nuwu’ si TUHAN wia si Hosea: “Weeanouw ngaran Lo-Ruhama wia si oki’ i ti’i, karengan Niaku ku reiy’ mouw laa moupusla kasi se kaum Israel, wo kasa reiy’ laa mampungela nisea. ⁷ Ta’an Niaku ku laa moupusela se kaum Yehuda wo lumawirla nisea demi si TUHAN, Empung nea. Niaku ku laa lumawirla nisea reiy’ ampit em pana ka’apa en santi, ampit em pakakas i paseke’ ka’apa ampit ne kawalo wo se tou-tou mesake-sake kawalo.” ⁸ Nu reiy’ mouw e rimeiy’la toto’ si Lo-Ruhama, gumandongouw kasi si wewene i ti’i wo tumimea’la siesa oki’ tuama. ⁹ Laa o mee mouw nuwu’ Sia: “Weeanouw ngaran Lo-Ami wia sioki’ i ti’i, karengan nikouw i yi’i kouw reiy’ umat-Ku wo Niaku i yi’i ku reiy’ Empungmu.” En ta’ar tanume eng kelawiran ¹⁰ Ta’an ee sangari, eng kelakerna ne tou Israel se laa tanu e neris en tasik, se reiy’ mete’u ukuren wo reiy’ mete’u rekenen. Wo waki tampa witu e wisa ni’i peila’la wia nisea: “Nikouw i yi’i kouw reiy’ umat-Ku,” e laa i lila’la wia nisea: “Oki-oki’ ni Empung matou-tou.” ¹¹ Tou Yehuda wo se tou Israel se laa merur mewali-wali wo laa mopola i wee nisea siesa ma’aka-aka, o laa nisea se laa rumuberla em banua i yi’i, karengan em bangko’ e nendo Yizreel i ti’i.