¹ Sakawisa si Efraim sumusuiy, tumenggo’ogho’ mouw se tou; nisia si pemopo-mopon waki Israel, ta’an nisia si simelok ampit e masempe se Baal, i ka’ayo mate mouw sia. ² En teakan tu’u nisea se reiy’ siena’na masiwo en dosa, wo simiwo i wee nisia si patong tinoa’ em perak o siwon wo se berhala-berhala miatoroan ampit eng kelali’iketan nea; em baya nyi’a i ti’i en siniwo ne meneniwo-meneniwo. I sempe mola en tetule wia nisia!, em pokeiy nea. Le’osouw sitou sumiong se oki-oki’ ni sapi! ³ Kaa ni’itu nisea se laa tanu en semu memo’odo ka’apa tanu e leleiydem neiy i kaliong memo’odpe’ kasa, tanu e riawuna en daami neiy i telewla e reghes tumokol waki tampa pakusuan ka’apa tanu e nawun waki ansouw. ⁴ Ta’an Niaku nyi’a mouw ku TUHAN, Empungmu rengan waki tana’ Mesir; nikoo koo reiy’ makasine’u empung kacuali Niaku, wo e reiy’la si lumelawir walina ta’an i te Niaku. ⁵ Niaku mouw si makasine’u nikoo waki padang gurun, waki tana karese. ⁶ Eng katoroan nisea nu kumaan rukut, takar nisea se minawesu; nisea nu minawesu mola, takar e nate nea e rimakek; ni’itu mouw eng karenganna nisea se limiurla Niaku. ⁷ Takar Niaku ku minamuali singa i wee nisea, tanu si macang ti’itikan Niaku mengeti-ngetip witu e li’ilik e lalan. ⁸ Niaku ku pa’ar melelalesla nisea tanu si beruang kinaliongan oki’, Niaku ku pa’ar mekekurensangla em be’ewer nea. Maname Niaku ku laa kumaan nisea tanu si singa; tekapen siru waki padang se laa kumisi’ nisea. ⁹ Niaku ku munengla nikoo, heiy Israel, seiy ku’a re’en si toro tumulung nikoo? ¹⁰ Waki wisa ee pasil si rajamu, rio lawirennala koo, wo em baya se pamuka-mukamu, rio weeanna koo ka’adilan, heiy, nikoo si limila’: “I wee mouw wia niaku siesa raja wo se pamuka-muka – pamuka-muka!” ¹¹ Niaku ku meela nikoo siesa raja witu e nupi-Ku wo medomi nisia witu eng kasa upi’-Ku. ¹² Kaselokan ni Efraim en sinaput, en dosana en tinu’utulan. ¹³ Rumara timimea’ e rimeriorla eng kinatouanna, ta’an nisia nyi’a mouw siesa oki’ reiy’ sama’; karengan reiy’ witu e nedona sia moghe, sa e nedona i ka’ayo, sia si so’o rumou’mii witu eng gandongan ni ina’. ¹⁴ Laa-Ku i wayami ku’a re’en sea waki kuasa eng kaoatan ne tou minate, laa-Ku tubuuseni ku’a re’en sea waki maut? Witu e wisa ku’a re’en e rumara menganupmu, heiy maut, witu e wisa ku’a re’en eng keter papunengmu, heiy kaoatan ne tou minate? Em beren-Ku neiy i kapenet i wee en tongkoupusen. ¹⁵ Ma’anouw tu’u sia timou karewur witu e nelet e rukut-rukut, takar e reghes sedangan, reghes ni TUHAN, e laa meiy, sumengomi waki padang gurun, mapaperala eng kembu’an-kembu’anna wo tumerila en salosot-salosotna; eng kaatenna eng harta benda, e reiy’ sa mina’asa em barang wangun-wangun. ¹⁶ Samaria si lewo’ sa reiy’ maka’ato ukuman, karengan nisia si rimangu wia si Empungna. Nisea se laa mate kaa en santi, dade-dadena se laa rimu’umuken, wo se wewene-wewenena megandong e laa kewe’en em po’otna.