1 Makedo’ mouw, heiy Israel, wia si TUHAN, Empungmu, kaa nikoo koo neiy mouw i karo’oros karengan eng kaselokannu. 2 Alinouw ma’an nikoo e lelila’an-lelila’an peneselan, wo makedo’ mouw wia si TUHAN! I lila’ mola wia-Nisia: “Ampunganola e reiy’ sa mina’asa kaselokan, rio keiy maka’ato e le’os, takar nikeiy keiy laa mapasempela em paakuan neiy. 3 Asyur e reiy’ mete’u lumawirla nikeiy; nikeiy keiy so’o mengalila kawalo, wo nikeiy keiy reiy’ laa lumila’ kasi: Oh, Empung meiy! wia en siniwo e lawas meiy. Karengan Nikoo koo moupusla se oki’ ula.” 4 Niaku ku laa sumegaya’mi nisea waki sine’epangan, Niaku ku laa moupusela nisea ampit eng kepa’a-pa’aran, karengan e nupi-Ku e kimo’okosomi waki nisea. 5 Niaku ku laa tanu e leleiydem i wee se Israel, takar nisia si laa mungang tanu e wungang bakung wo laa manapla eng kalat-kalatna tanu e nakana eng hawar. 6 Em panga-pangana e laa sumee’, kasena’anna e laa tanu e nakana en zaitun wo e mawou sedaap tanu em baki Libanon. 7 Nisea se laa mareng wo mena’ witu en tinerungang-Ku wo tumou tanu eng gandum; nisea se laa lume’ar tanu e nakana e nanggor, eng kasa kasine’uan tanu e nanggor Libanon. 8 Efraim, sapape’ ku’a re’en kasi em pinesangkongang-Ku ampit se berhala-berhala? Niaku mouw si miningkot wo mineela ghenang nikoo! Niaku i yi’i ku tanu e nakana en sanobar limisouw, wia-Niaku koo maka’ato wu’ana. 9 Seiy si sama’, ma’anouw sia makasilighla em baya nyi’ai yi’i; seiy si makasiligh, ma’anouw sia mamete’ula nyi’a; karengan e lalan-lalan ni TUHAN nyi’a mouw e rondor, wo se tou ulit se matorola nyi’a, ta’an se rumerangu se i karo’oros witu.