¹ O meiy mouw e nuwu’ ni TUHAN wia niaku: ² “Heiy oki’ ni tou, wawean se rua tou wewene, se oki’ waki siesa ina’. ³ Nisea se mesa’amek waki Mesir, nisea se mesa’amek witu e masa mudana; maname en toto’na em pero’ome-ro’omesen wo em bu’ana em be’ewer kamuda’anna em penibo-niboiyan. ⁴ Ngaran ni kasa tu’a nyi’a mouw si Ohola wo e ngaran ni tuarina nyi’a mouw si Oholiba. Nisea se punya-Ku wo nisea se timimea’la se oki-oki’ tuama wo wewene. Tanume e ngaran-ngaran nea, Ohola sia mouw si Samaria wo si Oholiba sia mouw si Yerusalem. ⁵ Wo si Ohola si mesa’amek, eng kasuatan nisia si punya-Ku. Sia si kasa serit wia se i koupus-koupusena, wia se tou Asyur, pahlawan-pahlawan em paseke’an, ⁶ limabung e roko’ buwung tu’a, kumbasar-kumbasar wo se makua-kuasa – makua-kuasa, em baya nea se taretumouw wangun, se pasukan kawalo. ⁷ Sia si matuanala em pesa’amekanna ampit nisea, em baya nea se tou Asyur pineleng; sia si maseromorla en touna ampit em baya ne tou, wia si seiy sia sumerit wo ampit se berhala-berhalana. ⁸ Sia si reiy’ tumele’ula em pesa’amekanna em patuanannala rengane’ waki Mesir, karengan witu e masa mudana se tou se timekelola nisia, wo nisea se menibo-niboiy em be’ewer kamuda’anna wo tumoa’la em pesa’amekan nea wia nisia. ⁹ Eng karengan e ni’itu Niaku ku simarakanla nisia witu e lawas ne i koupus-koupusena, witu e lawas ne tou Asyur, wia si seiy sia sumerit. ¹⁰ Nisea se sima’alukla e nauratna, se oki-oki’na tuama wo wewene se sinikop wo nisia nuesa si winunu’ ampit en santi. Ampit en tuana e ngaranna em penusu-nusuiyen witu e nelet ne kaum wewene karengan e nukuman neiy mouw i weela witu nisia. ¹¹ Ma’anouw tu’u eng kapualitan-kapualitan i ti’i e linoo’ ni tuarina, Oholiba, nisia si lebepe’ serit kasi wo em pesa’amekanna e limebepe’mi kasi waki si kaka’na. ¹² Sia si serit wia se tou Asyur, wia se kumbasar-kumbasar wo se makua-kuasa – makua-kuasana, wia se pahlawan-pahlawan paseke’an e labungna eng kasa lekep, wia se pasukan kawalo, em baya nea se taretumou wangun. ¹³ Niaku ku limoo’ kaa nisia si maseremorla en tou; eng kalakuan nea nu rua nyi’a mouw e masuat. ¹⁴ Awes tare, sia si minawes em pesa’amekanna kasi: sia si maloo’ si tuama neiy i kalumi witu eng kedir, gambar ne tou-tou eng Kasdim, neiy i lumi witu eng keliur mea’, ¹⁵ rereenanna em bina’akes ampit e wewa’akes e rereenan, eng kokongna minake peporong e minowoiy, em baya nyi’a em paloo’ola tanu se perwira, se memange’anla se tou Babel waki Kasdim, tana’ kinatouan nea. ¹⁶ Makarengan nu linoo’ona mola ampit em berenna sia si serit wia nisea wo mapa’ali rereo wia nisea mea waki tana’ Kasdim. ¹⁷ Takar se tou Babel se mineiy wia nisia kumeipila en tetekelan rerendeman wo sumeremorla nisia ampit em pesa’amekan nea; nu reiy’ mouw nisia nu minaseremor kaa nisea, nisia si mewayati waki nisea. ¹⁸ Eng karengan nisia si matuanala em pesa’amekanna ampit e reiy’ makiro-kirong wo minapaloo’ola nuesa e nauratna, takar Niaku ku mina’akati en tou karengan mari’iris wia nisia, tanu Niaku nu mina’akati en tou waki si tuarina. ¹⁹ Nisia si matuanala e lebe lakere’ kasi em pesa’amekanna kasuata i kaghenang wia e masa mudana, e nedo sia nu mesa’amek waki tana’ Mesir. ²⁰ Sia si serit wia se ka’ampit-ka’ampitna mesa’amek, e nauratna en tanu e naurat ni keledai wo en tata’na en tanu en tata’ ni kawalo. ²¹ Nikoo koo mepa’arla eng kakewuran e masa mudamu, e nedo se tou Mesir nu menibo-noboiy em be’ewermu wo mero’ome-ro’omes en toto’ kareraa’annu. ²² Eng karengan e ni’itu, heiy Oholiba, en teinti’i mouw e nuwu’ ni EMPUNG Tuhan, memang nikoo koo mina’akatomi en toumu waki se i koupus-koupusemu, ta’an e nulit, Niaku ku laa rumeo nisea moghe sumu’usuk nikoo; Niaku ku laa mali nisea sumu’usuki nikoo waki esa nga kaledongmu: ²³ tou em Babel wo em baya ne tou eng Kasdim, tou em Pekod, tou en Soa wo se tou eng Koa, wo em baya ne tou Asyur mewali nisea, taretumou kewangun, kumbasar-kumbasar wo em baya ne makua-kuasa em baya nea, perwira-perwira wo se pahlawan-pahlawan paseke’, pasukan kawalo em baya nea. ²⁴ Nisea se meiy sumu’usuk nikoo ampit eng kelaker kareta wo em bola-wola wo ampit se esa nga eruran ne bangsa-bangsa; nisea se laa rumansun eng kekelung wangko’ wo rintek wo en seipa’ witu esa nga kaledongmu sumu’usuk nikoo, wo Niaku ku laa sumarakanla em perkara i yi’i witu en sinaruna wo nisea se laa makimla nikoo i ki’it e nukum nea. ²⁵ Niaku ku laa sumuli’la en katetayureng-Ku wia nikoo, i ka’ayo sea mapatuanala nikoo ampit eng kaupi’an, sesepunan wo en talingamu e laa ka’areten wo se tele’umu se laa mate i kakolo’ kaa en santi. Nisea se laa sumikop se oki-oki’mu tuama wo wewene wo se tele’umu se laa kaanen e napi. ²⁶ Nisea se laa moteiyla nikoo wo kumaat se lelo’or-lelo’ormu. ²⁷ Niaku ku laa sumiwo nikoo mapaena’la eng kakewurannu wo em pesa’amekannu rengane’ waki tana’ Mesir, i ka’ayo koo reiy’ mouw kasi makirit wia nisea wo reiy’ mouw kasi meghena-ghenang se tou Mesir. ²⁸ Karengan en teinti’i mouw e nuwu’ ni EMPUNG Tuhan: Loo’on, Niaku ku laa sumarakanla nikoo witu e lawas ne tou se i kari’irismu, ma’anouw tu’u koo mina’akatomi en tou waki nisea. ²⁹ Nisea se laa tumuanala nikoo ampit eng kari’irisan wo laa kumaat e reiy’ sa mina’asa wua’na em bineduannu wo tumele’ula nikoo limengat poteiy, i ka’ayo e naurat pesa’amekannu paloo’ola. Kakewurannu wo em pesa’amekannu ³⁰ e mapa eiy eng kapualitan i yi’i witu nikoo, karengan nikoo koo mesa’amek ampit e mesawa’la se bangsa-bangsa wo maseremorla en toumu ampit se berhala-berhala nea. ³¹ Nikoo koo matou-tou maki’itla eng kalakuan ni kaka’mu, kaa e ni’itu Niaku ku laa mee nikoo kumoo’omi waki pialana. ³² Teinti’i mouw e nuwu’ ni EMPUNG Tuhan: Nikoo koo lewo’ sa reiy’ kumoo’omi waki piala ni kaka’mu, piala kerarem wo em penar en sumana, nyi’a i ti’i em piala kelaker em pumpunena; e mamuali i penge’eke-nge’eke’ wo e weweleiy-weweleiy nikoo. ³³ Nikoo koo laa mawuta eng katoekan wo e mengasi’. Piala mekeide’en ni’i pewalila eng kapenesan nyi’a mouw em piala ni kaka’mu Samaria. ³⁴ Nikoo koo kumoo’ nyi’a ma’an e nampasna, i ka’ayo kumu’us em pete’na-pete’na wo koo mangkulela en susumu. Karengan Niaku ku limila’la nyi’a, tuana mouw e nuwu’ ni EMPUNG Tuhan. ³⁵ Eng karengan e ni’itu, en teinti’i mouw e nuwu’ ni EMPUNG Tuhan: Eng karengan nikoo koo limiurla Niaku wo timaburila Niaku, en teakan pesa’anenouw nuesa eng kakewurannu wo em pesa’amekannu.” ³⁶ O laa si TUHAN si minee nuwu’ wia niaku: “Heiy oki’ ni tou, pa’ar ku’a re’en koo makimla si Ohola wo si Oholiba wo makite’ula wia nisea em pasiwo-siwon nea kasa wu’ul? ³⁷ Karengan nisea se mesa’amek, e lawas nea e minangalela’mur raa’ wo nisea se mesa’amek ampit e masempe se berhala-berhalana, awes tare se oki-oki’ tuama nea se neiy i patoumi i wee-Niaku se neiy i sempenala tanume se tetule witu e napi wia se berhala-berhalana minamuali kekaanen. ³⁸ E walinana e ni’itu eng kapualitan i yi’i kangkasi en tinuana neala witu niaku, nisea se simeremorla en tampa kudus-Ku witu e nendo ni’itu wo limangkoiy eng kakudusan e nendo-nendo Sabat-Ku. ³⁹ Wo eng kasuatan nisea nu mareret se oki-oki’ nea i wee se berhala-berhalana, nisea se mineiy witu e nendo ni’itu waki tampa kudus-Ku wo lumangkoiy eng kakudusanna. E nulit, nyi’i mouw en tinuana neala witu eng gorem em bale-Ku. ⁴⁰ Awesala kasi nisea se makiwee se tou-tou mineiy waki tampa kewa’akat ampit rimeo rereo kumeret nisea, wo e nulit, nisea se mineiy. Demi eng ke’e eiy nea nikoo koo limele’ weresi-weresi, minangun em pali’ipismu wo limo’or en toumu ampit e lelo’or-lelo’or. ⁴¹ Nikoo koo rimuber witu en tetekelan wangun i te waya wo witu en sinaruna e meja ampit eng kekaanen neiy i sakeiyla; witu natas en tetekelannu i ti’i koo minee e nukupang-Ku wo e lana-Ku. ⁴² Laa o kalinga’anouw en suara keramean em patou-touan menena-nenaang wia nisia wo wia se tou-tou waki se tou kelaker niawesala kasi se tetoeken-tetoeken waki padang gurun. Nisea se minakela eng kulalo witu e lawasna wo e mahkota kamulia’an witu natas eng kokongna. ⁴³ Niaku ku limila’: Sapa ku’a re’en e wungang weles i yi’i e matuanape’la pesa’amekan? Tou se mesa’amek ampit nisia, awes tare ampit nisia. ⁴⁴ Nisea se mengeiy wia nisia tanu se tou mengeiyla si wewene sa’amek. En tuana mouw nisea nu mengeiy wia si Ohola wo si Oholiba kaa laa metetuanala eng kakewuran. ⁴⁵ Ta’an se tou-tou se ulit lale’ se laa makimla nisea tanu se tou makimla se wewene-wewene mesa’amek wo se timoa’la raa’, karengan nisea nyi’a mouw se wewene-wewene mesa’amek wo e lawas nea e minelela’amuran raa’.” ⁴⁶ Karengan en teinti’i mouw e nuwu’ ni EMPUNG Tuhan: “Ma’anouw tumo’or se esa nga eruran tou sumu’usuk nisea wo ma’anouw sea mamuali mekeide’en wo pekekaatan. ⁴⁷ E neruran ne tou i yi’i e laa lumawala nisea ampit em batu wo sumabouw nisea ampit en santina, munu’ se oki-oki’ tuama wo se oki-oki’ wewene nea wo rumengis ma’apu em bale-wale nea. ⁴⁸ Niaku ku laa mena’la eng kakewuran witu en tana’ i ti’i wo em baya ne kaum wewene se laa meela ghenang e ngenge’enge’ i ti’i wo reiy’ laa tumuanala eng kakewuran kasi tanu en tinuana miouwla. ⁴⁹ Tou se laa sumuli’la eng kakewurannu witu nikoo wo nikouw kouw lewo’ sa reiy’ tumanggong en dosa-dosamu karengan nikouw kouw masempe se berhala-berhala. Wo nikouw kouw laa mamete’ula kaa Niaku mouw ku EMPUNG Tuhan.”