¹ O meiy mouw e nuwu’ ni TUHAN wia niaku: ² “Heiy nikoo, oki’ ni tou, pa’ar ku’a re’en koo mekeka’anula, yon, mekeka’anula ukuman witu eng kota wuta nutang raa’? I pakite’u mola wia nisia e reiy’ sa mina’asa em pasiwo-siwonna kasa wu’ul, ³ wo i lila’ mola: Teinti’i mouw e nuwu’ ni EMPUNG Tuhan: Heiy kota, e matoa’la raa’ witu eng keunerannu, i ka’ayo e nedo pe’ukuman nikoo meiy wo sumiwo se berhala-berhala i wee nikoo se sumeremorla en toumu. ⁴ Ampit e raa’ neiymu i toa’la nikoo koo simelok wo ampit se berhala-berhalamu se siniwomu nikoo koo minaseremor; ampit en tuana nikoo koo simiwo e nedomu timawi wo simiwo eng kesampetan en te’un-te’unnu e meiy. Eng karengan e ni’itu Niaku ku mee nikoo weweleiyan i wee se bangsa-bangsa wo sesero’an i wee em baya em banua. ⁵ Se tawi wia nikoo wo se wa’akati waki nikoo se laa sumero’ nikoo, eng kawu’ulanna eng kasa kasine’uan wo e wuta karingka’an. ⁶ Loo’on, siesa o siesa se ma’aka-aka – ma’aka-aka ne Israel se matede-tede eng kaente’anna witu eng keunerannu kaa laa metetoa’la raa’. ⁷ Witu nikoo si ama’ wo si ina’ se sero’en wo witu eng keunerannu se tou se matuanala em paperasan witu se tou wo’oseiy, witu nikoo se oki’ ula wo se balu se i lotoiy. ⁸ Nikoo koo maloo’ola wure’ witu eng kapualitan-kapualitan kudus i wee-Niaku wo e nendo-nendo Sabat-ku en sineremormula. ⁹ Witu nikoo se subelatla se tou-tou sumesero’ ampit e maksut metetoa’la raa’ wo se tou kimaan e le’ona en sesempe waki atas eng kuntung-kuntung; kesa’amekan em patuananla witu eng keunerannu. ¹⁰ Witu nikoo se tou se maongka’la e naurat ni ka’awu ni ama’na wo maperkosa wewene witu e nedo kewur e roko’na en simeremorla nisia. ¹¹ Siesa si matuanala eng kawu’ulan ampit si ka’awu ni kasuatna wo se walina se maseremorla si manuangna wewene ampit em pasiwo-siwon sa’amek, se tou walina kasi se maperkosa si patuarina wewene, oki’ karengan ni ama’na. ¹² Witu nikoo se tou se masungkul em bewoko’ kaa laa metetoa’la raa’, nikoo koo mapurut em bungangna e loit ka’apa maedo rente wo marugila se kasuatmu ampit em paperasan, ta’an Niaku ku liniurmula, tuana mouw e nuwu’ ni EMPUNG Tuhan. ¹³ E nulit, Niaku ku masepe’ lawas en tanume eng kauntungannu haram eng kina’atoannula wo en tanume e raa’ neiy i toa’la witu eng keunerannu. ¹⁴ Sapa ku’a re’en e natemu e laa mena-ena’ te’etep wo e lawasmu mapedam ente’ witu e masa Niaku nu minta’ witu nikoo? Niaku, TUHAN, si limila’la nyi’a wo si laa sumiwo nyi’a. ¹⁵ Niaku ku laa moghela nikoo witu e nelet ne bangsa-bangsa wo sumerame nikoo waki em baya em banua wo Niaku ku laa kumukuri eng kaseremorannu waki nikoo. ¹⁶ Takar nikoo koo laa seremoren waki sinaru ne bangsa-bangsa karengan eng kaselokannu nuesa, wo nikoo koo laa mamete’ula kaa Niaku mouw ku TUHAN.” ¹⁷ Laa o meiy mouw e nuwu’ ni TUHAN wia niaku: ¹⁸ Heiy oki’ ni tou, i wee-Niaku se kaum Israel se minamuali mouw te’ina; nisea nu waya nyi’a mouw se tanula en tambaga, tima puti’, wesi wo en tima item witu eng gorem em peranoan; nisea se tanu en te’ina em perak. ¹⁹ Kaa ni’itu en teinti’i mouw e nuwu’ ni EMPUNG Tuhan: Eng karengan nikouw nu waya kouw minamuali te’ina, takar e nulit, Niaku ku laa merurla nikouw waki keuneran e Yerusalem. ²⁰ Tanu se tou maerurla em perak, tambaga, wesi, tima item wo en tima puti’ witu eng gorem em peranoan wo sumengola api witu em bawa’na kaa laa mereranola nyi’a, en tuana mouw Niaku nu laa merurla nikouw witu e nupi’-Ku wo eng kaupi’ang-Ku wo meela nikouw witu eng goremna wo rumano nikouw. ²¹ Niaku ku laa merurla nikouw wo laa rumeputla e napi kaupi’ang-Ku wia nikoo, i ka’ayo kouw ranon witu eng goremna. ²² Tanu em perak e ranon witu em peranoan, en tuana mouw nikouw nu laa ranon witu eng gorem e nyi’a. Wo nikouw kouw laa mamete’ula, kaa Niaku, TUHAN, si timoa’la eng kaupi’ang-Ku witu nikoo.” ²³ Kamurian o meiy mouw e nuwu’ ni TUHAN wia niaku: ²⁴ “Heiy oki’ ni tou, i lila’ mola wia nisia: Nikoo nyi’a mouw koo tana’ reiy masungkul e naro, reiy’ maka’ato rano witu e masa kaupi’an, ²⁵ se ma’aka-aka – ma’aka-akana witu eng keuneranna se tanu si singa meraong, si rima’akep si penganenna: sitou si nine’enep, harta benda wo em barang-barang maka’arga eng kinaat, balu-balu se siniwo maawes-maawes witu eng keuneranna. ²⁶ Imam-imamna se maperkosa e nukum Taurat-Ku wo maseremorla eng kapualitan-kapualitan kudus i wee-Niaku, nisea se reiy’ memange’anla e nelet eng kudus ampit e reiy’ kudus, reiy’ maweela teturu’ em pemange’anan seremor ampit e lenas, nisea se minereng witu e nendo-nendo Sabat-Ku. En tuana mouw Niaku nu sineremorla witu eng kauneran nea. ²⁷ Pamuka-muka – pamuka-mukana witu eng keuneranna nyi’a mouw se tanu se serigala-serigala mera’akep se penganenna witu eng kare’oala e raa’, se mapunengla se tou-tou kaa laa me’untungla en tou nuesa eng kenaramen reiy’ pengedon. ²⁸ Wo se nabi-nabina se lima’amur nisea ampit eng kapur ampit e limoo’ em pineleloo’ mele’ekok wo minee e ne’udam towo i wee nisea; nabi-nabi i ti’i se limila’: Teinti’i mouw e nuwu’ ni EMPUNG Tuhan! – ta’an si TUHAN si reiy’ minee nuwu’. ²⁹ Penduduk em banua se matuanala em paperasan wo em pekaatan, malotoiy se tou peme’itan wo miskin wo nisea se matuanala em paperasan witu se tou wo’oseiy, e minasu’usukan ampit e nukum. ³⁰ Niaku ku masero witu eng keuneran nea siesa tou laa mereredeiyla em beton ka’apa si laa metetaangla em banua i ti’i witu en sinaru-Ku, rio te’a Kumunengla, ta’an Niaku ku reiy’ minatola nisia. ³¹ Takar Niaku ku timoa’la e nupi’-Ku witu nisea wo munengla nisea ampit e napi kaupi’ang-Ku; eng kalakuan nea neiy-Ku i torola witu eng kokong nea, tuana mouw e nuwu’ ni EMPUNG Tuhan.”