¹ Witu en te’un kasiouw, witu en sumedot kamapulu’, witu en tanggal mapulu’ en sumedot ni’itu, o meiy mouw e nuwu’ ni TUHAN wia niaku: ² “Heiy oki’ ni tou, i patikola en tanggal e nendo i yi’i, yon, en tanggal e nendo i yi’i. Wia e nendo i yi’i kangkasi si raja Babel si muleiy rumego e Yerusalem. ³ I totorola e nesa i peulurela wia se kaum rumerangu wo i lila’ mola wia nisea: En teinti’i mouw e nuwu’ ni EMPUNG Tuhan: I wee mola e rumping witu natas e napi, i wee mola, wo i toa’ mouw kangasi e rano witu eng goremna; ⁴ i wee mola e le’ona witu eng goremna, em baya nyi’a eng kinetor makale’os, em pa’a wo e ru’urna; wutanola i tu ampit en duiy-ruiy pineleng. ⁵ Edonouw si domba kinapelengan, wo ransunenouw kangkasi eng kayu witu e wawa’na, ma’anouw em palutu’un i ti’i kumaro’oko’ wo en duiy-ruiyna eng kumi’it lumeme’ witu eng goremna. ⁶ Eng karengan e ni’itu en teinti’i mouw e nuwu’ ni EMPUNG Tuhan: Cilaka mouw eng kota wuta e nutang raa’, e rumping time’i witu eng goremna wo en te’ina e reiy’ i kaliongi witu nyi’a! I rou’mi esa nga ketor – esa nga ketor waki ghoremna reiy’ ampit e memele-meleng. ⁷ Karengan e raa’ neiy i toa’nala e niatope’ witu eng keuneranna; sia si timoa’la nyi’a waki atas eng kakenturan watu e ro’opong. Sia si reiy’ timoa’la nyi’a witu natas en tana’, rio tu tawunanna ampit en tana’. ⁸ Demi e nupi’ limentut wo e mapedam mesesuli’ en timo’or Niaku ku laa tumoa’la e raa’na nuesa witu natas eng kuntung watu ro’opong rio te’a petetawunala. ⁹ Eng karengan e ni’itu en teinti’i mouw e nuwu’ ni EMPUNG Tuhan: Cilaka mouw eng kota wuta e nutang raa’! Niaku kangkasi ku laa mapasela en tetunuan mayatna. ¹⁰ Rumansunouw laker lungu, layasen e napi, ma’anouw e le’ona e malutu’ ulit, tea’ mouw en sawona wo ma’anouw en duiy-ruiyna marengis. ¹¹ I reta’ mola e rumping i ti’i e reiy’la sisapa witu natas em baana e napi, rio i tu tunun wo en tambagana e mamea’, i ka’ayo eng kemo’na e makemu witu eng goremna wo en te’ina ni’i kaliong. ¹² Niaku ku mame’inakut ampit e reiy’ sipenoron, karengan en te’ina eng kakuraber e reiy’ i karou’mi wia nisia , ma’an witu e napi. ¹³ Eng karengan nikoo koo maseremorla en toumu ampit eng kesa’amekannu, wo Niaku ku pa’ar melelenasla nikoo, ta’an nikoo koo reiy’ malenasi waki keseremorannu, takar nikoo koo reiy’ mouw laa lenasen kasi, i ka’ayo Aku tumurusla eng kaupi’ang-Ku witu nikoo. ¹⁴ Niaku, TUHAN, si limila’la nyi’a. Eng kapualitan i ti’i e laa meiy, wo Niaku si laa sumiwo nyi’a. Niaku ku reiy’ laa mepepeparla nyi’a wo reiy’ mapedam moupus, o kangkasi reiy’ menesel. Niaku ku laa makimla nikoo i ki’it em pasiwo-siwonnu, tuana mouw e nuwu’ ni EMPUNG Tuhan.” Kinepepate ni ka’awu ni Yehezkiel tanume en sesine’uan kinawolonan e Yerusalem ¹⁵ Kamurian o meiy mouw e nuwu’ ni TUHAN wia niaku: ¹⁶ “Heiy oki’ ni tou, loo’on, Niaku ku laa ma’edomi waki nikoo nisia si kasa i koupusmula tanu si tinena’ katula, ta’an te’a mouw ma’arip ka’apa tu’u mame’ wo te’a mouw mererou’mi lue’. ¹⁷ Memene-menes i te menga’angal, te’a mesesiwola e narip em patean; i kulilitola en susu’unnu wo pakenouw en selopmu, te’a petetutuwan eng giomu wo te’a mekekaan e roti pengasi’an.” ¹⁸ Witu e memo’odona niaku ku simusuiy wia se bangsa i ti’i wo witu em bengina si ka’awuku si minate. Witu e memo’odo tumodongla nyi’a niaku ku timuanala tanu em pinerentala wia niaku. ¹⁹ Takar se bangsa i ti’i se limila’ wia niaku: “Reiy’ ku’a re’en koo simadia makite’ula wia nikeiy, sapa em penoronna e nyi’i i wee nikeiy, kaa nikoo koo timuanala en tuana?” ²⁰ O laa wingkotengku sea: “Nuwu’ ni TUHAN e mineiy mouw wia niaku: ²¹ I lila’ mola wia se kaum Israel: En teinti’i mouw e nuwu’ ni EMPUNG Tuhan: Eng kauli-ulitna Niaku ku laa sumeremorla en tampa kudus-Ku, eng kakuasa’annu ni’i pesawa’mula, eng kasenaangan i wee em berennu wo i wee si imukurmu; wo se oki-oki’mu tuama wo wewene se neiy miouw i tele’ula se laa mate i kakolo’ kaa en santi. ²² Nikouw kouw laa tumuanala tanu en tinuanakula: Eng giomu e reiy’ laa tutuwan niouwla wo e roti pengasi’an e reiy’ laa kaanen niouw, ²³ eng kokongmu minake susu’un wo e ne’amu e minake selop; wo nikouw kouw reiy’ laa ma’arip ka’apa mame’. Ta’an nikouw kouw laa makemu merano witu e nukumannu, wo nikouw kouw laa nguma’angal siesa wia se walina. ²⁴ En tuana mouw si Yehezkiel mamuali sesine’uan i wee nikoo; e minakatena-tena’ tanu en tinuananala e laa tuanan niouwla. Sa i tu minamuali mola takar nikouw kouw laa mamete’ula, kaa Niaku mouw ku EMPUNG Tuhan. ²⁵ Wo nikoo, oki’ ni tou, reiy’ ku’a re’en en teinti’i e laa mamuali? Witu e nendo Niaku nu medomi waki nisea em benten nea, e lelo’or nea e mekelaya-laya’en e natena, kasenaangan em berenna wo em palelonla ni imukurna, se oki-oki’ nea tuama wo wewene, ²⁶ witu e nendo i ti’i kangkasi si laa meiy siesa tou neiy i kaliseiy si mali e nabar wia nikoo. ²⁷ Witu e nendo i ti’i en sumamu e laa i kawuka’ wo nikoo koo laa sumusuiy wia sitou neiy i kaliseiy i ti’i wo reiy’ mouw kasi minena-ena’ wowo’. Ampit en tuana nikoo koo minamuali sesine’uan i wee nisea wo nisea se laa mamete’ula, kaa Niaku mouw ku TUHAN.”