¹ Heiy, i totorola e nesa na’aripen en tanume si raja Israel, ² wo i lila’ mola en teinti’i: “Kumura si ina’mu minamuali esa nga ipus singa mereiy witu e nelet ne singa-singa! Nisia si ghimoleiy witu e nelet ne singa-singa muda, wo matoto’la se oki-oki’na. ³ Nisia si simelami siesa nga ipus waki se oki-oki’na, i ka’ayo minamuali singa muda; nisia si mina’ajar maro’okep awes tare sitou si ne’enepenna. ⁴ Bangsa-bangsa se minaleiyla: Singa si merangu! Kesampetanna nisia si neiy i kasempak witu em pepo’opot nea; nisea se mina’akes nisia wo rumawir nisia mea waki Mesir. ⁵ Nu reiy’ mouw si inang ni singa nu minena’asla kaa em pe’inakutenna e minapo’opol wo em paarepenna e limiong minere’i, sia medo sioki’na walina wo sumelami nisia minamuali singa muda. ⁶ Sioki’na i yi’i si mengela-ngelang witu e nelet ne kawang ne singa, nisia si minamuali esa nga ipus singa muda; nisia si ma’ajar maro’okep, awes tare sitou si ne’enepenna. ⁷ Nisia si timeri em puri-puri nea wo rumego eng kota-kotana; em bumi ma’an e reiy’ sa mina’asa em pumpunena e minenes kineide’an malinga en suara raonganna. ⁸ Takar se bangsa-bangsa se timo’or mesaru nisia waki daerah-daerah esa nga kaledongna, nisea se tima’an em pure’eket kaa laa mesesikop nisia wo mesesempak nisia witu em pepo’opot. ⁹ Nisia si kinurung witu eng kalero, si kasuatan pinentang, niali mea witu en sinaru ni raja Babel wo i ghoremla witu em penjara, rio en suarana te’a kalinga’an kasi waki atas eng kuntung-kuntung Israel. ¹⁰ Ina’mu si tanu e nakana nanggor witu e numa anggor, neiy i ketanem tawi en dano, mawu’ana wo mepanga karengan en dano meloko-lokon. ¹¹ Witu nisia en timou e nesa pangana kaente’ e minamuali wulu’ eng keraja’an; nisia si rimoa’ kerakek witu e nelet em pangana-pangana kaidet, wo minamuali pakalo’o-loo’ola karengan eng kerakekna wo karengan em pangana kelaker. ¹² Ta’an nisia si kinesawutani witu eng gorem eng kaupi’an wo i lawami wia em bumi; reghes sedangan en simiwo nisia minaweles minapera; wo e napi eng kima’apula nisia. ¹³ Wo en teakan nisia si neiy i ketanem waki padang gurun, waki tana’ kapera wo mare’ola rano. ¹⁴ Takar rumou’ momi e napi waki pangana eng kimaan mina’apu en tuwu’na wo em bu’ana, i ka’ayo e rereiy’ mola kasi wia nisia em pangana kaente’ wo e rereiy’ mola siwulu’ eng keraja’an.” E nyi’i nyi’a mouw e na’aripen wo e minamuali mouw na’aripen.