¹ Witu en te’un kapitu, witu en sumedot kalima, witu en tanggal e mapulu’ en sumedot ni’itu, o meiy mouw se pirala tou waki se tu’a-tu’a Israel kaa meiy mekekiwee teturu’ wia si TUHAN wo rumuber witu en sinaruku. ² Laa o meiy mouw e nuwu’ ni TUHAN wia niaku: ³ “Heiy oki’ ni tou, sumusuiy mouw wia se tu’a-tu’a Israel wo i lila’ mola wia nisea: En teinti’i mouw e nuwu’ ni EMPUNG Tuhan: Sapa ku’a re’en kouw mineiy kaa meiy mekekiwee teturu’ wia-Niaku? Demi Niaku si matou-tou, Niaku ku so’o kouw kumiwee teturu’ wia-Niaku, tuana mouw e nuwu’ ni EMPUNG Tuhan. ⁴ Pa’ar ku’a re’en koo makimla nisea, heiy oki’ ni tou, pa’ar ku’a re’en koo makimla nisea? I pakite’u mola wia nisea em pasiwo-siwon – pasiwo-siwon kasa wu’ul waki se nene moyang nea, ⁵ wo i lila’ mola wia nisia: En teinti’i mouw e nuwu’ ni EMPUNG Tuhan: Witu e nendo Niaku nu mineleng e Israel, Niaku ku timiwa’ wia se see’ kaum ni Yakub wo minapaloo’o-loo’ola en tou wia nisea waki tana’ Mesir; Niaku ku timiwa’ wia nisea: Niaku mouw ku TUHAN Empungmu! ⁶ Witu e nendo ni’itu Niaku ku timiwa’ wia nisea kaa laa malimi nisea waki tana’ Mesir meiy waki tana’ em pineleng-Ku i wee nisia, em banua e meloko-lokon en susu wo e maduna, en tana’ kewangun witu e nelet em baya em banua. ⁷ Wo Niaku ku limila’ wia nisea: Ma’anouw susur tou si tumea’la se dewa-dewana makari’irisen, witu e wisa nisia si reiy’ mena’ maloo’ wo te’a mouw mekekewurla en toumu ampit se berhala-berhala Mesir; Niaku mouw ku TUHAN, Empungmu. ⁸ Ta’an nisea se rimangu witu Niaku wo se so’o melelinga wia-Niaku; susur tou si reiy’ tumea’la se dewa-dewana makari’irisen, mea wisa sia reiy’ mena’ maloo’, wo reiy’ tumele’ula se berhala-berhala Mesir. Takar Niaku ku mekemaksut laa metetoa’la eng kaupi’ang-Ku mea witu natas nea kaa laa meteturusla e nupi’-Ku wia nisia waki keuneran en tana’ Mesir. ⁹ Ta’an Niaku ku mininta’ eng karengan e ngaran-Ku, rio i tu te’a pewewu’ulen witu en sinaru ne bangsa-bangsa, waki wisa sea nu witu. Witu en sinaru ne bangsa-bangsa i ti’i Niaku ku minapaloo’o-loo’ola en tou wia nisea witu eng kapualitan Niaku nu minali nisea rumou’mi waki tana’ Mesir. ¹⁰ Niaku ku minali nisea rimou’mi waki tana’ Mesir wo rumawir nisea mea waki padang gurun. ¹¹ Maname Niaku ku mineela eng katataapan-katataapang-Ku wo minakite’ula e natoran-natorang-Ku, wo sitou matuanala nyi’a, si laa tumou, ¹² E nendo-nendo Sabat-Ku kangkasi e neiy-Ku i weela wia nisea e mamuali paghenangan witu e nelet Niaku wo nisea, rio sea mamete’ula kaa Niaku mouw ku TUHAN, si kimudusla nisea. ¹³ Ta’an se kaum Israel se rimangu witu Niaku waki padang gurun; nisea se reiy’ matou-tou maki’it eng katataapan-katataapang-Ku wo nisea se simede’ e natoran-natorang-Ku, e, sa sitou tumuanala nyi’a, nisia si laa tumou.Nisea kangkasi se limangkoiy eng kakudusan e nendo-nendo Sabat-Ku ampit eng kasa me’ulit. Takar Niaku ku mekemaksut laa metetoa’la e nupi’-Ku mea witu natas nea waki padang gurun kaa mepepunengla nisea. ¹⁴ Ta’an Niaku ku mininta’ karengan e ngaran-Ku, rio i tu te’a wu’ulen witu en sinaru ne bangsa-bangsa, se limoo’ sandiri e nedo Niaku nu minali nisea rimou’mi. ¹⁵ Ma’anouw tu’u tuana Niaku ku timiwa’ wia nisia waki padang gurun, kaa Niaku ku reiy’ laa mali nisea ghumorem mea waki tana’ e neiy-Ku mouw i weela wia nisea, e meloko-lokon en susu wo e maduna, en tana kewangun witu e nelet em baya em banua, ¹⁶ eng karengan nisea se simede’ e natoran-natorang-Ku wo reiy’ matou-tou maki’it eng katataapan-katataapang-Ku wo limangkoiy eng kakudusan e nendo-nendo Sabat-Ku; karengan e nate nea e maki’itla se berhala-berhala nea. ¹⁷ Ta’an Niaku ku mapedam moupus maloo’ola nisea, i kaa’yo Aku reiy’ minunengla nisea wo reiy’ kima’apula nisea waki padang gurun. ¹⁸ Takar Niaku ku limila’ wia se oki-oki’ nea waki padang gurun: Te’a mouw kouw tumou kumi’it eng katataapan-katataapan ni ama’mu wo te’a mouw metetiboiy witu e natoran-natoran nea wo te’a mouw mewewu’ulela en toumu ampit se berhala-berhala nea. ¹⁹ Niaku mouw ku TUHAN, Empungmu: tumou mouw kumi’it eng katataapan-katataapang-Ku wo tuananola e natoran-natorang-Ku ampit e lale, ²⁰ kudusenola e nendo-nendo Sabat-Ku, i ka’ayo e ni’itu mamuali paghenangan witu e nelet Niaku wo nikouw, rio se tou se mamete’ula kaa Niaku mouw ku TUHAN, Empungmu. ²¹ Ta’an se oki-oki’ nea se rimangu witu Niaku, nisea se reiy’ matou-tou maki’it eng katataapan-katataapang-Ku wo se reiy’ matuanala e natoran-natorang-Ku ampit e lale’, kasuatan sitou si matuanala nyi’a, si laa tumou; nisea kangkasi se limangkoiy eng kakudusan e nendo-nendo Sabat-Ku. Takar Niaku ku mekemaksut metetoa’la eng kaupi’ang-Ku mea witu e natas nea kaa laa meteturusla e nupi’-Ku wia nisia waki padang gurun. ²² Ta’an Niaku ku kimeongi e lawas-Ku sumoup wo mininta’ karengan e ngaran-Ku, rio i tu te’a wu’ulen witu en sinaru ne bangsa-bangsa se limoo’ sandiri e nedo Niaku nu minali nisea rimou’mi. ²³ Ma’anouw tu’u tuana Niaku ku timiwa’ wia nisia waki padang gurun kaa laa sumarakanla nisea witu e nelet ne bangsa-bangsa wo sumerala nisea mea waki em baya em banua, ²⁴ eng karengan nisea se reiy’ matuanala e natoran-natorang-Ku wo simede’ eng katataapan-katataapang-Ku wo limangkoiy eng kakudusan e nendo-nendo Sabat-Ku wo em berenna neiy i katuyu wia se berhala-berhala ne ama’-ama’ nea. ²⁵ En tuana mouw Niaku kangkasi ku mineela wia nisea eng katataapan-katataapan e reiy’ le’os wo e natoran-natoran, eng karengan e nyi’a nisea se reiy’ mete’u tumou. ²⁶ Niaku ku minayala nisea minamuali makari’irisen ampit en sesempe-sesempe nea, witu eng kapualitan nisea nu minapasempela en tanume en tetule witu e napi em baya ne kasa ketareanna neiy i patoumi waki gandongan, rio Aku sumiwo nisea i katu’us, rio sea mamete’ula kaa Niaku mouw ku TUHAN. ²⁷ Eng karengan e ni’itu sumusuiy mouw wia se kaum Israel, heiy oki’ ni tou, wo i lila’ mola wia nisea: Teinti’i mouw e nuwu’ ni EMPUNG Tuhan: Witu eng kapualitan i yi’i kangkasi se nene moyangmu se minojat Niaku, nyi’a i ti’i nisea se minaroba lale’ wia-Niaku. ²⁸ Karengan nu reiy’ mouw Niaku nu minali nisea mea waki wanua e nampit en tiwa’ neiy-Ku mouw i ta’arla meela nyi’a wia nisea, nisea se maloo’ mea waki susur eng kakenturan kerakek wo waki susur e nakana wuta em pangana-pangana wo nisea se minapasempela maname en tetule rineretna wo maali en sesempena mekeraran e nate, o kangkasi maserala e wou maname en sesempe-sesempe nea mawou sedaap wo mapasempela nisea maname en tetule-tetule tinoa’ nea. ²⁹ Takar Niaku ku limila’ wia nisea: Tampa rakek sapa ni’itu e linongkot miouw? Takar e ngaranna em patotoren Tampa Rakek i ka’ayo e nendo i yi’i. ³⁰ Eng karengan e ni’itu i lila’ mola wia se akum Israel: En teinti’i mouw e nuwu’ ni EMPUNG Tuhan: Sapa ku’a re’en nikoo koo maseremor’la en toumu kangkasi ampit eng kenaramen em patou-touan ne nene moyangmu wo mesa’amek ampit maki’itla se dewa-dewana makari’irisen? ³¹ Witu e maali en sesempe-sesempemu, nyi’a i ti’i mapasempela se oki-okimu tanume se tetule witu e napi, nikouw kouw maseremor’la en toumu ampit se reiy’ sa mina’asa berhala-berhalamu i ka’ayo e nendo i yi’i, sapa ku’a re’en Aku pa’are’ kouw kumiwee teturu’ wia -Niaku, heiy kaum Israel? Demi Niaku si matou-tou, tuana mouw e nuwu’ ni EMPUNG Tuhan, Niaku ku so’o mouw kasi kouw kumiwee teturu’ wia-Niaku. ³² Wo sapa e limentut witu e natemu eng kasa reiy’ laa mamuali, nyi’a i ti’i e neiy miouw i lila’la: Nikeiy keiy pa’ar tanu se bangsa-bangsa walina, tanu se reiy’ sa mina’asa kaum waki wanua-wanua kaa laa lumukar wia e nakana wo em batu. ³³ Demi Niaku si matou-tou, en tuana mouw e nuwu’ ni EMPUNG Tuhan, Niaku ku laa merenta nikouw ampit e lawas kaente’ wo e lalupa neiy i ka’ayat wo eng kaupi’an neiy i katoa’. ³⁴ Niaku ku laa malimi nikouw rumou’mi waki keuneran ne bangsa-bangsa wo meruri nikouw waki wanua-wanua, waki wisa nikouw nu simera ampit e lawas kaente’ wo e lalupa neiy i ka’ayat wo eng kaupi’an neiy i katoa’, ³⁵ wo Niaku ku laa mali nikouw mea waki padang gurun ne bangsa-bangsa wo maname Niaku ku laa maperkara ampit nikouw mesaruan eng gio. ³⁶ Tanu Niaku nu minaperkara ampit se nene moyangmu waki padang gurun en tana’ Mesir, en tuana mouw Niaku nu laa maperkara ampit nikouw, en tuana mouw e nuwu’ ni EMPUNG Tuhan. ³⁷ Niaku ku laa mayala nikouw lumangkoiyi waki wawa’ e wulu’ rumerawir-Ku wo ghumoremla nikouw witu eng kalero ampit e rumeken nikouw. ³⁸ Niaku ku laa tuma’atasi waki keunerannu se tou-tou rimangu wo dimurhaka witu Niaku;Niaku ku laa mali nisea rumou’mi waki wanua, en tampa nisea nu maena’ tanume se tou wo’oseiy, ta’an waki tana’ Israel nisea se reiy’ laa ghumorem. Wo nikouw kouw laa mamete’ula kaa Niaku mouw ku TUHAN. ³⁹ Heiy nikouw, kaum Israel, en teinti’i mouw e nuwu’ ni EMPUNG Tuhan, ma’anouw siesa o siesa mea rumaghes wia se berhala-berhalana. Ta’an eng kamurian kouw laa lumingala Niaku wo reiy’ mouw kasi lumi’isigh eng kakudusan e ngaran-Ku kudus ampit en sesempe-sesempemu wo se berhala-berhalamu. ⁴⁰ Karengan waki atas eng kuntung-Ku kakudus, waki atas eng kuntung Israel kerakek, en tuana mouw e nuwu’ ni EMPUNG Tuhan, maname waki tana’ i ti’i se pakasa’an kaum Israel witu e minapekasana se laa rumaghes wia-Niaku. Maname Niaku ku laa mepa’arla wia nikoo wo maname Niaku ku laa kume’imi waki nikouw en sesempe-sesempe wuntulmu wo en sesakeiy-sesakeiymu kinapelengan, e reiy’ sa mina’asa eng kinudus miouwla. ⁴¹ Tanu wia en sesempe mawou sedaap Niaku ku mepa’arla wia nikoo witu e nedo Niaku nu rimou’mi nikouw waki uner ne bangsa-bangsa wo meruri nikouw waki wanua-wanua, waki wisa kouw simera, wo Niaku ku laa mapatudu’la eng kakudusang-Ku wia nikoo witu en sinaru ne bangsa-bangsa. ⁴² Wo nikouw kouw laa mamete’ula kaa Niaku mouw ku TUHAN, witu e nedo Niaku nu minali nikouw ghumorem mea waki tana’ Israel, mea waki wanua e nampit en tiwa’ e neiy-Ku mouw i ta’arla meweweela nyi’a wia se nene moyangmu. ⁴³ Maname nikouw kouw laa i kaghena-ghenang wia e reiy’ sa mina’asa eng kapawinta-winta’mu, ampit e wisa nikouw nu simeremorla en toumu, wo nikouw kouw laa medam mekekero’ lumoo’ en toumu nuesa karengan e reiy’ sa mina’asa eng kalewo’an-kalewo’an en tinuana miouwla. ⁴⁴ Wo nikouw kouw laa mamete’ula kaa Niaku mouw ku TUHAN, witu e masa Ku, eng karengan e ngaran-Ku, ku reiy’ matuanala nikouw e minaesa’an ampit eng kapawinta-wintamu e lewo’ wo wuruk, heiy kaum Israel, tuana mouw e nuwu’ ni EMPUNG Tuhan.” ⁴⁵ Laa o meiy mouw e nuwu’ ni TUHAN wia niaku: ⁴⁶ “Heiy oki’ ni tou, i tuyu mola eng giomu mea waki timu wo tumotorola laker tetogor witu se tana’ timu wo menti’ mouw witu se tana’ ketalunan waki esa nga weka timu; ⁴⁷ wo i lila’ mola wia si talun waki esa nga weka timu: Linganouw e nuwu’ ni TUHAN: Teinti’i mouw e nuwu’ ni EMPUNG Tuhan: Loo’on, Niaku ku laa lumayasla e napi witu eng goremmu e laa kumaan ma’apu en susur e nakana timou wia nikoo wo susur e nakana minaweles minapera. E napina eng kasuatan melaya-layas e reiy’ laa mate wo em baya en saruan waki timu i ka’ayo amian e laa katunuan mepasu’ kaa e nyi’a. ⁴⁸ Wo susur tou si laa lumoo’, kaa Niaku, TUHANouw si timutung nyi’a; e napi i ti’i e reiy’ laa mate.” ⁴⁹ Laa o ku lumila’: “O welegh, EMPUNG Tuhan, nisea se meila’ en tanume niaku: Sapa ku’a re’en nisia si reiy’ i te matotorla e lelila’an-lelila’an sesindir?”