¹ Takar meiy mouw e nuwu’ ni TUHAN wia niaku: ² “Wawean sapa ampit nikouw, i ka’ayo kouw limila’la en tetotoren sindiran i yi’i waki tana’ Israel: Ama’-ama’ se kimaan em bu’ana mata’ wo em ba’ang ne oki-oki’na e mina ilouw? ³ Demi Niaku si matou-tou, tuana mouw e nuwu’ ni EMPUNG Tuhan, nikouw kouw reiy’ mouw laa tumotorla e lelila’an sindiran i yi’i kasi waki Israel. ⁴ E nulit, em baya ne imukur Niaku ku makapunya! Le’os si imukur ni ama’ ka’apa tu’u si imukur ni oki’ Niaku ku makapunya! Wo se tou masiwo en dosa, ni’itu se lewo’ sa reiy’ mate. ⁵ Sa siesa nga touan nyi’a mouw sitou ulit wo sia matuanala eng ka’adilan wo eng kaulitan, ⁶ wo sia reiy’ mekaan e le’ona sesempe waki atas eng kuntung ka’apa reiy’ maloo’ wia se berhala-berhala ne kaum Israel, reiy’makewurla si tu’awewene ni kasuatna wo reiy’ metawila se wewene e nedo kumewur e roko’, ⁷ reiy’ malotoiy se tou walina, sia mewarengla e neram ne tou, reiy’ mekaat sapa-sapa, mawee kumaan se tou maarem, mawee labung wia se tou poteiy, ⁸ reiy’ mapurut e wungang loit ka’apa maedo rente, mewa’akati en tou waki kawilesan, matuanala e nukum ulit witu e nelet ne tou ampit ne tou, ⁹ tumou maki’it eng katataapang-Ku wo minena-ena’ maki’itla e natorang-Ku ampit mawinta’ lale’ – nyi’a mouw sitou ulit, wo nisia si tantu tumou, tuana mouw e nuwu’ ni EMPUNG Tuhan. ⁸ Reiy’ mapurut e wungang loit ka’apa maedo rente, mewa’akati en tou waki kawilesan, matuanala e nukum ulit witu e nelet ne tou ampit ne tou, ⁹ tumou maki’it eng katataapang-Ku wo minena-ena’ maki’itla e natorang-Ku ampit mawinta’ lale’ – nyi’a mouw sitou ulit, wo nisia si tantu tumou, tuana mouw e nuwu’ ni EMPUNG Tuhan. ¹⁰ Ta’an sa sia tumimea’la siesa oki’ si minamuali rumero’obit, wo si pa’ar matoa’la raa’ ka’apa matuanala e meta’esa’an waki kapualitan-kapualitan i ti’i ¹¹ – ma’anouw tu’u si ama’ si reiy’ timuanala esa tu’u – o kangkasi mekaan e le’ona sesempe waki atas eng kuntung wo makewurla si tu’awewene ni kasuatna, ¹² malotoiy se tou peme’itan wo miskin, mekaat, reiy mewarengla e neram ne tou, maloo’ wia se berhala-berhala wo matuanala eng kasa wu’ul, ¹³ mapurut e wungang loit wo maedo rente, se tou tuana se reiy’ laa tumou. E reiy’ sa mina’asa kawu’ulan i yi’i em patuanannala, nisia si lewo’ sa reiy’ mate; e raa’na neiy i katoro wia nisia nuesa. ¹⁴ Eng kaulitna, sa sia tumimea’la siesa oki’ wo sioki’ i yi’i si lumoo’ e reiy’ sa mina’asa en dosa tinuanala ni ama’na, ta’an si minena’asla eng kapualitan i ti’i, i ka’ayo si reiy’ matuanala tanu e ni’itu: ¹⁵ nisia si reiy’ kimaan e le’ona sesempe waki atas eng kuntung wo reiy’ maloo’ wia se berhala-berhala ne kaum Israel, reiy’ makewurla si tu’awewene ni kasuatna, ¹⁶ reiy’ malotoiy se tou walina, reiy’ pa’ar makiwee e neram, reiy’ mekaat sapa-sapa, mawee kumaan se tou maarem, mawee labung wia se tou poteiy, ¹⁷ mewa’akati en tou waki kawilesan, reiy maedo e wungang loit ka’apa rente, matuanala e natorang-Ku wo tumou maki’it eng katataapang-Ku – sitou tuana si reiy’ laa mate karengan eng kaselokan ni ama’na, nisia si tantu tumou. ¹⁸ Ama’na, si matuanala em paperasan, si mekaat e wo’o sapa, wo si matuanala eng kapualitan-kapualitan e reiy’ le’os witu eng keuneran ne bangsana, e nulit, nisia si laa mate karengan eng kaselokanna. ¹⁹ Ta’an nikouw kouw meila’: Ka’a sioki’ si reiy’ kumi’it tumanggong eng kaselokan ni ama’na? – Karengan sioki’ i ti’i si matuanala eng ka’adilan wo eng kaulitan, matuanala em baya eng katataapang-Ku ampit e lale’, takar nisia si tantu tumou. ²⁰ Se tou masiwo en dosa, ni’itu se lewo’ sa reiy’ mate. Sioki’ si reiy’ laa kumi’it tumanggong eng kaselokan ni ama’na wo si ama’ si reiy’ laa kumi’it tumanggong eng kaselokan ni oki’na. Sitou si laa sumungkul em berkat eng kaulitanna, wo eng kawu’ulan ni tou wu’ul e laa i ketanggong witu nisia. ²¹ Ta’an sa wona’ sitou wu’ul si makedo’mi waki e reiy’ sa mina’asa en dosa tinuananala wo tumiboiy witu e reiy’ sa mina’asa eng katataapang-Ku ma’an matuanala eng ka’adilan wo eng kaulitan, nisia si tantu tumouw, nisia si reiy’ laa mate. ²² E reiy’ sa mina’asa en durhaka siniwona e reiy’ laa peghena-ghenangen kasi witu nisia; nisia si laa tumou karengan eng kaulitan en tinuananala. ²³ Sapa ku’a re’en Niaku ku mepa’arla wia eng kinepatean ne tou wu’ul? Tuana mouw e nuwu’ ni EMPUNG Tuhan. Reiy’ ku’a re’en wia eng kinakedo’anna rio sia tumou? ²⁴ Sa wona’ sitou ulit si murikiti waki kaulitanna wo tumuanala eng kawilesan tanu e reiy’ sa mina’asa kawu’ulan en tinuanala ne tou wu’ul – sapa ku’a re’en nisia si laa tumou? E reiy’ sa mina’asa eng kaulitan tinuananala e reiy’ laa peghena-ghenangen kasi. Nisia si lewo’ sa reiy’ mate karengan nisia si minaroba lale’ wo karengan en dosa tinuananala. ²⁵ Ta’an nikouw kouw meila’: E winta’ ni Tuhan e reiy’ minakatoro! Lingane’la rior, heiy kaum Israel, sapa ku’a re’en e winta’-Ku e reiy’ minakatoro ka’apa ku’a re’en e winta’mu e reiy’ minakatoro? ²⁶ Sa sitou ulit si murikiti waki kaulitanna wo tumuanala eng kawilesan i ka’ayo sia mate, nisia si lewo’sa reiy’ mate karengan eng kawilesan tinuananala. ²⁷ Eng kapurikitna, sa sitou wu’ul si makedo’mi waki kawu’ulanna en tinuananala wo sia tumuanala eng ka’adilan wo eng kaulitan, nisia si laa lumawirla e nyawana. ²⁸ Nisia si minawena’as wo minakedo’mi waki e reiy’ sa mina’asa en durhaka siniwona, nisia si tantu tumou, nisia si reiy’ laa mate. ²⁹ Ta’an se kaum Israel se meila’: E winta’ ni Tuhan e reiy’ minakatoro! Sapa ku’a re’en e winta’-Ku e reiy’ minakatoro, heiy kaum Israel, ka’apa ku’a re’en e winta’mu e reiy’ minakatoro? ³⁰ Eng karengan e ni’itu Niaku ku laa mukum nikouw siesa o siesa i ki’it e winta’na, heiy kaum Israel, tuana mouw e nuwu’ ni EMPUNG Tuhan. Makedo’ mouw wo lumengemi waki e reiy’ sa mina’asa en durhakamu, rio e ni’itu te’a i wee nikoo mamuali watu kasu’usu’an, eng kuma’anula nikouw witu eng kaselokan. ³¹ i tea’ momi waki nikoo e reiy’ sa mina’asa durhaka en siniwo miouw witu Niaku wo werunola e natemu wo e rohmu! Ka’a ku’a re’en nikouw kouw laa mate, heiy kaum Israel? ³² Karengan Niaku ku reiy’ mepa’arla wia eng kinepatean niesa nga touan e lewo’ sa reiy’ tanggongenna, tuana mouw e nuwu’ ni EMPUNG Tuhan. Eng karengan e ni’itu, makedo’ mouw, rio kouw tumou!”