¹ Takar meiy mouw e nuwu’ ni TUHAN wia niaku: ² “Heiy oki’ ni tou, i lila’ mola e nesa pepureiyen wo i totorola e nesa i peulurela wia se kaum Israel. ³ I lila’ mola: En teinti’i mouw e nuwu’ ni EMPUNG Tuhan: siesa nga ipus wara rajawali kasela ampit eng kale’ekewna kasela wo kelabot, wuta ampit em bu’uk minakeliu-keliur si mineiy waki kuntung Libanon wo sia medo en tempok e nakana aras. ⁴ Nisia si rimepu’la en tuwu’na kasa tempok wo alinna mea waki esa wanua pabelante’an laa o i reta’nala nyi’a waki kota pame’inakutan. ⁵ Nisia si minedomi e nesa waki suru-suru en tana’ i ti’i wo tumanemla nyi’a waki penguma’an en sadia mouw pewewu’uwuran; nisia si timampala nyi’a tawi en dano meloko-lokon tanu e nakana eng gandarusa ⁶ i ka’ayo sia tumou wo mamuali akana anggor karirung, eng kinetetouna eng kumeng wo em pangana-pangana e minengkeng matorome si wara i ti’i wo eng kalat-kalatna e minena-ena’ witu em bawa’na. Tuana mouw nisia si minamuali akana nanggor wo minodoli en suru-suru wo maresiki tuwu’-tuwu’. ⁷ Witu e ni’itu wawean kangkasi si wara rajawali sela walina ampit eng kale’ekewna kewangko’ wo em bu’uk keidet. Wo nulit, e nakana nanggor i yi’i e matorome eng kalat-kalatna mea waki si wara i ti’i wo em pangana-pangana neiy i renetnala wia nisia, rio si wara i ti’i meemi rano nisia lebe le’os ta’an em bedeng witu e wisa sia neiy i tanem. ⁸ Ta’anouw nisia si neiy i tanem witu em penguma’an e le’os, tawi en dano meloko-lokon, rio sia mepangana-pangana wo mee wu’ana wo rio mamuali akana nanggor kewangun. ⁹ I lila’ mola: Teinti’i mouw e nuwu’ ni EMPUNG Tuhan: Sapa ku’a re’en e ni’itu e laa mua’? Sapa ku’a re’en sitou si reiy’ laa sumawut eng kalat-kalatna wo me’epesla em bu’ana, i ka’ayo em baya e laleiyna-laleiynana weru e mapera? Reiy’ perlu e lawas ente’ wo laker tou kaa laa mesesawut nisia ampit eng kalat-kalatna. ¹⁰ Loo’on, nisia si memang neiy i tanem, ta’an sapa ku’a re’en nisia si laa mee wua’na? Sapa ku’a re’en nisia si reiy’ laa maweles mapera sa toron e reghes sendangan? Nisia si laa maweles mapera witu em bedeng tampa kinetetouna i ti’i.” ¹¹ Takar meiy mouw e nuwu’ ni TUHAN wia niaku: ¹² “I lila’ mola wia se kaum rumerangu: Reiy’ ku’a re’en kouw minete’ula sapa em penoronna e nyi’i? I lila’la: Loo’on, raja Babel si mineiy waki Yerusalem wo sia medo si rajana wo se pamuka-muka – pamuka-mukana wo mali nisea mea waki Babel i wee nisia. ¹³ O laa sia medo siesa tou asal waki se see’ ni raja wo sumiwola teta’aran ampit nisia kasuatan rimeo nisia tumiwa’. Sia si minedo kangkasi se tou-tou makua-kuasa em banua i ti’i, ¹⁴ rio eng keraja’an i ti’i malewea’ wo te’a mererangu kasi, o kangkasi rio tumiboiy te’etep en teta’aran i ti’i wo ampit en tuana e minena-ena’ wia. ¹⁵ Ta’an se tou i ti’i se rimangu wia nisia ampit e rimeo se tetokena mea waki Mesir, rio sia weean kawalo wo suraro ka’asa’an. Sapa ku’a re’en nisia si laa mua’? Sapa ku’a re’en sitou masiwo en tuana si toro i kaliseiy? Sapa ku’a re’en sitou kimelongla en teta’aran si toro i kaliseiy? ¹⁶ Demi Niaku si matou-tou, tuana mouw e nuwu’ ni EMPUNG Tuhan, nisia si tantu mate waki Babel, waki tampa ni raja si minopola nisia minamuali raja. Karengan nisia si limoo’ wure’ witu en tiwa’ eng kiniweela ni raja i ti’i wia nisia wo kimelongla en teta’aran ni raja i ti’i ampit nisia. ¹⁷ Wo si Firaun si reiy’ laa sumawang nisia witu em paseke’an ampit se suraro ka’asa’an wo se esa nga eruran ne kelaker tou, witu e nedo em beton pakepungan nu tawunan wo em benten pakepungan ni’i redeiyla kaa laa merere’ila se kelaker tou. ¹⁸ Yon, nisia si limoo’ wure’ witu en tiwa’ wo kumelongla en teta’aran. E nulit, ma’anouw tu’u sia mulitela eng kapualitan i ti’i ampit metabea’an lawas, ta’an nisia si limangkoiy em baya nyi’a i ti’i, takar nisia si reiy’ mete’u i kaliseiy. ¹⁹ Eng karengan e ni’itu, en teinti’i mouw e nuwu’ ni EMPUNG Tuhan: Demi Niaku si matou-tou, Niaku ku tantu mapatorola witu eng kokongna en tiwa’na wia-Niaku, e linoo’ona wure’ wo en teta’aranna witu en sinaru-Ku eng kinelongnala. ²⁰ Niaku ku laa tuma’an em pure’eket-Ku kaa laa sumikop nisia wo witu eng gorem em perangkap-Ku nisia si laa i kasempak; Niaku ku laa mali nisia mea waki Babel wo maname Niaku ku laa maperkara ampit nisia, karengan nisia si minaroba lale’ witu Niaku. ²¹ Wo em baya se suraro pinelengna se laa mate kaanen en santi wo se neiy i kaliseiy se laa i serala mea waki em baya em beren e rumereghes. Wo nikouw kouw laa mamete’ula kaa Niaku mouw ku TUHAN, si limila’la nyi’a. ²² Teinti’i mouw e nuwu’ ni EMPUNG Tuhan: Niaku nuesa ku laa medomi e nesa suru waki tempok e nakana aras kerakek wo tumanemla nyi’a; Niaku ku rumepu’mi nyi’a waki tuwu’na kasa tempok wo en sobore’ wo Niaku nuesa ku laa tumanemla nyi’a waki atas e nesa kuntung e rimoa’me kerakek waki atas; ²³ waki atas eng kuntung Israel kerakek si laa-Ku tanem sia, rio sia mepangana-mepangana wo mee wu’ana wo e mamuali akana aras hebat; se reiy’ sa mina’asa minegheghioan ne wara wo se makawu’uk makatetelew se maena’ witu em bawa’na, nisea se timerung witu e wawa’ em pangana-pangana. ²⁴ Takar em baya e nakana waki penguma’an e laa mamete’ula , kaa Niaku, TUHAN, kimumengla e nakana kerakek wo rimakekla e nakana kumeng, simiwo e nakana matou e minaweles minapera wo simiwo e nakana weles pera en simuru sumoup. Niaku, TUHAN, si limila’la nyi’a wo laa sumiwo nyi’a.”