¹ Laa o meiy mouw e nuwu’ ni TUHAN wia niaku: ² “Heiy oki’ ni tou, i pakite’u mola wia si Yerusalem em pasiwo-siwon – pasiwo-siwonna kasa wu’ul ³ wo i lila’ mola: Teinti’i mouw e nuwu’ ni EMPUNG Tuhan wia si Yerusalem: E nasalmu wo eng kinatouannu nyi’a mouw e waki tana’ Kana’an; ama’mu sia mouw sitou Amori wo si ina’mu sitou eng Heti. ⁴ Kinatouannu en teinti’i: E nedo nikoo nu neiy i patoula, em pusermu e reiy’ kinetor wo nikoo koo reiy’ nioasan ampit en dano rio weresi; o kangkasi ampit e wuras tu’u koo reiy’ ni’isu’ ka’apa sinaputla ampit e loyor. ⁵ E reiy’la siesa tou tu’u si mapedam moupus wia nikoo i ka’ayo siwonna eng kapualitan-kapualitan i ti’i wia nikoo waki mapedam tongkoupusen; awes tare koo neiy i tea’ mea waki penguma’an, eng karengan se tou se maapisla nikoo witu e nendo kinetetoumu. ⁶ Takar Niaku ku limeasi witu wo Ku lumoo’ nikoo menepa-nepa ampit e ne’amu kasuatan makerewowoiy raa’ wo Aku lumila’ wia nikoo witu eng ka’ada’an makerewowoiy raa’ i ti’i: Nikoo koo lewo’ sa reiy’ tumou ⁷ wo sumela mouw tanu en tanemen-tanemen waki penguma’an! Nikoo koo minasela wo awesouw e numur, awes tare e mina’ayo mouw e masa kareraa’annu. Takar em bu’ana em be’ewermu em bulongo’ mouw, em bu’ukmu en timou mouw, ta’an nikoo koo witu eng ka’ada’an poteiy. ⁸ Takar Aku limeasi witu wo Aku lumoo’ nikoo, e nulit, nikoo koo mina’ayo mouw witu e masa rendem on serit. Niaku ku minelarla e roko’ku wia nikoo wo tumutuwla e nauratmu. Ampit en tiwa’ Niaku ku simiwola teta’aran ampit nikoo, tuana mouw e nuwu’ ni EMPUNG Tuhan, wo ampit e ni’itu nikoo koo punya-Ku. ⁹ Niaku ku minoas nikoo ampit en dano kaa laa meweweresimi e raa’mu waki nikoo wo Aku misu’la nikoo ampit e lana. ¹⁰ Niaku ku minakela e labung keliur-keliur wia nikoo wo mineela nikoo se selop-selop waki kuli’ ni lumba-lumba wo em pepenet eng kokong e lenan nalus o siwon wo en sesalelengen sutra o siwon. ¹¹ Wo Niaku ku limo’orla nikoo ampit e lelo’or-lelo’or wo makela kulalo witu e lawasmu wo eng kelana witu e lee’mu. ¹² Wo Niaku ku minakela e nanti-anting witu en sesepunannu wo e nanti-anting witu en talingamu wo e mahkota kamulia’an witu natas eng kokongmu. ¹³ Ampit en tuana nikoo koo limo’or en toumu ampit e mas wo em perak, labungmu e lenan nalus wo en sutera wo e roko’ minakeliu-keliur; kekaanennu nyi’a mouw en topong kasa le’os, madu wo e lana wo nikoo koo minamuali kasa wulouw, i ka’ayo koo waar mamuali ratu. ¹⁴ Wo e ngarannu eng kasa kasine’uan witu e nelet ne bangsa-bangsa karengan eng kawulouwannu, karengan eng kasa lekep nyi’a, eng karengan en serengat e lelo’or-Ku neiy-Ku i weela wia nikoo, tuana mouw e nuwu’ ni EMPUNG Tuhan.” ¹⁵ “Ta’an nikoo koo mesawa’la eng kawulouwannu wo nikoo koo metanula se mesa’amek witu maparekenla em pangasesine’uannu wo nikoo koo maserala em pesa’amekannu wia se susur tou melangkoiy. ¹⁶ Nikoo koo minedomi waki labung-labungmu kaa laa mesesiwo eng kakenturan-kakenturan patuleannu minakeliu-keliur wo koo suma’amek witu; en tanu ni’itu e reiy’pe’ ma’an mekasa mamuali wo e reiy’ mouw laa wawean kasi. ¹⁷ Nikoo koo minedo kangkasi se lelo’or-lelo’ormu se siniwo waki mas-Ku wo em perak-Ku, e neiy-Ku i weela wia nikoo, wo nikoo koo simiwo i wee nikoo se patong-patong tuama wo koo suma’amek ampit nisea. ¹⁸ Nikoo koo minedomi waki labungmu minakeliu-keliur kaa laa tumutuwla nisea wo nikoo koo minapasempela wia nisea e lana-Ku wo e nukupang-Ku. ¹⁹ O kangkasi eng kekaaneng-Ku e neiy-Ku i weela wia nikoo – en topong kasa le’os, lana wo e madu neiy-Ku i weela kekaanennu – nikoo koo minapasempela wia nisea e minamuali sesempe mawou sedaap, tuana mouw e nuwu’ ni EMPUNG Tuhan. ²⁰ awes tare, nikoo koo minedo se oki-oki’mu tuama wo wewene se neiy i patoumumi i wee-Niaku wo mapasempela wia nisea e mamuali kekaanen nea. Sapa ku’a re’en em pesa’amekannu i yi’i em perkarape’ apis ²¹ kaa nikoo koo mareret se oki-oki’-Ku wo sumarakanla wia nisea ampit e minapasempela nisea tanume se tetule witu e napi? ²² Witu e reiy’ sa mina’asa em pasiwo-siwon – pasiwo-siwonnu kasa wu’ul wo em pesa’amekannu i ti’i nikoo koo reiy’ mouw i kaghenang kasi witu e masa reraamu, e nedo nikoo nu limengat poteiy kasuatan menepa-nepa ampit e ne’amu witu e lina’amuran e raa’mu. ²³ Wo nu reiy’ mouw e reiy’ sa mina’asa eng kalewo’annu i ti’i – cilaka, cilaka mouw nikoo! Tuana mouw e nuwu’ ni EMPUNG Tuhan – ²⁴ nikoo koo mebangun i wee nikoo en tampa kerakek wo sumiwo i wee nikoo eng kakenturan patulean waki susur em pelein. ²⁵ Witu en susur em pontol e lalan nikoo koo mebangun eng kakenturan patulean wo mewangker eng kawulouwannu mamuali kawu’ulan ampit kimekala e rua pa’amu i wee se susur tou melangkoiy, i ka’ayo em pesa’amekannu e maawes-maawes. ²⁶ Nikoo koo mesa’amek ampit se tou Mesir, ketana’mu, si aurat sela i ti’i, i ka’ayo em pesa’amekannu e maawes-maawes, e malentutla e rara ate-Ku. ²⁷ Loo’on, Niaku ku simu’usukola nikoo wo kimurangomi e wetengmu wo sumarakanla nikoo wia eng kewaya-waya’an em pa’ar ne tou-tou se mari’iris nikoo, nyi’a i ti’i se wewene-wewene Filistin, se mapedam meirang maloo’ eng kapawinta-winta’mu eng kewur i ti’i. ²⁸ Nikoo koo mesa’amek kangkasi ampit se tou Asyur, eng karengan koo reiy’pe’ mapedam minateula; yon, nikoo koo mesa’amek ampit nisea, ta’an koo reiy’pe’ mapedam minateula. ²⁹ Nikoo koo minepelakere’ kasi em pesa’amekannu ampit em banua pabelante’an eng Kasdim, , ta’an ampit e ni’itu kangkasi koo reiy’pe’ mapedam minateula. ³⁰ Kumura eng kasela en seritmu i ti’i, tuana mouw e nuwu’ ni EMPUNG Tuhan, nikoo si matuanala e reiy’ sa mina’asana i yi’i, nyi’a i ti’i em pasiwo-siwon niesa wewene sa’amek kasa lewo’, ³¹ si minangun en tampamu kerakek witu susur em pontol e lalan wo simiwo eng kakenturan patuleannu waki susur em pelein-pelein. Ta’an nikoo koo reiy’ tanu se sa’amek kenaramen, eng karengan nikoo koo masede’ en tetoro sa’amek. ³² Heiy tu’awewene berzinah, si merawak se tou-tou walina sawel si tu’atuamana nuesa. ³³ Wia em baya ne wewene sa’amek se tou se mawee tetoro, ta’an nikoo eng kapurikitna, nikoo si mawee tetaber pepa’an wia em baya ne meupusla nikoo tanume e na’elur, rio nisea se waki esa nga kaledongmu se meiy wia nikoo kaa meiy mesesa’amek. ³⁴ Takar witu em pesa’amekannu nikoo nyi’a mouw koo kapurikitna waki se wewene-wewene walina; reiy’ tou si mekeki’it nikoo mesesa’amek; ta’an nikoo si minee en tetoro pesa’amekan, kasuatan nikoo koo reiy’ wineean sapa-sapa; ni’itu mouw eng kapurikitanna wia nikoo. ³⁵ Eng karengan e ni’itu, heiy wewene sa’amek, linganola e nuwu’ ni TUHAN! ³⁶ Teinti’i mouw e nuwu’ ni EMPUNG Tuhan: Eng karengan nikoo koo maserala eng kakewurannu wo e nauratmu ni’i paongka’la witu em pesa’amekannu ampit sitou marendemla nikoo wo ampit se berhala-berhalamu kasa wu’ul wo eng karengan e raa’ ne oki-oki’mu se neiymu i sempela wia nisea, ³⁷ e nulit, eng karengan e ni’itu Niaku ku laa merurla em baya se i koupusmu, nyi’a i ti’i se maelur e natemu, le’os se i koupusmu ka’apa tu’u se i kari’irismu; Niaku ku laa meruri nisea waki esa nga kaledongmu kaa laa sumu’usuk nikoo wo Niaku ku laa mongka’la e nauratmu witu en sinaru nea, i ka’ayo sea lumoo’ e minapekasa mekeirangennu. ³⁸ Niaku ku laa makimla nikoo tanu se tou maakimla se wewene-wewene masiwo en zinah wo mato’ala raa’ wo Niaku ku laa tumurusla witu nikoo eng kaupi’an wo en tetayurang-Ku. ³⁹ Niaku ku laa sumarakanla nikoo witu e lawas nea wo nisea se laa rumewala en tampamu kerakek wo tumerila eng kakenturan-kakenturannu, nisea se laa moteiyla nikoo, laa kumaat se lelo’or-lelo’ormu wo mayala nikoo limengat poteiy. ⁴⁰ Nisea se laa rumeo tumo’or se esa nga eruran tou sumaru nikoo, se lumawala nikoo ampit em batu wo sumabouw nikoo ampit en santi-santi nea. ⁴¹ Nisea se laa rumengis em bale-walemu wo meela ukuman wia nikoo witu en sinaru ne kelaker wewene. Ampit en tuana Niaku ku sumiwo nikoo mena’ mesa’amek wo en tetoro sa’amek e reiy’ mouw laa i weemula kasi. ⁴² Tuana mouw Niaku nu tumurusla e nupi’-Ku wia nikoo i ka’ayo en tetayureng-Ku wia nikoo e mompas sumoup; tare mouw Aku medam lompon wo reiy’ mouw rara ate kasi. ⁴³ Eng karengan nikoo koo reiy’ mouw i kaghenang kasi wia e masa mudamu, ta’an ampit em baya nyi’a i yi’i en simiwo Niaku matenggo’ogho’ eng kaupi’an, e nulit, Niaku kangkasi ku laa tumorola eng kalakuannu witu eng kokongmu, tuana mouw e nuwu’ ni EMPUNG Tuhan. Reiy’ ku’a re’en nikoo koo matuanala eng kakewuran i yi’i kasi witu esa nga weka e reiy’ sa mina’asa em pasiwo-siwon – pasiwo-siwonnu kasa wu’ul? ⁴⁴ Loo’on, susur penyair si laa lumila’la en sindiran i yi’i en tanume nikoo: Tuana si ina’, en tuana sioki’! ⁴⁵ Oki’ ni ina’mu nikoo, si mari’iris maloo’ si tu’atuamana wo se oki-oki’na tuama, wo tuari ne kaka’-kaka’mu wewene nikoo, se mari’iris maloo’ se tu’atuama-tu’atuama nea wo se oki-oki’ nea tuama. Ina’mu nyi’a mouw sitou eng Heti wo si ama’mu nyi’a mouw sitou Amori. ⁴⁶ Si kaka’mu kasa tu’a nyi’a mouw si Samaria, nisia ma’an se oki-oki’na wewene se maena’ waki esa nga weka amiannu, wo si kaka’mu kasa muda nyi’a mouw si Sodom, nisia ma’an se oki-okina wewene se maena’ waki esa nga weka timumu. ⁴⁷ Reiy’ ku’a re’en nikoo koo matou-tou maki’it em pasiwo-siwon nea wo nikoo koo matuanala tanu em pasiwo-siwon – pasiwo-siwon nea kasa wu’ul; sabantar i te kasi koo sumiwo e lebe lewo’ ta’an nisea witu e minapekasa em patou-touannu. ⁴⁸ Demi Niaku si matou-tou, tuana mouw e nuwu’ ni EMPUNG Tuhan, eng kauli-ulitna ni Sodom, kaka’mu kasa muda ma’an se oki-oki’na wewene se reiy’ masiwo tanu en tinuanamula ma’an se oki-oki’mu wewene. ⁴⁹ Loo’on, Nyi’i mouw eng kaselokan ni Sodom, kaka’mu kasa muda i ti’i: katingkeiyan, kekaanen meloko-lokon wo eng kasenaangan matou-tou em bia nisia wo witu se oki-oki’na wewene, ta’an nisia si reiy’ tumulung se tou-tou peme’itan wo miskin. ⁵⁰ Nisea se minamuali rakek ate wo matuanala eng kasa wu’ul witu en sinaru-Ku; Takar Niaku ku mina’akatla nisea nu reiy’ mouw Niaku nu limoo’ e ni’itu. ⁵¹ Wo si Samaria si reiy’ simiwo esa nga parua tu’u waki dosa-dosamu, awes tare nikoo koo timunala e lebe laker kasa wu’ul ta’an nisea nu rua, i ka’ayo ampit e reiy’ sa mina’asa eng kawu’ulan-kawu’ulannu en tinuanamula, nikoo koo simiwo se kaka’-kaka’mu wewene paloo’ola ulit. ⁵² Tanggongenouw en seringmu, heiy nikoo, si minua’la e nukuman lebe wure’ wia se kaka’-kaka’mu wewene; ampit en dosa-dosamu lebe kasa wu’ul ta’an nisea, nisea se lebe ulit ta’an nikoo. Ma’anouw koo medam meirang wo tanggongenouw en seringmu, eng karengan nikoo koo simiwo se kaka’-kaka’mu wewene paloo’ola ulit.” ⁵³ “Ta’an Niaku ku laa sumegaya’la eng ka’ada’an nea, le’os eng ka’ada’an ni Sodom ma’an se oki-oki’na wewene ka’apa tu’u eng ka’ada’an ni Samaria ma’an se oki-oki’na wewene, wo kangkasi Niaku ku laa sumegaya’la eng ka’ada’annu witu eng keuneran nea, ⁵⁴ rio koo tumanggong en seringmu wo rio koo medam meirang karengan e reiy’ sa mina’asa em pasiwo-siwonnu, i ka’ayo koo mamuali pangiboran i wee nisea. ⁵⁵ En tanume se kaka’-kaka’mu, Sodom ma’an se oki-oki’na wewene se laa segaya’en witu eng ka’ada’anna kasa ketare; Samaria kangkasi ma’an se oki-oki’na wewene se laa segaya’en witu eng ka’ada’anna kasa ketare; wo nikoo tu’un ma’an se oki-oki’mu wewene kouw laa segaya’en witu eng ka’ada’an kasa ketare. ⁵⁶ Reiy’ ku’a re’en si Sodom, kaka’mu kasa muda, si minamuali wu’ana en sumpingmu witu e masa katingkeiyannu, ⁵⁷ nu reiy’pe’ eng kalewo’annu minamuali pakaloo’o-loo’ola, tanu wia e nedo i yi’i koo sineringla ne oki-oki’ wewene ne Edom ampit em baya se witu esa nga kaledongna wo se oki-oki’ wewene ne Filistin, se masero’ nikoo waki esa nga kaledongmu? ⁵⁸ Kakewurannu wo em pasiwo-siwon – pasiwo-siwonnu kasa wu’ul e lewo’ sa reiy’ tanggongennu, tuana mouw e nuwu’ ni TUHAN. ⁵⁹ Karengan en teinti’i mouw e nuwu’ ni EMPUNG Tuhan: Niaku ku laa tumuanala wia nikoo tanu em patuanannula, nyi’a i ti’i nikoo koo mapokeiyla wure’ witu en tiwa’ ampit makelongla en teta’aran. ⁶⁰ Ta’an Niaku ku laa ghumenang en teta’arang-Ku ampit nikoo witu e masa mudamu wo Niaku ku laa tume’etepla i wee nikoo en teta’aran ke’ekel. ⁶¹ Tare mouw koo i kaghenang wia eng kalakuannu wo koo medam meirang, witu e nedo Niaku nu medo se kaka’-kaka’mu, le’os si kasa tu’a ka’apa tu’u si kasa muda, wo meela nisea wia nikoo mamuali oki’mu, ta’an e reiy’ timo’otolela nikoo nu timiboiy en teta’aran. ⁶² Niaku ku laa tume’etepla en teta’arang-Ku ampit nikoo, wo nikoo koo laa mamete’ula kaa Niaku mouw ku TUHAN, ⁶³ wo ampit e ni’itu nikoo koo laa i kaghena-ghenang eng ketareanna wo medam meirang, i ka’ayo en sumamu ni’i kalikep kasa karengan en seringmu, e nedo Niaku nu sumiwola pedamean i wee nikoo karengan e reiy’ sa mina’asa em pasiwo-siwonnu, tuana mouw e nuwu’ ni EMPUNG Tuhan.”