¹ Laa o meiy mouw e nuwu’ ni TUHAN wia niaku: ² “Heiy oki’ ni tou, sapa ku’a re’en eng kalebean eng kayu anggor waki em baya eng kayu em bu’ana en tanu e nanggor timou witu nelet eng kayu-kayu waki talun? ³ Sapa ku’a re’en sitou si medo eng kayuna kaa laa sumiwomi wo’o sapa waki nisia kaa laa mesesangkongla e reiy’ sa mina’asa pakakas wia nisia? ⁴ E nulit, eng kayu i ti’i ni’i lawala witu eng gorem e napi kaa laa tunun; e rua tempokna e mina’apu kinaan e napi wo eng keuneranna eng kasuatan melayas, makaka’ara’ane’ kasi ku’a re’en e ni’itu kaa laa sumiwo e wo’o sapa? ⁵ Loo’on, sedangkan e nedo nisia nu lekepe’, si reiy’ pinake i wee e wo’o sapa, sapape’ kasi nisia nu kinaanola e napi wo minarengis; sapa ku’a re’en en torope’ kasi paken i wee e wo’o sapa? ⁶ Eng karengan e ni’itu en teinti’i mouw e nuwu’ ni EMPUNG Tuhan: Tanu eng kayu anggor waki elet eng kayu-kayu waki talun, e neiy-Ku i lawala witu eng gorem e napi kaa laa tunun, en tuana mouw Niaku tumuanala witu se penduduk Yerusalem. ⁷ Niaku nuesa ku laa mero nisea. Ma’anouw tu’u sea i kaliseiyi waki api, ta’an e napi e laa kumaan nisea. Wo nikouw kouw laa mamete’ula kaa Niaku mouw ku TUHAN, witu e nedo Niaku nu mero nisea ⁸ wo Niaku ku sumiwola em banua i ti’i malulu mapenes, eng karengan nisea se minaroba lale’, tuana mouw e nuwu’ ni EMPUNG Tuhan.”