¹ Eng kaulitna, em baya nyi’a i yi’i e wineeangku mola ghenang, em baya nyi’a i yi’i en sinoisapku mola, nyi’a i yi’i kaa se tou-tou ulit wo se tou-tou makahikmat wo em pasiwo-siwon – pasiwo-siwon nea, le’os e nupus ka’apa eng kari’irisan, em bitu e lawas ni Empung; sitou si reiy’ mete’ula sapa tu’u em pesarunnala. ² E reiy’ sa mina’asa wo’o sapa e masuat i wee se pakasana; nasib ne tou e masuat: le’os se tou ulit ka’apa tu’u se tou fasik, se tou le’os ka’apa tu’u se tou lewo’, se tou lenas ka’apa tu’u se tou seremor, se tou minapasempela en tetule ka’apa tu’u se reiy’ minapasempela tetule. Tanu eng kumura sitou le’os, en tuanakan kangkasi sitou makadosa; tanu eng kumura sitou nu timiwa’ en tuanakan kangkasi sitou meide’ kaa laa metetiwa’. ³ Nyi’i mouw en cilaka witu e reiy’ sa mina’asa wo’o sapa e minamuali witu e wawa’ ni endo; nasib em baya ne tou e masuat. Nate ne oki-oki’ ni tou tu’u e wuta ampit eng kalewo’an, wo eng keba’abalan em bitu eng gorem e nate nea esa nga umur em patou-touan, wo eng kamurian sea tumuyume e alam ne tou minate. ⁴ Ta’an seiy si neiy i kaghorem tou matou-tou si makapunya arapan, karengan si asu matou-tou si lebe le’os ta’an si singa minate. ⁵ Karengan se tou-tou matou-tou se mete’u kaa nisea se laa mate, ta’an se tou minate se reiy’ mete’u en sapa-sapa, e reiy’ mola kasi tetoro i wee nisea, awes tare eng genangan wia nisea e minere’i mouw. ⁶ Le’os e nupus nea, ka’apa tu’u eng kari’irisan wo eng katetayuren nea e nure mouw limiong, wo i wee eng keure-urena e reiy’ mola kasi e weteng nea witu e reiy’ sa mina’asa wo’o sapa e minamuali witu e wawa’ ni endo. ⁷ Meiy, kaanenouw e rotimu ampit e mepa’a-pa’ar, wo koo’onouw e nanggormu ampit e nate senaang, karengan si Empung si ure mouw minepa’arla em pasiwo-siwonnu. ⁸ Ma’anouw minena-ena’ puti’ e labungmu wo te’a o reiy’la lana witu eng kokongmu. ⁹ Keipianouw em patou-touan ampit si tu’awewene i koupusmula esa nga umur em patou-touannu e reiy’ sipenoron, neiy i karuniala ni TUHAN wia nikoo witu e wawa’ ni endo, karengan e ni’itu mouw e naruiymu witu em patou-touan wo witu em pe’inakutan em patuanannula ampit e rawoiy o wedu witu e wawa’ ni endo. ¹⁰ E reiy’ sa mina’asa wo’o sapa e niatola lawasmu kaa laa pepepa’ayangen, pa’ayangenola ni’itu esa nga kaente’an eng keter, karengan e reiy’la pepa’ayangen, wo em pemili-milingen, en tine’u wo eng hikmat witu eng kaoatan ne tou minate, waki wisa nikoo nu laa mea. ¹¹ O kasi niaku ku limoo’ witu e wawa’ ni endo kaa eng kamenangan palowa’an e reiy’ i wee si repet, wo eng ka’unggulan pe’inakuten e reiy’ i wee si ente’, o kangkasi e roti e reiy’ i wee si makahikmat, eng kakaya’an e reiy’ i wee si pande, wo eng karunia e reiy’ i wee si kasa lali’iket, karengan e nedo wo e nasib em pe’anen nea nu waya. ¹² Karengan sitou si reiy’ mete’ula e nedona. Tanu si sera’ kinasikopan witu e lelobo’ makacilakan, wo tanu si wara kinasikopan witu em pure’eket, en tuana mouw se oki-oki’ ni tou se kinapure’eketan witu e nedo neiy i kabelot, sa eng kapualitan i ti’i en tumoro nisea eng kenaramen limo’osit i te. ¹³ Eng kapualitan i yi’i kangkasi e linoo’oku tanu eng hikmat witu e wawa’ ni endo wo em paloo’ola wangko’ i wee niaku; ¹⁴ wawean e nesa kota rintek, pendudukna se reiy’ takura; siesa raja wangko’ si rimego, kimepung nyi’a wo rumedeiyla em beton-beton pakepungan sela witu nisia; ¹⁵ witu eng kina’atoan siesa tou miskin si makahikmat, ampit eng hikmatna nisia si limawirla eng kota i ti’i, ta’an e reiy’la sitou si ghimenang sitou miskin i ti’i. ¹⁶ Pokeiyku: “Hikmat e lebe le’os ta’an eng kewaraneiyan, ta’an eng hikmat ne tou miskin en sinero’an wo e lelila’anna e reiy’ lininga ne tou.” ¹⁷ Lelila’an ne tou makahikmat e lininga ampit eng kalompon, e lebe le’os ta’an e rekeiyan ni tou makakuasa witu e nelet ne tou we’engel. ¹⁸ Hikmat e lebe le’os ta’an em pakakas-pakakas seseke’, ta’an si esa tou wiles si toro tumerila laker eng kapualitan e le’os.