¹ Seiy ku’a re’en si tanu sitou makahikmat? Wo seiy ku’a re’en si mete’ula eng keterangan susur em perkara? Hikmat ni tou en simiwola eng giona simena’ wo maroba mouw eng kaketean eng giona. ² Lale’enola em perenta ni raja demi en tiwa’mu wia si Empung. ³ Te’a mouw mario-rior rumou’mi waki sinaruna, te’a mouw metaang witu em perkara e lewo’, karengan sia si masiwo sapa ni’i kepa’arnala. ⁴ Karengan en titah ni raja e makakuasa; seiy ku’a re’en si laa lumila’la wia nisia: “Sapa ku’a re’en em pasiwon ni baginda?” ⁵ Seiy si melale’la em perenta si reiy’ laa me’anla em perkara makacilakan, wo e nate ni tou makahikmat e mamete’ula e nedo paadilan, ⁶ karengan i wee e reiy’ sa mina’asa wo’o sapa wawean e nedo paadilan, wo eng kalewo’an ni tou e meubel en touna. ⁷ Eng kaulitna, nisia si reiy’ mamete’ula sapa e laa mamuali, karengan seiy ku’a re’en si laa lumila’la wia nisia kumura i tu laa mamuali? ⁸ E reiy’la siesa tou tu’u si makakuasa tumaang e reghes wo e reiy’ siesa tou tu’u si makakuasa witu e nendo kepepate. E reiy’la paasengan witu em paseke’an, wo eng kefasikan e reiy’ mewayala sitou tumuanala nyi’a. ⁹ Em baya nyi’a i yi’i e linoo’oku mola wo niaku ku minee ghenang wia e reiy’ sa mina’asa em pasiwo-siwon en tinuanala witu e wawa’ ni endo, eng katoroan sitou esa si makuasala se tou walina i ka’ayo sia macilaka. ¹⁰ Niaku ku limoo’o kangkasi se tou-tou fasik se laa i pekekuburla se toro ghumorem, kasuatan se tou mawinta’ e nulit se lewo’ sa reiy’ rumeu’mi waki tampa kudus wo liurela witu eng kota. E nyi’i tu’u e reiy’ sipenoron. ¹¹ Eng karengan e nukuman witu em pasiwo-siwon lewo’ e reiy’ minakarengan tinuanala, takar e nate ni tou minawuta eng kepa’aran kaa laa mesesiwo lewo’. ¹² Ma’anouw tu’u sitou makadosa wo si masiwo lewo’ si maka esa nga atus tumou ure, ta’anouw eng kete’uangku, kaa sitou meide’la si Empung si laa maka’ato eng ka’aruiyan, karengan nisea se meide’ witu eng hadirat-Na. ¹³ Ta’an se tou fasik se reiy’ laa maka’ato eng ka’aruiyan wo tanu eng kumalenoan-kumalenoan sia si reiy’ laa labot e numur, karengan nisia si reiy’ meide’ witu eng hadirat ni Empung. ¹⁴ Wawean e nesa reiy’ sipenoronna e minamuali wia natas em bumi: wawean se tou-tou ulit, se minaka’ato sesu’i e waar i wee em pasiwo-siwon ne tou fasik, wo wawean se tou-tou fasik se minaka’ato e wua’na em pasiwo-siwon le’os e waar i wee em pasiwo-siwon ne tou ulit. Niaku ku limila’: “E nyi’i tu’u e reiy’ sipenoron!” ¹⁵ Eng karengan e ni’itu niaku ku malo’or eng kepa’aran, karengan e reiy’la ka’aruiyan walina i wee sitou witu e wawa’ ni endo, reiy’ si walina eng kumaan wo eng kumoo’ wo e mepa’a-pa’ar. Ni’itu e merapitla nisia witu e rawoiy o weduna esa nga umur em patou-touanna neiy i weela ni Empung wia nisia witu e wawa’ ni endo. ¹⁶ Katoroan niaku nu minee eng genangku kaa laa makasilighla eng hikmat wo limoo’ eng kalingkama’an tinuanala ne tou wia eng kaoatan reiy’ ampit e melelea oat o wengi, ¹⁷ takar em pakaloo’o-loo’onola wia niaku, kaa sitou si reiy’ mete’u me’untepela e reiy’ sa mina’asa em pepa’ayangen ni Empung, en tinuana-Nala witu e wawa’ ni endo. Kumura tu’u kangkasi sitou memedu-medu menero nyi’a, nisia si reiy’ laa me’untepela nyi’a. Ma’anouw tu’u sitou makahikmat si lumila’la, kaa nisia si mete’ula nyi’a, ta’anouw nisia si reiy’ mete’u me’untepla nyi’a.