¹ E ngaran kasa kasinou’an e lebe le’os ta’an e lana kemaal, wo e nendo kepepate e lebe le’os ta’an e nendo kinatouan. ² Mea waki wale sinuat e lebe le’os ta’an e mea waki wale pelesir, karengan waki wale sinuatouw eng kinesampetan ne susur tou; satorona se tou matou-tou se meela ghenang nyi’a. ³ Tumekur e lebe le’os ta’an eng kume’eke’, karengan eng gio tedur en sumiwo e nate mapenas. ⁴ Sitou makahikmat si senaang witu em bale sinuat, ta’an sitou we’engel si senaang witu e wale tampa mepa’a-pa’ar. ⁵ Luminga e rekakan ne tou makahikmat e lebe le’os ta’an luminga eng kekantaren ne tou we’engel. ⁶ Karengan tanu e legu’an en tetune marengis witu e wawa’ eng kure’, tuana mouw eng ke’eke’an ne tou we’engel, E nyi’i tu’u e reiy’ sipenoron. ⁷ Nulit, em paperasan e mawe’engelela se tou makahikmat, wo e loit wewoko’ e materila e nate. ⁸ Kawus e nesa kapualitan e lebe le’os ta’an eng kinetareani nyi’a. Labot sabaar e lebe le’os ta’an e rakek ate. ⁹ Te’a mouw mario-rior meupi’ witu e nate, karengan e nupi e maena’ witu em be’ewer ne tou we’engel. ¹⁰ Te’a mouw meila’la: “Ka’a en zaman ketareanna e lebe le’os ta’an en zaman en teakan?” Karengan e reiy’ ampit timo’otolela witu eng hikmat koo mawueiyela eng kapualitan iti’i. ¹¹ Hikmat nyi’a mouw e masuat eng kale’osna ampit e warisan wo en tanula e nesa kamang i wee se tou-tou maloo’ siendo. ¹² Karengan em paterungan eng hikmat nyi’a mouw en tanu em paterungan e loit. Wo kinamangouw si mamete’ula kaa eng hikmat e mapiara em patou-touan ne makapunya-makapunya nyi’a. ¹³ Weeanola ghenang em pepa’ayangen ni Empung! Seiy ku’a re’en si toro tumerenla sapa e rineko’-Na mola? ¹⁴ Witu e nendo kinamang lumaya-laya’ mouw, ta’an witu e nendo i kabelot ghenangenouw, kaa e nendo neiy i kabelot i yi’i tu’u en siniwola ni Empung tanukan kangkasi e nendo kinamang, rio sitou si reiy’ mete’u matola e wo’o sapa tanume e masa reriorna. ¹⁵ Witu em petou-touangku e reiy’ sipenoron niaku ku limoo’o mola e reiy’ sa mina’asa eng kapualitan i yi’i: wawean sitou lale’ si minapuneng witu eng kelale’anna, wawean sitou fasik si timou ure witu eng kalewo’anna. ¹⁶ Te’a mouw taleus lale’, te’a mouw eng kapawinta-winta’mu en taleus makahikmat; ka’a koo laa mepepunengla en toumu nuesa? ¹⁷ Te’a mouw taleus fasik, te’a mouw e we’engel! Ka’a koo pa’ar mate nu reiy’pe e nedomu? ¹⁸ E lebe le’os sa koo tumiboiy e nesa, o kangkasi reiy’ mayala em balina, karengan sitou meide’la si Empung si’i kaliseiyi waki marua-rua nyi’a. ¹⁹ Hikmat e mawee wia si makapunyala nyi’a e lebe laker kaente’an ta’an se mapulu’ makua-kuasa witu eng kota. ²⁰ Eng kaulitna, wia em bumi e rereiy’la sitou lale’: si masiwo le’os wo si reiy’ ma’an mekasa sumiwo en dosa! ²¹ O kangkasi te’a meweweela ghenang e reiy’ sa mina’asa lelila’an neiy i totorla ne tou, rio koo reiy’ luminga si palayanmu kumutokla nikoo. ²² Karengan e natemu e mete’u kaa nikoo kangkasi koo minakapira mola kimutokla se tou-tou walina. Pekeki’itan eng hikmat e mekeraran nate ²³ Em baya nyi’a i yi’i e niuji ku mola kaa laa ma’ayola eng hikmat. Pokeiyku: “Niaku ku laa ma’edo eng hikmat,” ta’an eng hikmat i ti’i e wa’akat wia niaku. ²⁴ Sapa em bia, ni’itu e wa’akat wo e rarem, eng kasa rarem, seiy si toro matola nyi’a? ²⁵ Niaku ku timuyula eng genangku kaa laa makasilighla, sumoisapla, wo sumero eng hikmat wo eng katenggolan, ma’an laa mamete’ula kaa eng kefasikan i ti’i eng kawe’engelan wo eng keba’abalan i ti’i eng kaseperengan. ²⁶ Wo niaku ku minatola e nesa lebe pe’it ta’an e maut: wewene nyi’a mouw se pure’eket, e natena nyi’a mouw em be’etes wo e lawasna nyi’a mouw en torongku. Sitou si’i kepa’arla ni Empung si neiy i kaliseiyi witu nyi’a, ta’an sitou makadosa si sikopen nyi’a. ²⁷ Loo’onouw, e nyi’i e niatokula, pokeiy ni Pengkhotbah: Kasuatan ma’esala e nesa ampit em balina kaa laa maka’ato kawu’utulan, ²⁸ em penerongkupe’ ta’an e reiy’ niatokula, niatokula siesa tuama witu e nelet ne esa nga riwu, ta’an ku reiy’ minatola siesa wewene witu e nelet nea. ²⁹ Loo’onouw, e nyi’i i te e niatokula: kaa si Empung si simiwo mola sitou redeiy, ta’an nisea se menero laker e li’ikur.