¹ Wawean e nesa kabelotan e linoo’oku mola witu e wawa’ ni endo, eng kasa meubel sitou: ² sitou si kinaruniala ni Empung eng kakaya’an, harta benda wo eng kamulia’an, i ka’ayo sia reiy’ sikakurangan wo’o sapa tu’u ni’i kepa’arnala, ta’an sitou i ti’i si reiy’ kinaruniala ni Empung eng kuasa kaa laa kumeipila nyi’a, ta’an i te se tou walina se makeipila nyi’a! Nyi’i mouw e reiy’ sipenoron wo em peme’itan e pe’it. ³ Sa sitou si maka’ato se esa nga atus oki’ wo tumou ure i ka’ayo ma’ayola e numur pinekelawir, ta’an nisia si reiy’ mateu-teula ampit eng kasenaangan, awes tare si reiy’ minaka’ato pekekuburan, em pokeiyku, sioki’ rima’aragh si lebe le’os ta’an sitou i yi’i. ⁴ Karengan sioki’ rima’aragh i ti’i si mineiy witu e reiy’ sipenoron wo minea witu eng kareiydeman, wo e ngaranna em pinenetla eng kareiydeman. ⁵ Awes kangkasi nisia si reiy’ limoo’ si endo wo reiy’ minete’ula sapa-sapa. Nisia si lebe lener ta’an sitou eng ketare. ⁶ Ma’anouw tu’u sia tumou makarua esa nga riwu nge te’un, sa sia reiy’ makeipila eng kasenaangan: e reiy’ ku’a re’en e reiy’ sa mina’asa wo’o sapa e matorome e nesa tampa? ⁷ E reiy’ sa mina’asa e rawoiy o wedu ni tou nyi’a mouw ni’i wee en sumana, ta’anouw eng kepa’aranna e reiy’ kinateu-teuala. ⁸ Karengan sapa ku’a re’en eng kalebean ni tou makahikmat ta’an sitou we’engel? Sapa ku’a re’en eng kalebean ni tou miskin si sigha’ mawinta-winta’ witu en sinaru ne tou? ⁹ Lebe le’os e maloo’ i tela ta’an maki’itela en serit. E nyi’i tu’u e reiy’ sipenoron wo meinakut mepepure’eket e reghes. ¹⁰ Sapa tu’u em bia, e nure mouw tinotor e ngaranna. Wo kinakete’uanola seiy sitou, nyi’a i ti’i kaa nisia si reiy’ mete’u sumiwola perkara ampit si lebe ente’ ta’an nisia. ¹¹ Karengan mekelakerla e lelila’an-lelila’an, mekelakerla e reiy’ sipenoron. Sapa ku’a re’en eng ka’ara’anna i wee sitou? ¹² Karengan seiy ku’a re’en si mamete’ula sapa e le’os i wee sitou kelabotan e nedo potot waki patou-touanna e reiy’sipenoron, eng kinelangna tanu eng kumalenoan? Seiy ku’a re’en si toro lumila’la wia sitou sapa e laa mamuali witu e wawa’ ni endo nu reiy’ mouw nisia? ¹¹ Karengan mekelakerla e lelila’an-lelila’an, mekelakerla e reiy’ sipenoron. Sapa ku’a re’en eng ka’ara’anna i wee sitou? ¹² Karengan seiy ku’a re’en si mamete’ula sapa e le’os i wee sitou kelabotan e nedo potot waki patou-touanna e reiy’sipenoron, eng kinelangna tanu eng kumalenoan? Seiy ku’a re’en si toro lumila’la wia sitou sapa e laa mamuali witu e wawa’ ni endo nu reiy’ mouw nisia?