¹ I wee e reiy’ sa mina’asa wo’o sapa wawean e masana, i wee en sapa tu’u wia e wawa’ e langit e wawean e nedona. ² wawean e nedo kaa laa tumou, wawean e nedo kaa laa tumayan, wawean e nedo kaa laa tumanem, wawean e nedo kaa laa sumawut neiy i tanem; ³ wawean e nedo kaa laa munu’, wawean e nedo kaa laa lume’osela; wawean e nedo kaa laa rumobe’, wawean e nedo kaa laa mebangun; ⁴ wawean e nedo kaa laa mame’, wawean e nedo kaa laa kume’eke’; wawean e nedo kaa laa ma’arip; wawean e nedo kaa laa ma’engket; ⁵ wawean e nedo kaa laa tumea’ watu, wawean e nedo kaa laa merurla watu; wawean e nedo kaa laa rumawak, wawean e nedo kaa laa tumaang en tou waki mererawak; ⁶ wawean e nedo kaa laa sumero, wawean e nedo kaa laa mayala marugi; wawean e nedo kaa laa tumu’utul, wawean e nedo kaa laa tumerek; ⁷ wawean e nedo kaa laa kumisi’, wawean e nedo kaa laa milit; wawean e nedo kaa laa makapenes en tou, wawean e nedo kaa laa sumusuiy; ⁸ wawean e nedo kaa laa meupusla, wawean e nedo kaa laa rumi’iris; wawean e nedo kaa laa sumeke’, wawean e nedo kaa laa dumame. ⁹ Sapa ku’a re’en eng kamang ni memema’ayang waki pina’ayangnala ampit e rimawoiy minedu? ¹⁰ Niaku ku limoo’o mola em pepa’ayangen neiy i weela ni Empung wia se oki-oki’ ni tou kaa laa mewewedula en touna. ¹¹ Sia si simiwo e reiy’ sa mina’asa wo’o sapa e wangun witu e nedona, awes tare Nisia si mineela kake’ekelan witu e nate nea. Ta’an sitou si reiy’ mete’u me’untepla em pepa’ayangen tinuanala ni Empung waki ketareani i ka’ayo kimawus. ¹² Niaku ku mete’u kaa i wee nisea e reiy’la e lebe le’os ta’an e mepa’a-pa’ar wo makeipila eng kasenaangan witu em patou-touan nea. ¹³ Wo kaa susur tou se toro kumaan, kumoo’ wo makeipila eng kasenaangan witu e reiy’ sa mina’asa e rinawoiy wineduanna, ni’itu kangkasi nyi’a mouw en tetaber ni Empung. ¹⁴ Niaku ku mete’u kaa e reiy’ sa mina’asa wo’o sapa en tinuanala ni Empung e laa minena-ena’ wia i wee eng keurena; ni’itu e reiy’ mete’u awesan wo e reiy’ mete’u rou’ani; Empung si simiwo en tuana, rio sitou si meide’la Nisia. ¹⁵ En teakan em bia eng ketareanna em bia mouw, wo e laa wia e nure mouw wia; wo si Empung si masero e limangkoiy mola. Kareiy’adilan witu em patou-touan ¹⁶ Wawean kasi e linoo’oku witu e wawa’ ni endo: witu en tampa paadilan, e witu tu’u eng kina’atoan eng kareiy’adilan, wo witu en tampa pa’adilan, e witu tu’u eng kina’atoan eng kareiy’adilan. ¹⁷ Lumila’ mouw niaku witu e nate: “Empung si laa madilela le’os sitou ulit ka’apa tu’u se reiy’ adil, karengan i wee e reiy’ sa mina’asa kapualitan wo e reiy’ sa mina’asa pepa’ayangen wawean e nedona.” ¹⁸ En tanume se oki-oki’ ni tou niaku ku limila’ witu e nate: “Empung si laa me’uji nisea wo mapa’atola wia nisea kaa nisea se tekapen i te.” ¹⁹ Karengan e nasib ni tou nyi’a mouw e masuat ampit e nasib ni tekapen, e nasib masuat en tumoro nisea; tanu eng kumura siesa si mate, tuanakan kangkasi se walina. Marua-ruana se makapunya e nasengan masuat, wo sitou si reiy’ makapunyala kalebean witu si tekapen, karengan e reiy’ sa mina’asa wo’o sapa nyi’a mouw e reiy’ sipenoron. ²⁰ Marua-ruana se matorome e nesa tampa; marua-ruana se minamualimi waki riawu wo marua-ruana se mareng wia e riawu. ²¹ Seiy ku’are’en si mamete’ula, sapa ku’a re’en e nasengan ni tou e lumongkot matas wo e nasengan ni tekapen en tumumpa mea waki wawa’ em bumi. ²² Niaku ku limoo’ kaa e reiy’la e lebe le’os i wee sitou ta’an e lumaya-laya’ witu em pepa’ayangenna, karengan e ni’itu nyi’a mouw em betengna. Karengan seiy si laa mapa’atola wia nisia sapa e laa mamuali nu reiy’ mouw nisia?