¹ Niaku ku limila’ witu e nate: “Meiy, niaku ku laa me’uji eng kelaya-laya’an! Keipianola eng kasenaangan! Ta’an loo’on, o kangkasi e ni’itu tu’u e reiy’ sipenoron.” ² Tanume eng ke’eke’ niaku ku limila’: “Ni’itu e we’engel!”, wo en tanume eng kelaya-laya’an: “Sapa eng ka’ara’anna?” ³ Niaku ku masoisapla en touku ampit e masegaya’la e nouwakeku ampit e nanggor, – kasuatan e akal budiku en tataap ma’aka-aka ampit eng hikmat –, wo ampit e maka’to keba’abalan, i ka’ayo aku mamete’ula sapa e le’os i wee se oki-oki’ ni tou kaa laa tuananla wia wawa’ e langit eng keurean em patou-touan nea em potot i ti’i. ⁴ Niaku ku matuanala em pepa’ayangen-pepa’ayangen wangko’, maredeiyla i wee niaku em bale-wale, metanemla i wee niaku e numa-uma anggor; ⁵ niaku ku mame’inakutla i wee niaku e numa-uma wo en taman-taman, wo tumanemla nyi’a ampit e minegheghioan nakana em bu’a-wu’ana; ⁶ niaku ku kimiar i wee niaku em pusung-pusung kaa laa mereranomi waki witula en tanemen e nakana-nakana sobor. ⁷ Niaku ku timeles se budak-budak tuama wo wewene, wo wawean se budak minatou witu em baleku; niaku ku makapunya kangkasi kelaker se sapi wo membe’ domba lumantouwla si seiy tu’u si mekasa mouw tumou waki Yerusalem nu reiy’pe niaku. ⁸ Niaku ku maerurla i wee niaku kangkasi em perak wo e mas, eng harta benda ne raja-raja wo ne daerah-daerah. Niaku ku masero i wee niaku se kumekantar-kumekantar tuama wo se kumekantar-kumekantar wewene, wo masenaangla se oki-oki’ ni tou, nyi’a i yi’i laker gundik. ⁹ Ampit en tuana niaku ku minewangko’, awes tare e lebe wangko’ ta’an si seiy tu’u si mekasa mouw tumou waki Yerusalem nu reiy’pe’ niaku; witu e ni’itu eng hikmatku e minena’ tataap wia niaku. ¹⁰ Niaku ku reiy’ masemperla em berenku waki sapa tu’u ni’i kepa’arnala, wo niaku ku reiy’ metaang e nateku waki e mepa’a-pa’ar sapa tu’u, karengan e nateku e mepa’a-pa’ar karengan e reiy’ sa mina’asa e rinawoiy wineduangku. Ni’itu mouw em bu’ana e reiy’ sa mina’asa e rinawoiy wineduangku. ¹¹ Eng katoroan niaku nu simoisap e reiy’ sa mina’asa em pepa’ayangen en tinuana mola e lawasku wo e reiy’ sa mina’asa em pe’inakuten en tinuanaku mola i wee e ni’itu ampit e rinawoiy wineduan, loo’onouw, e reiy’ sa mina’asa wo’o sapa nyi’a mouw e reiy’ sipenoron wo me’inakut mepepure’eket e reghes; memang e reiy’la sikamang witu e wawa’ ni endo. ¹² Laa o ku lumenge kaa laa meleloo’me eng hikmat, kawe’engelan wo eng keba’abalan, karengan sapa e laa tuananla ni tou si sumawelela si raja? Sapa i te en tinuana mola ni tou. ¹³ Wo niaku ku limoo’ kaa eng hikmat e limantouwla eng kawe’engelan, tanu en terang limantouwla eng kareiydeman. ¹⁴ Em beren ne tou makahikmat em bitu eng kokongna, kasuatan se tou we’engel se makelang witu eng kareiydeman, ta’an niaku ku mete’u kangkasi kaa e nasib masuat en timoro nisea nu waya. ¹⁵ Takar niaku ku limila’ witu e nate: “E nasib en timoro se tou we’engel kangkasi e laa tumoro niaku. I wee en sapa niaku i yi’i eng ketareanna ku tuana makahikmat?” Laa o ku lumila’ witu e nate , kaa e nyi’i tu’un e reiy’ sipenoron. ¹⁶ Karengan e reiy’la gena-ghenangan eng ke’ekel e le’os waki sitou makahikmat, ka’apa tu’u waki sitou we’engel, karengan witu e nendo-nendo laa meiy em baya nyi’a e nure mouw liniurla. Wo, oh, sitou makahikmat si mate kangkasi tanu sitou we’engel! ¹⁷ Eng karengan e ni’itu niaku ku mari’iris em patou-touan, karengan niaku ku mapokeiyla e masusala sapa en tinuanala witu e wawa’ ni endo, karengan e reiy’ sa mina’asa wo’o sapa nyi’a mouw e reiy’ sipenoron wo me’inakut mepepure’eket e reghes. ¹⁸ Niaku ku mari’iris e reiy’ sa mina’asa em pe’inakuten en tinuanakula ampit e rawoiy o wedu witu e wawa’ ni endo, karengan niaku ku lewo’ sa reiy’ tumele’ula nyi’a wia se tou se meiy nu reiy’ mouw niaku. ¹⁹ Wo seiy ku’a re’en si mete’ula sapa ku’a re’en sitou i ti’i si makahikmat ka’apa we’engel? Ma’anouw tu’u tuana nisia si laa makakuasa witu e reiy’ sa mina’asa em pe’inakuten en tinuanakula witu e wawa’ ni endo ampit e rawoiy o wedu wo ampit e minapaka’arala eng hikmat. E nyi’i tu’u e reiy’ sipenoron. ²⁰ Ampit en tuana niaku ku muleiy mouw reiy’ siarapan witu e reiy’ sa mina’asa em pe’inakuten en tinuanakula ampit e rawoiy o wedu witu e wawa’ ni endo. ²² Sapa ku’a re’en eng ka’ara’anna eng kina’atoani ni tou waki e reiy’ sa mina’asa em pe’inakuten en tinuananala ampit e rawoiy o wedu witu e wawa’ ni endo wo waki kepa’aran e natena? ²³ Minapekasa em patou-touanna e wuta eng kasusa’an e nate, awes tare witu e nendo wengi e natena e reiy’ lener, E nyi’i tu’u e reiy’ sipenoron. ²⁴ Reiy’la e lebe le’os i wee sitou ta’an i te eng kumaan wo kumoo’ wo masenaa-senaang witu e rawoiy o weduna. Niaku ku minawena’asla kaa e nyi’i tu’u e waki lawas ni Empung. ²⁵ Karengan seiy si toro kumaan wo me’anla eng kasedaapan witu e luar Nisia? ²⁶ Karengan wia sitou si’i kepa’ar-Na Sia si kumaruniala eng hikmat, tine’u wo eng kepa’aran, ta’an se tou makadosa se linukar-Nala kaa laa merur wo tumawun e wo’o sapa eng kamurian e lewo’ sa reiy’ i weenala wia sitou i kinepa’aran ni Empung. E nyi’i tu’u e reiy’ sipenoron wo me’inakut mepepure’eket e reghes.