¹ Nyi’i mouw e lelila’an ni Pengkhotbah, oki’ ni Daud, raja waki Yerusalem. ² E reiy’ sipenoron waya, pokeiy ni Pengkhotbah, e reiy’ sipenoron waya, e reiy’ sa mina’asa wo’o sapa nyia’ mouw e reiy’ sipenoron. ³ Sapa ku’a re’en eng ka’aranna sitou mame’inakut ampit em bedu o rawoiy witu e wawa’ ni endo? ⁴ Se see’ esa se mea wo se see’ walina se meiy, ta’an em bumi e minena-ena’ wia. ⁵ Siendo si rumetik, siendo si tumenem, laa o mario-rior matoro mea waki tampa nisia nu rumetiki sumeup. ⁶ Reghes e masengome mea waki timu, laa o muliling mea waki amian, minapawee-wee sia mawuliling, wo witu e wulilinganna e reghes i ti’i e minareng. ⁷ Em baya en temberan e maso’oso’ mea waki tasik, ta’an en tasik e reiy’ kangkasi mawuta; mea wisa en temberan maso’oso’, mea witu en temberan maso’oso’ reiy’ siena’na. ⁸ E reiy’ sa mina’asa wo’o sapa e makasenso’on, i ka’ayo e reiy’ i keila’la ni tou; em beren e reiy’ wesu maloo’, en talinga e reiy’ minateu-teula malinga. ⁹ Sapa e mekasa mouw wia e laa wia kasi, wo sapa e mekasa mouw siniwo e laa siwon kasi; e reiy’la wo’o sapa em beru witu e wawa’ niendo. ¹⁰ Wawean ku’a re’en e wo’o sapa en toro i lila’la: “Loo’onouw , nyi’i em beru!”? Ta’an e ni’itu em bia mouw eng ketareanna, e nure mouw nu reiy’pe’ nikita nu wia. ¹¹ Eng gena-ghenangan waki masa limangkoiyla e reiy’la, wo waki e masa rerior e laape’ meiy tu’un e reiy’ laa wawean eng gena-ghenangan witu nisea se matou-tou nu reiy’ mouw nyi’a. ¹² Niaku, Pengkhotbah, nyi’a mouw ku raja witu se Israel waki Yerusalem. ¹³ Niaku ku timabulelengla e nateku kaa laa mepeperiksa wo mesesoisapla ampit eng hikmat e reiy’ sa mina’asa e minamuali wia em bawa’ e langit. Ni’itu em pepa’ayangen makasusan neiy i weela ni Empung wia se oki-oki’ ni tou kaa laa mewewedula en tou. ¹⁴ Niaku ku limoo’o mola e reiy’ sa mina’asa em pasiwo-siwon en tinuanala ne tou wia e wawa’ niendo, ta’an loo’onouw, e reiy’ sa mina’asa wo’o sapa nyi’a mouw e reiy’ sipenoron wo e me’inakut mepepure’eket e reghes. ¹⁵ E reko’ e reiy’ mete’u terenen, wo e reiy’ wia e reiy’ mete’u rekenen. ¹⁶ Niaku ku limila’ witu e nate: “Loo’onouw, niaku ku minapasela mola wo minawes eng hikmat limantouwla em baya ne tou se maperenta witu e Yerusalem nu reiy’pe’ niaku, wo e nateku e minaka’ato mola kelaker eng hikmat wo en tine’u.” ¹⁷ Niaku ku timabulelengola e nateku kaa laa makasilighla eng hikmat wo en tine’u, kawe’engelan wo eng keba’abalan. Ta’an niaku ku minawena’asla kaa eng kapualitan i yi’i tu’u nyi’a mouw e me’inakut mepepure’eket e reghes, ¹⁸ karengan witu e laker hikmat e wawean kelaker en susa ate, wo seiy si mepelaker en tine’u, si mepelaker eng kasusa’an.