¹ O kasi niaku ku lumoo’ e reiy’ sa mina’asa palotoiyan e minamuali witu e wawa’ ni endo, wo loo’onouw, e lue’ ne tou-tou se neiy i lotoiy wo e reiy’la si meibor nisea, karengan witu e weteng ne tou-tou malotoiy se wawean kakuasa’an. ² Eng karengan e ni’itu niaku ku mapokeiyla se tou-tou minate, se ure mouw timayan, se lebe aruiy ta’an se tou-tou matou-tou, en teakan se matou-toupe’. ³ Ta’an se lebe aruiy ta’an se marua-ruana i ti’i se i papokeiykula tou reiy’pe’ wia, se reiy’pe’ limoo’ em pasiwo-siwon lewo’, e minamuali witu e wawa’ ni endo. ⁴ Wo niaku ku limoo’ kaa e reiy’ sa mina’asa e rinawoiy wineduan wo e reiy’ sa mina’asa kelali’iketan witu em pepa’ayangen nyi’a mouw e loo’ ate niesa nga touan witu se tou walina, E nyi’i tu’u e reiy’ sipenoron wo me’inakut mepepure’eket e reghes. ⁵ Sitou we’engel si limepet e lawasna wo mekaan e le’ona nuesa. ⁶ Esa nga rongkem kaleneran e lebe le’os ta’an e rua nga rongkem rinawoiy wineduan wo e me’inakut mepepure’eket e reghes. E reiy’ sipenoron witu e matou-tou ⁷ Niaku ku limoo’ kasi e reiy’ sipenoron witu e wawa’ ni endo: ⁸ wawean siesa tou maesa-esa i te, sia si reiy’ maka oki’ tuama ka’apa patuari tuama, wo e reiy’ maena-ena’na sia memedu-medu, em berenna tu’u e reiy’ mateu-teula ampit eng kakaya’an; – i wee si seiy niaku memedu-medu wo masede’ eng kasenaangan? – E nyi’i tu’u e reiy’ sipenoron wo eng kapualitan makasusan. ⁹ Merua’an e lebe le’os ta’an e maesa-esa en tou, karengan nisea se maka’ato en tetoro le’os witu e rawoiy wedu nea. ¹⁰ Karengan sa sea i ka’anu siesa si mopo si ka’ampitena, ta’an ee welegh sitou neiy i ka’anu, si reiy’ makapunyala tou walina kaa laa mopo nisia! ¹¹ O kangkasi sa se tou tumekel merua, nisea se mepasu’, ta’an kumura sa maesa-esa i te o toro mepasu? ¹² Wo sakawisa siesa tou si toro epungela, rua tou se toro laa tumaang. En tali telu e reiy’ gampang pererangkuten. ¹³ Lebe le’os siesa taretumou miskin ta’an si makahikmat ta’an i te siesa raja tu’a ta’an si we’engel, si reiy’ so’o weean ngenge’enge’ kasi. ¹⁴ Karengan waki penjara si taretumou i ti’i si rumou’mi kaa laa mamuali raja, ma’anouw tu’u sia neiy i patoula miskin e masa paperenta’an ni tou tu’a mouw i ti’i. ¹⁵ Niaku ku limoo’ em baya ne tou se matou-tou witu e wawa’ ni endo se makelang mewali-wali ampit si taretumou eng ketare, si laa mamuali sawel ni raja i ti’i. ¹⁶ E reiy’ ma’apu-apuna se rakyat pa’aka-aka’anna, ta’an se tou mineiy eng kamurian se reiy’ mepa’arla nisia. Eng karengan e ni’itu, e nyi’i tu’u e reiy’ sipenoron wo me’inakut mepepure’eket e reghes. Meide’ mola si Empung Tayuranouw eng ke’angannu, sa koo kumelang mea waki wale ni Empung! Metawila kaa laa luminga nyi’a mouw e lebe le’os ta’an e mapasempela en tetule tinuanala ne tou-tou we’engel, karengan nisea se reiy’ mete’u, kaa nisea se masiwo lewo’.