¹ Laa o lumila’ mouw si Elisa: “Linganouw e nuwu’ ni TUHAN. Teinti’i mouw e nuwu’ ni TUHAN: Wo’odo e wo’o wona e nedo tanun nyi’i esa nga sukat topong kasa le’os e laa maka arga esa nga syikal wo e rua sukat jelai e laa maka arga esa nga syikal waki pepalen leloangan Samaria.” ² Ta’an si perwira, si minamuali ajudan ni raja, miningkot si abdi ni Empung, pokeiyna: “Ma’anouw tu’u si TUHAN si sumiwola ansouw-ansouw waki langit, ma’an tu’u eng kapualitan i ti’i e wona’na mamuali? Wingkot ni abdi ni Empung: “Eng kaulitna nikoo koo laa lumoo’ nyi’a ampit em berennu nuesa, ta’an e reiy’ laa kumaan sapa-sapa waki nyi’a.” ³ Se epat tou rara’an lepra se witu en sinaru em pepalen leloangan. Lumila’ mouw siesa wia se walina: “Ka’a ku’a re’en kita merube-ruber wia nyi’i i ka’ayo mate? ⁴ Sa kita lumila’: Le’osouw kita ghumoreme waki kota, e nulitna witu eng kota wawean kelalenan, nikita ta laa mate witula. Wo sa kita mena’ wia nyi’i, kita laa mate kangkasi. Jadi en teakan, meiy mouw kita lumewete em pedasingan ne suraro Aram. Sa sea mayala nikita matou-tou, kita laa tumou, wo sa sea mepepatela nikita, kita laa mate.” ⁵ O laa witu e nedo mawengido tumo’orouw sea wo ghumoreme waki tampa pedasingan ne tou Aram. Ta’an eng katoroan sea nu i ka’ayola waki li’ilik en tampa pedasingan ne tou Aram i ti’i, kaloo’anola e reiy’la tou maname. ⁶ Karengan si TUHAN si simiwo mola se suraro Aram i ti’i liminga e legu’an eng kareta, legu’an ne kawalo, legu’an ne suraro ka’asa’an, i ka’ayo lumila’ mouw siesa wia se walina: “Eng kaulitna si raja Israel si minee mola tetoro se raja-raja tou eng Het wo se raja-raja tou e Misraim sumaru nikita, rio sea rumego nikita.” ⁷ Kaa ni’itu tumo’orouw sea o tumingkasla en tou witu e nedo mawengido ampit timele’ula en dasing wo se kawalo wo se keledai nea ma’an en tampa pedasingan i ti’i ampit en tuana i te; nisea se timingkasla en tou melelawirla e nyawana. ⁸ Katoroan se tou-tou rara’an lepra i ti’i nu i ka’ayola waki li’ilik en tampa pedasingan, ghumoremouw sea witu eng gorem e nesa dasing, laa o kumaan wo kumoo’. Nu reiy’ mouw i tu nisea se minateri maname e mas wo em perak wo em pakean, kamurian mea mouw sea kumirongla nyi’a. ⁹ Laa o lumila’ mouw siesa wia se walina: “Reiy’ waar en tinuanatala i yi’i. Nendo i yi’i nyi’a mouw e nendo abar le’os, ta’an nikita i yi’i kita mena’ makapenes i te. Sakawisa kita ma’ena’ i ka’ayo en terang memo’odo, takar e nukuman e laa tumoro nikita. Jadi en teakan, meiy mouw kita mea sumaru kaa laa makite’ula eng kapualitan i ti’i waki istana ni raja.” ¹⁰ Nisea se minea, laa o maaleiy wia se menaang witu em pepalen leloangan eng kota wo sumusuiyla wia se tou-tou i ti’i, pokeiyna: “Nikeiy keiy ghimoremola witu en tampa pedasingan ne tou Aram, wo kaloo’ala e reiy’la sitou maname, wo e reiy’la suara ni tou palingala, wawean i te se kawalo wo se keledai neiy i ka’antung wo en dasing-dasing e neiy i tele’ula ampit en tuana i te.” ¹¹ Em baya ne menaang em pepalen leloangan se minaleiyla wo minakite’ula eng kapualitan i ti’i waki istana ni raja. ¹² Ma’anouw tu’u tu wengipe’, raja si timo’or kangkasi, laa o lumila’ wia em baya ne pegawaina: “Le’osouw tu i terangkula wia nikoo sapa e maksut ne tou Aram i ti’i wia nikita. Nisea se mete’u kaa nikita i yi’i kita peme’itan eng kelalenan, kaa ni’itu sea rumou’mi waki tampa pedasingan kaa laa mekekirongla en tou waki padang, kasuatan megheghenang: Sakawisa se tou Israel rumou’mi waki ghorem eng kota, nikita kita laa sumikop nisea matou-tou, kamurian nikita kita laa ghumorem witu eng gorem eng kota.” ¹³ O laa si meta’esa’an pegawaina si miningkot: “Le’osouw kita medo lima nga ipus kawalo se timele’upe’ wia eng gorem eng kota i yi’i; tantu mouw eng ka’ada’anna en tanu se minapekasa eng kelaker ne tou Israel se mina’apu mola minate i ti’i! Ma’anouw kita rumeola se tou mea mouw, rio kita lumoo’.” ¹⁴ Nu reiy’ mouw i tu nisea se minedo rua kareta kawalo, kamurian si raja si rimeo nisea tumodeiy se suraro ne Aram kasuatan limila’: “Mea mouw lumoo’ nisea!” ¹⁵ Laa o mea mouw sea tumodeiy se tou-tou i ti’i i ka’ayo waki so’oso’an Yordan, wo kaloo’anola e minapekasa lalan i ti’i wuta ampit e labung wo em pakakas neiy i lawala ne tou Aram witu e nedo sea nu tumingkas kaa mererior. Kamurian marengouw se rereoan-rereoan i ti’i wo sumusuiyla eng kapualitan iti’i wia si raja. ¹⁶ Takar rumou’ momi se penduduk eng kota i ti’i wo rumemu’ en tampa pedasingan ne tou Aram. Kaa ni’itu esa nga sukat topong kasa le’os e maka arga esa nga syikal wo e rua sukat jelai e maka arga esa nga syikal, minatoroan ampit e nuwu’ ni TUHAN. ¹⁷ Sapa tare si raja si timampa mola si perwira minamuali ajudanna i ti’i mategha’la em pepalen leloangan, ta’an se rakyat se minele’e-le’ek nisia witu em pepalen leloangan, laa o sia mate minatoroan ampit e lelila’an ni abdi ni Empung si limila’la nyi’a witu e nedo si raja nu mineiy matola nisia. ¹⁸ Wo e minamualikan kangkasi en tanu neiy i lila’la ni abdi ni Empung i ti’i wia si raja: “Rua sukat jelai e laa maka arga esa nga syikal wo esa nga sukat topong kasa le’os e laa maka arga esa nga syikal, wo’odo e wo’o wona’ tanu e nedo i yi’i waki pepalen leloangan Samaria.” ¹⁹ Witu e nedo ni’itu si perwira si miningkot si abdi ni Empung i ti’i: “Ma’anouw tu’u si TUHAN si sumiwola ansouw-ansouw waki langit, ma’an tu’u eng kapualitan i ti’i e wona’na mamuali?”, ta’an si Elisa si limila’: “Eng kaulitna nikoo koo laa lumoo’ nyia’ ampit em berennu nuesa, ta’an reiy’ laa kumaan sapa-sapa witu nyi’a.” ²⁰ Tuana mouw e minamuali wia sitou i ti’i: Rakyat se minele’e-le’ek nisia waki pepalen leloangan, laa o mate mouw sia.