¹ Naaman, si panglima ni raja Aram, nyi’a mouw siesa tou paloo’o-loo’on witu en sinaru ni tuangna wo si kasa i koupusla, eng karengan kaa nisia si TUHAN si minee mola kamenangan wia se tou Aram. Ta’an sitou i ti’i, siesa tou pahlawan ne suraro, si rara’an lepra. ² Tou Aram se mekasa mouw rumou’me minarambangan wo malimi siesa oki’ wewene tinaang waki Israel. Sia si minamuali pelayan wia si ka’awu ni Naaman. ³ Lumila’ mouw si reraa i ti’i wia si nyorana: “Sa wona’na si tuangku sumaru si nabi si waki Samaria i ti’i, takar en tantu mouw si nabi i ti’i si laa lume’osela nisia witu e rumarana.” ⁴ Laa o mea mouw si Naaman makite’ula wia si tuangna, pokeiyna: “Teinti’i-teinti’i mouw neiy i lila’la ni reraa si waki wanua Israel i ti’i.” ⁵ Takar e wingkot ni raja Aram: “Le’os, mea mouw wo niaku ku laa mapa’alila en surat wia si raja Israel.” Laa o mea mouw si Naaman wo minali esa nga weteng sesempe mapulu’ talenta perak wo e nenem nga riwu syikal mas wo e mapulu’ nga ketor labung. ⁶ Sia si mina’ayola en surat i ti’i wia si raja Israel, em palingan: “I keke’ayola en surat i yi’i wia nikoo, kete’uanola satorona, kaa niaku ku rimeo wia nikoo si Naaman, pegawaiku, rio koo lume’osla nisia witu e rara’an leprana.” ⁷ Makarengan nu reiy’ mouw si raja Israel nu minaca en surat i ti’i, kurensangenna mola e labungna ma’an limila’: “Empung ku’a re’en niaku i yi’i si toro mepepatela wo metetoula, i ka’ayo sitou i yi’i si minapa’alimi e nower wia niaku, rio kulume’osla siesa tou waki rumara leprana? Ta’an eng kaulitna, weeanola ghenang wo loo’onouw, nisia si masero kapoongan wia niaku.” ⁸ Makarengan nu reiy mouw si Elisa nu limingala, si abdi ni Empung i ti’i, kaa si raja Israel si kimurensangla e labungna, i papa’alina mouw e nower wia si raja, em palingan: “Ka’a koo kimurensangla e labungmu? Ma’anouw sia meiy wia niaku, rio sia mete’u kaa wawean siesa nabi wia Israel.” ⁹ Kamurian meiy mouw si Naaman ampit si kawalona wo eng karetana, laa o mena’ witu en sinaru em pepalen em bale ni Elisa. ¹⁰ Elisa si rimeo siesa tou rereoan wia nisia lumila’la: “Mea mouw lumele’ makapitu witu en so’oso’an Yordan, takar e nouwakmu e laa masegaya’ sumeup, i ka’ayo koo minalenas.” ¹¹ Ta’an mea mouw si Naaman ampit e nupi’ kasuatan limila’: “Niaku ku mapokeiyla kaa e nulitna nisia si meiy witu luar wo rumedeiy kumeret e ngaran ni TUHAN, Empungna, laa o mengoghe-ngoghela e lawasna witu natas en tampa rumara i ti’i wo ampit en tuana si lume’osla e rumara lepraku! ¹² Reiy’ ku’a re’en e Abana wo em Parpar, en so’oso’an-so’oso’an en Damsyik, e lebe le’os waki e reiy’ sa mina’asa so’oso’an waki Israel? Reiy’ ku’a re’en niaku ku toro lumele’ maname wo malenas?” Kamurian lumenge mouw sia wo mea ampit em pasu’ ate. ¹³ Ta’an se pegawai-pegawaina se mineiy tumawi ampit limila’ wia nisia: “Ama’, sa’andeiyna si nabi i ti’i si rimeo em perkara pedis wia nikoo, reiy’ ku’a re’en si ama’ si laa tumuanala nyi’a? Wo’ope’ kasi en teakan, nisia si limila’ i tela wia nikoo: Lumele’ mouw wo nikoo koo laa malenas.” ¹⁴ Takar tumumpa mouw sia minureghla en touna makapitu witu en so’oso’an Yordan, minatoroan ampit e lelila’an ni abdi ni Empung i ti’i. O laa en segaya’ mouw e nouwakna minareng tanu e nouwak ni esa oki’ wo nisia si minalenas. ¹⁵ Kamurian marengouw sia ampit se minapekasa pasukanna wia si abdi ni Empung i ti’i. Nu neiy mouw i ka’ayola, meiy mouw sia witu en sinaru ni Elisa wo lumila’: “En teakan niaku ku mete’u, kaa wia e minapekasa em bumi e reiy’la si Empung kacuali wia Israel. Kaa ni’itu sungkulenouw satorona e nesa tetaber ni hambamu i yi’i!” ¹⁶ Ta’an si Elisa si miningkot: “Demi si TUHAN matou-tou e witu en sinaru-Na niaku ku minamuali pelayan, eng kaulitna niaku ku reiy’ laa sumungkul en sapa-sapa.” Wo ma’anouw tu’u si Naaman mase’esek nisia rio sumungkul e wo’o sapa, nisia si minena-ena’ masede’. ¹⁷ Eng kamurianna lumila’ mouw si Naaman: “Sa wona’na tuana, ma’anouw i weela wia si hambamu i yi’i en tana’ kelakerna e muatan ne esa nge paar bagal, karengan si hambamu i yi’i si reiy’ mouw kasi laa mesesempela en tetule tinunu ka’apa en tetule rineret wia si empung walina kacuali wia si TUHAN. ¹⁸ Wo satorona si TUHAN si mampungela si hambamu i yi’i witu em perkara tumodong: Sakawisa si tuangku ghumorem witu eng kuil Rimon kaa laa ma’ongkot mesesempe maname, wo niaku ku minamuali pateperna, i ka’ayo aku lewo’ sa reiy’ kumi’it mongkot sumempe witu eng kuil Rimon i ti’i, satorona si TUHAN si mampungela si hambamu iyi’i witu eng kapualitan i ti’i.” ¹⁹ Takar lumila mouw si Elisa wia nisia: “Mea mouw ampit e lawir!” ²⁰ ghumenangouw si Gehazi, bujang ni Elisa, abdi ni Empung: “Eng kaulitna si tuangku si taleus maorematela si Naaman, sitou e Aram i yi’i, ampit e reiy’ simungkul en sesempe paali-alinna. Demi si TUHAN matou-tou, eng kaulitna niaku ku laa tumingkas kumi’it nisia wo laa maka’atomi wo’o sapa waki nisia.” ²¹ O laa si Gehazi si kimi’itla si Naaman waki muri. Katoroan si Naaman nu limoo’ wawean tou matingka-tingkas mekeki’it nisia, tumumpa mouw sia ampit e minakarengan waki atas eng kareta kaa laa ma’atola nisia wo lumila’: “Tabea!” ²² Wingkotna: “Tabea!” Tuangku Elisa si rimeo niaku lumila’la: Tare mouw i te mineiy wia niaku se rua taretumou waki kakuntungan Efraim waki elet e rewokan ne nabi. Le’osouw i weela wia nisea esa nga talenta perak wo e rua nga ketor labung.” ²³ Naaman si limila’: “Laa mouw, edonouw e rua talenta.” Naaman si mase’esek nisia , wo sumaput e rua talenta perak witu e rua sompoiy-sompoiy wo e rua nga ketor labung,laa o meela nyi’a wia se rua bujangna; nisea i yi’i se minater em baya nyi’a witu en sinaru ni Gehazi. ²⁴ Nu reiy’ mouw nisea nu neiy i ka’ayola waki kakenturan, sungkulenna mola waki lawas nea , tu’utulannala waki wale, wo i reona se rua tou i ti’i mea, takar mea mouw sea. ²⁵ Tare mouw i te si Gehazi nu ghumorem wo mapa’atola witu en sinaru ni tuangna, lumila’ mouw si Elisa wia nisia: “Wisa o meiy?, Gehazi?” Wingkotna: “Hambamu i yi’i si reiy’ limaa wisa!” ²⁶ Ta’an em pokeiy ni Elisa wia nisia: “Reiy’ ku’a re’en e nateku eng kimi’it minea, katoroan sitou i ti’i nu timumpami waki atas eng karetana matola nikoo? Takar en teakan, nikoo koo simungkulola em perak wo ampit e ni’itu koo toro minaka’atola uma-uma, uma zaitun, uma anggor, membe’ domba, lembu sapi, budak tuama wo se budak wewene, ²⁷ ta’an e rumara lepra ni Naaman e laa kumerut wia nikoo wo wia se oki’ puyunnu i wee eng keure-urena.” Takar rumou’ momi si Gehazi waki sinaruna ampit eng kinatena’an e lepra, puti’ tanu en salju.