¹ Si meta’esa’an waki se ka’awu-ka’awu em baya ne nabi si rimapotla eng kapualitanna wia si Elisa, kasuatan rimekeiy: “Hambamu, si ka’awuku, si minate mouw wo nikoo i yi’i koo mete’u, kaa si hambamu i ti’i si meide’la si TUHAN. Ta’an en teakan, si make’i e nutang si mineiy mouw kaa meiy ma’edo se rua oki’ku mamuali budakna.” ² Wingkot ni Elisa wia nisia: “Sapa ku’are’en en toro siwongkula i wee nikoo? I pakite’u mola wia niaku sapa-sapa eng kapunya’annu waki wale.” Lumila’ mouw si wewene i ti’i: “Hambamu i yi’i sireiy’ makapunya e wo’o sapa tu’u waki wale, kacuali e nesa kure’ pinumpunan lana.” ³ Laa o lumila’ mouw si Elisa: “Mea mouw, kiweenouw e lulut-lulut waki luar, waki se reiy’ sa mina’asa ketana’mu, e lulut-lulut reiy’ sisapa, ta’an te’a taleus toyo’. ⁴ Kamurian ghumoremouw, penetenouw em pepalen nu reiy’ mouw nikoo wo se oki-oki’mu nu ghumoremla, laa o i toa’ mouw e lana i ti’i witu eng gorem e reiy’ sa mina’asa lulut. Wisa e wuta, adetenouw!”!” ⁵ Rumou’ momi si wewene i ti’i waki nisia; penetennala em pepalen nu reiy’ mouw nisia wo se oki-oki’na nu ghimoremla; wo se oki-oki’na se metawila e lulut-lulut wia nisia, kasuatan nisia si reiy’ maena-ena’ matoa’. ⁶ Katoroan e lulut-lulut i ti’i wuta mouw, lumila’ mouw si wewene i ti’i wia se oki’na: “I tawi momi wia niaku e nesape’ lulut kasi.” Ta’an e wingkot nea wia si ina’ nea: “E reiy’ mola kasi e lulut.” O laa mena’ mouw e lana i ti’i maso’oso’. ⁷ Kamurian mea mouw si wewene i ti’i makite’ula nyi’a wia si abdi ni Empung, wo sitou i yi’i si limila’: ”Mea mouw, i wangkerouw e lana i ti’i, wearenola e nutangmu, wo tumou mouw waki lebena, nikoo ma’an se oki-oki’mu.”

⁸ Witu e nendo mekasa Elisa si minea waki Sunem. Maname maena’ siesa wewene kaya si mineri’la nisia kumaan. Wo e makapira mola sia witu em pakela-kelangan, tumuli mouw sia maname kaa laa mekekaan. ⁹ Lumila’ mouw si wewene i ti’i wia si ka’awuna: “Eng kaulitna niaku ku mete’u mouw kaa sitou si reiy’ mena’ mengeiy wia nikita i ti’i nyi’a mouw si abdi ni Empung kudus.

¹⁰ Le’osouw kita sumiwo e nesa kamar rintek waki atas e makakedir watu, wo e le’osouw kita meela witula i wee nisia e nesa tetekelan, e nesa meja, e nesa kadera wo e nesa sesoloan, takar sakawisa sia meiy wia nikita, sia si toro ghumoreme mana.” ¹¹ Witu e nendo mekasa meiy mouw sia maname, laa o ghumoremouw sia witu eng kamar atas i ti’i wo tumekel witu. ¹² Kamurian lumila’ mouw sia wia si Gehazi, bujangna: “Kereteni si wewene en Sunem i ti’i.” Laa o keretennala si wewene i ti’i wo sia rumedeiy witu en sinaru ni Gehazi. ¹³ Elisa si minila’ mola wia si Gehazi: “Wa’awa’ mouw i lila’la wia nisia: Eng kaulitna nikoo koo kasa mouw mangasesusah tanu e nyi’i i wee nikeiy. Sapa ku’a re’en en toro siwongku i wee nikoo? Wawean ku’a re’en en toro i susuiykula en tanume nikoo wia si raja ka’apa si kapala ne suraro?” Wingkot ni wewene i ti’i: “Niaku i yi’i ku maena’ wia eng keuneran ne kaumku!” ¹⁴ Kamurian lumila’ mouw si Elisa: “Sapa ku’a re’en en toro siwongkula i wee nisia?” Wingkot ni Gehazi: “Ooh, sia si reiy’ makapunya oki’, wo si ka’awuna si tu’a mouw.” ¹⁵ Laa o lumila’ mouw si Elisa: “Kereteni sia!” Wo nisia nu kineretna mola, rumedeiy mouw si wewene i ti’i witu em pepalen. ¹⁶ Lumila’ mouw si Elisa: “Witu e nedo tanu i yi’i kangkasi, te’un rerior, nikoo i yi’i koo laa gumandong siesa oki’ tuama.” Ta’an e wingkot ni wewene i ti’i: “Te’a mouw tuangku, ee abdi ni empung, te’a mouw metetowo wia si hambamu i yi’i!” ¹⁷ Gumandongouw si wewene i ti’i, laa o tumimea’la siesa oki’ tuama witu e nedo tanu ni’itu kangkasi, witu en te’un tumodongla nyi’a, tanu neiy i lila’la ni Elisa wia nisia. ¹⁸ Sioki’ i ti’i nu minasela mouw, witu e nendo mekasa rumou’ mouw sia ma’atola si ama’na, witu e nelet ne sumesampur-sumesampur eng gandum. ¹⁹ I kalo’ositi rumekeiy mouw sia wia si ama’na: “Adoh eng kokongku, kokongku!” Laa o pokeiy ni ama’na wia siesa bujang: “Poponouw sia wo alin waki si ina’na!” ²⁰ Pinoponala sia, nialina mareng waki si ina’na. Rumuberouw sia witu em pinalar ni ina’na i ka’ayo marorake, ta’an nu reiy’ mouw i tu mate mola sia. ²¹ Laa o lumongkotouw si wewene i ti’i, i gholeiynala sia witu natas en tetekelan ni abdi ni Empung i ti’i, pinenetnala em pepalen wo mea, I ka’ayo sioki’ i te i ti’i si witu eng gorem eng kamar. ²² Nu reiy’ mouw i tu sia kumeret si ka’awuna ma’an limila’ : “I reomi wia niaku si meta’esa’an bujang ampit malimi siesa nga ipus keledai mereiy; niaku ku pa’ar me’a mario-rior wia si abdi ni empung i ti’i, wo laa mapawee-wee marengi.” ²³ Lumila mouw si ka’awuna: “Ka’a ku’a re’en wia e nendo i yi’i koo laa me’a wia nisia? E nulitna en teakan e reiy’ sumedot weru wo e reiy’ nendo sabat.” E wingkot ni wewene i ti’i: “Te’a lieiy.” ²⁴ Weeanna mola sesakean si keledai i ti’i wo lumila’ mouw sia wia si bujangna: “Teperenouw wo maju mouw, te’a penaa-naangen aku witu em pakela-kelangangku, kacuali sakawisa aku lumila’la wia nikoo.” ²⁵ Tuana mouw si wewene i ti’i nu minae wo mea wia si abdi ni Empung waki kuntung Karmel. Makarengan nu reiy’ mouw si abdi ni Empung nu limoo’mi nisia waki wa’akat, lumila’ mouw sia wia si Gehazi, bujangna: “Loo’on, si wewene en Sunem i ti’i si mengeiy! ²⁶ Tumingkasouw sumungkulela nisia wo i lila’ mola wia nisia: Lawir ku’a re’en nikoo, lawir ku’a re’en si ka’awumu, lawir ku’a re’en sioki’ i ti’i?” Wingkot ni wewene i ti’i: “Lawir!” ²⁷ Wo nu reiy’ mouw sia nu neiy i ka’ayola waki kuntung i ti’i, tiboiyanna mola e ne’a ni abdi ni Empung i ti’i, ta’an si Gehazi si rimetenla laa me’ure’ nisia . Laa o lumila mouw si abdi ni Empung: “I waya mola sia natena e nge’enget! TUHAN si kimirongla eng kapualitan i yi’i waki niaku, reiy’ minakite’ula nyi’a wia niaku.” ²⁸ Laa o lumila’ mouw si wewene i ti’i: “Sapa ku’a re’en ku kimiweemi siesa oki’ tuama waki si tuangku? Reiy’ ku’a re’en e neiyku mouw i lila’la: Te’a aku peweweean e narapan reiy’ sisapa?” ²⁹ Takar lumila mouw si Elisa wia si Gehazi: “Wa’akesenouw e rereenannu, paalinouw en diki-dikiku witu e lawasmu wo mea mouw.. Sakawisa koo maatoan ampit siesa nga touan, te’a mouw mewewee tabea wia nisia wo sakawisa siesa nga touan mewewee tabea wia nikoo tea’, tea’ pesesingkomen sia, kamurian i wee mola en diki-dikiku i yi’i witu natas ni oki’ i ti’i.” ³⁰ Ta’an lumila’ mouw si ina’ ni oki’i ti’i: “Demi si TUHAN matou-tou wo en demi em patou-touannu nuesa, eng kaulitna niaku ku reiy’ laa tumele’ula nikoo.” Laa o tumo’orouw si Elisa wo kumelang maki’itla si wewene i ti’i. ³¹ Sapa tare si Gehazi si kimelangouw rimeriorla nisea wo minee mola en diki-diki witu e natas ni oki’ iti’i, ta’an e reiy’la suara, wo reiy’la si kowa’ sa tumou. Laa o marengouw sia matola si Elisa ma’an minakite’ula wia nisia, pokeiyna: “Sioki’ i ti’i si reiy’ timo’or!” ³² Wo eng katoroan si Elisa nu ghimorem witu em bale, kaloo’ala sioki’ i ti’i si minate mouw wo si neiy’ i kalo’or witu en tetekelanna. ³³ Sia nu ghimoremola, penetennala em pepalen, i ka’ayo sia nuesa ampit sioki’ i ti’i se witu eng gorem eng kamar, kamurian sumombayangouw sia wia si TUHAN. ³⁴ O laa sia mapalo’orla en touna witu natas ni oki’ i ti’i ampit en sumana witu natas en suma ni oki’ i ti’i wo em berenna witu natas em beren ni oki’ iti’i ma’an em palar e lawasna witu natas em palar e lawas ni oki’ iti’i; wo eng karengan nisia si kimepa witu natas ni oki’i ti’i, takar minepasu’ mouw e nouwak ni oki’ i ti’i. ³⁵ Nu reiy’ mouw i tu sia rumedeiy sumeup wo kumelang witu em bale i ti’i mekasa mea maname wo mekasa meiy wia nyi’i,kamurian kumepa mouw kasi sia witu natas ni oki’ i ti’i. Takar wa’anenouw sioki’ i ti’i mina’ayo minakapitu, laa o muka’ em berenna. ³⁶ Kamurian si Elisa si kimeret si Gehazi wo lumila’: “Kereteni si wewene en Sunem i ti’i!” Keretenna mola sia, laa o meiy mouw sia wia nisia, Takar lumila mouw si Elisa: ”Poponouw sioki’mu iyi’i!” ³⁷ Ghumoremouw si wewene i ti’i, laa o i kasu’umul witu en saruan e ne’a ni Elisa wo maongkot masempe ampit eng giona mina’ayo en tana’. Kamurian poponnala sioki’na, laa o rumou’la.

Maut witu e rumping

³⁸ Elisa si minareng waki Gilgal witu e nedo wawean kelalenan witu em banua i ti’i. Wo eng katoroan witu e mekasa se rombongan ne nabi se rimuber witu e mukana, lumila’ mouw sia wia si bujangna: “Mee mola eng kure’ kasa wangko’ witu natas e napi wo lumutu’ mouw eng kekaanen i wee se rombongan ne nabi i ti’i.” ³⁹ Laa o rumou’ momi siesa tou waki nisea mea waki penguma’an kaa laa ma’erurla e raaren-raaren; sia matola e nakana maanap-maanap siru, wo tumipu’mi witu nyi’a em belaan siru, esa nge rawak wuta witu eng karaiyna. Sia nu minarengola, mapawee-wee mouw sia menoyo-noyouwla nyia witu eng kure’ palutu’an eng ketare, karengan nisea se reiy’ makasine’u nisia.

⁴⁰ Kamurian sodonomi waki linutu’ eng ketare i wee se tou-tou i ti’i kaa laa kaanen wo makarengan nu reiy’ mouw sea nu kimaanla nyi’a, rumekeiy mouw sea ma’an limila’: “Maut e witu eng gorem eng kure’ i ti’i, heiy abdi ni Empung!” wo reiy’ tumaang sea mekekaan nyi’a. ⁴¹ Ta’an lumila’ mouw si Elisa: “Medo mouw topong!” I lawana mola i tu witu eng gorem eng kure’ ma’an limila’: “Sodonouw en teakan i wee se tou-tou i yi’i, rio sea kumaan!” Takar e reiy’ mola kasi wo’o sapa e lewo’na witu eng kure’ i ti’i.

Minee kumaan se esa nga atus tou

⁴² Meiy mouw siesa nga touan waki Baal-Salisa ampit e maali-ali i wee si abdi ni Empung e roti wua’na ketare, nyi’a i ti’i e rua nga pulu’ roti jelai ma’an eng gandum weru witu e nesa sompoiy. Laa o lumila’ mouw si Elisa: “I wee mouw ni’itu wia se tou-tou i yi’i, rio sea kumaan.” ⁴³ Ta’an si pelayanna i ti’i si limila’: “Kumura ku’a re’en niaku toro sumakeiyla e nyi’i witu en saruan ne esa nga atus tou?” Wingkotna: “I wee mola wia se tou-tou i ti’i, rio sea kumaan, karengan en teinti’i mouw e nuwu’ ni TUHAN: Tou si laa kumaan, awes tare e laa wawean en tele’una.” ⁴⁴ Laa o i sakeiynala witu en saruan nea, takar kumaanouw sea wo e wawean en tele’una, minatoroan ampit e nuwu’ ni TUHAN.