¹ Yoram, oki’ ni Ahab, si minamuali raja waki Samaria witu se Israel witu en te’un kamapulu’ o uwalu en zaman ni Yosafat, raja Yehuda, wo nisia si minerenta mapulu’ o rua nge te’un eng keurena. ² Sia si matuanala sapa e lewo’ witu em beren ni TUHAN, ta’an si reiy’ tanu si ama’na wo en tanu si ina’na: sia si mina’akatla en tugu berhala Baal neiy i redeiyla ni ama’na. ³ Ma’anouw tu tuana, sia si kimapute’ witu en dosa ni Yerobeam bin Nebat si minua’la se tou Israel se minakadosa kangkasi; sia si reiy’ mina’akati nyi’a. ⁴ Mesa, si raja Moab, nyi’a mouw siesa tou mememiara domba; tanume e upeti sia si minear wia si raja Israel se esa nga atus nga riwu oki’ ne domba wo e wu’uk waki se esa nga atus nga riwu domba raghar. ⁵ Ta’an e makarengan nu reiy’ mouw si Ahab nu minate, rumangu mouw si raja Moab wia si raja Israel. ⁶ Rumou’ momi si raja Yoram witu e nedo ni’itu waki Samaria, laa o sia kumumisi se barisan ne minapekasa tou Israel. ⁷ Tumodongla nyi’a sia rumeo tou wia si Yosafat, raja Yehuda, ampit e nower: “Raja Moab si rimangu mola wia niaku! Pa’ar ku’a re’en nikoo mewali-wali niaku sumeke’ sumaru e Moab? Wingkotna: “Niaku ku laa maju. Kita mewali-wali, niaku wo nikoo, rakyatku wo se rakyatmu, kawaloku wo se kawalomu.” ⁸ O kasi sia mueiy: “Tumoro e lalan wisa ku’a re’en kita laa maju?” Wingkotna: “Tumorola em padang gurun Edom!” ⁹ Takar kumelangouw si raja Israel wo si raja Yehuda wo si raja Edom. Ta’an nu reiy’ mouw sea nu limedong pitu nga endo kinelangan eng kewa’akatna, takar e reiy’ niatoan rano i wee se suraro wo i wee se tekapen maki’i-ki’it nisea. ¹⁰ Laa o lumila mouw si raja israel: “Wooiy, TUHAN si kimeretola se telu raja i yi’i kaa laa mesesarakan nisea witu e lawas ne Moab!” ¹¹ Ta’an mueiy mouw si Yosafat: “Reiy’la ku’a re’en wia nyi’i siesa nabi ni TUHAN, rio ampit e nieletanna kita kumiwee en teturu’ ni TUHAN?” O laa si meta’esa’an pegawai ni raja Israel si miningkot, pokeiyna: “Wia nyi’i wawean si Elisa bin Safat, eng ketarena si melayanla si Elia.” ¹² Lumila’ mouw si Yosafat: “Memang wia nisia e wawean nuwu’ ni TUHAN.” ¹³ Ta’an lumila’ mouw si Elisa wia si raja Israel: “Sapa ku’a re’en e nurusangku ampit nikoo? Mea mouw wia em baya ne nabi ni ama’mu wo wia em baya ne nabi ni ina’mu.” Wingkot ni raja Israel wia nisia: “Te’a tuana, karengan si TUHAN si kimeret se telu raja i yi’i kaa laa mesesarakan nisea witu e lawas ne tou Moab!” ¹⁴ Lumila’ mouw si Elisa: “Demi si TUHAN minapekasa alam si matou-tou, witu en sinaru-Na niaku ku minamuali pelayan: sa reiy’ karengan si Yosafat, raja Yehuda, takar eng kaulitna niaku i yi’i ku reiy’ laa tumu’us wo lumoo’ wia nikoo. ¹⁵ Takar en teakan, eanomi i wee niaku siesa tou memema’ayang’ kecapi.” Witu e nedo si memema’ayang kecapi i ti’i ma’ayang kecapi, takar eng kakuasa’an ni TUHAN en sumaputla nisia. ¹⁶ Kamurian lumila’ mouw sia: “Teinti’i mouw e nuwu’ ni TUHAN: Ma’anouw wia eng kewong i yi’i en siwoan salu-salu, ¹⁷ karengan en teinti’i mouw e nuwu’ ni TUHAN: Nikouw kouw reiy’ laa maka’ato e reghes wo naro, ta’an eng kewong i yi’i e laa mawuta ampit en dano, i ka’ayo nikouw ma’an se ternak parereten wo se tekapen pengater toro kumoo’. ¹⁸ Wo e ni’itu tu’u nyi’a mouw eng kapoongan wure’ witu em beren ni TUHAN; o kangkasi se tou Moab se laa i sarakan-Nala witu e lawasmu. ¹⁹ Nikouw kouw laa rume’ila e reiy’ sa mina’asa kota e makarereen wo e reiy’ sa mina’asa kota em pinelengla; nikouw kouw laa tumonga’la e reiy’ sa mina’asa akana e le’os; nikouw kouw laa menet e reiy’ sa mina’asa kembu’an wo nikouw kouw laa tumerila e reiy’ sa mina’asa penguma’an e le’os ampit em batu-batu.” ²⁰ E nendo kawo’odoanna kasuatan se tou nu masempela en tetule, mineiy mouw ampit e limo’ositi en dano waki Edom, o laa mawuta mola em banua i ti’i ampit en dano. ²¹ Katoroan e lininga ne minapekasa tou Moab, kaa se telu raja iti’i se minaju mouw maseke’la nisea, takar i oghe mola em baya ne tou se makawoope’ maweiy en santi, awes tare se tou-tou lebe tu’a kangkasi, kamurian sea i tampala waki li’ilik em paakaran. ²² E nendo kawo’odoanna memo’odope’, katoroan siendo masena’la witu en saruan en dano i ti’i, kaloo’anola witu se tou Moab i ti’i, kaa en dano witu esa nga weka en sinaruna e mea’ tanu en daa’. ²³ Laa o rumekeiy mouw sea: “Ni’itu en daa’! Tantu mouw se raja-raja i ti’i se minewewunu’anouw, siesa si munu’ se walina. Takar en teakan, meiy mouw rumemu’, heiy tou-tou e Moab!” ²⁴ Ta’an eng katoroan sea nu i ka’ayola waki pedasingan ne tou Israel, takar tumo’orouw se tou Israel i ti’i, laa o mewe se tou-tou e Moab, i ka’ayo sea timingkasi witu. Wo mekewa’akatola sea masori’isipe mea waki ghorem e Moab kasuatan mepatela se tou-tou e Moab i ti’i. ²⁵ Nisea se rimewala eng kota-kota wo minenetla susur em penguma’an le’os ampit em batu, karengan susur tou si melawala em batu witu natasna. Nisea se minenet e reiy’ sa mina’asa kembu’an wo timonga’la e reiy’sa mina’asa akan e le’os, i ka’ayo eng Kir-Hareset i te neiy i tele’ula, ta’an eng kota i yi’i e linutamla ne tou-tou mepasoti waki e reiy’samina’asa ruuna. ²⁶ Katoroan si raja Moab nu limoo’, kaa em paseke’an i ti’i en taleus wuter i wee nisia, edonna mola se pitu nga atus tou timiboiy en santi mewali-wali nisia kaa laa mesesori’isip metetorome si raja Edom, ta’an e reiy’ minua’. ²⁷ Kamurian sia medo sioki’na polon si laa mamuali raja mesesawelela nisia, laa o sumempela nisia tanume si tetule tinunu witu natas e rereen beton. Ta’an eng kaupi’an wangko’ en timoro se tou Israel, i ka’ayo sea minae tumele’ula nisia wo mareng waki wanua nea.