¹ Melelaa mouw e nedona si TUHAN nu laa melelongkotla si Elia mea waki sorga witu e reghes tumokol, Elia wo si Elisa se kasuatan makelangi waki Gilgal. ² Lumila’ mouw si Elia wia si Elisa: “Le’osouw mena’ wia nyi’i, karengan si TUHAN si rimeo niaku mea waki Betel.” Ta’an si Elisa si miningkot :”Demi si TUHAN matou-tou wo en demi em patou-touannu nuesa, eng kaulitna niaku ku reiy’ laa tumele’ula nikoo.” Laa o mea mouw sea waki Betel. ³ Witu e nedo ni’itu rimou’mi se rombongan ne nabi se waki Betel matola si Elisa, laa o lumila’ mouw sea wia nisia: “Kete’uannu mouw ku’a re’en, kaa wia e nendo i yi’i si tuangmu si laa edoni ni TUHAN waki nikoo si ka’adetane waki sorga?” Wingkotna: “Niaku kangkasi ku mete’u, menesouw!” ⁴ Lumila’ mouw si Elia wia nisia: “Heiy Elisa, le’osouw mena’ wia nyi’i, karengan si TUHAN si rimeo niaku mea waki Yerikho.” Ta’an e wingkotna: “Demi si TUHAN matou-tou wo en demi em patou-touannu nuesa, eng kaulitna niaku ku reiy’laa tumele’ula nikoo.” Laa o i ka’ayo mola sea waki Yerikho. ⁵ Witu e nedo ni’itu tumawi mouw wia si Elisa se rombongan ne nabi se waki Yerikho ampit limila’ wia nisia: “Kete’uannu mouw ku’a re’en, kaa wia e nendo i yi’i si tuangmu si laa edoni ni TUHAN waki nikoo si ka’adetane waki sorga?” Wingkotna: “Niaku kangkasi ku mete’u, menesouw!” ⁶ Lumila’ mouw si Elia wia nisia: “Le’osouw mena’ wia nyi’i, karengan si TUHAN si rimeo niaku mea waki Yordan.” Wingkotna: “Demi si TUHAN matou-tou wo en demi em patou-touannu nuesa niaku ku reiy’ laa tumele’ula nikoo.” Laa o kumelangouw sea nu rua. ⁷ Lima nga pulu’ tou waki se rombongan ne nabi iti’i se kimi’it makelang, ta’an nisea se rimedeiy matu’usi waki rou’, eng katoroan sea nu rua nu rimedeiy waki li’ilik en so’oso’an Yordan. ⁸ O laa si Elia si minedo eng karaiyna, linangkunna, i wewenala witu natas e rano i ti’i, takar e minawetengouw en dano i ti’i minea esa nga weka wi’i wo minea esa nga weka ti’ime, i ka’ayo lumewetouw sea nu rua makelang witu en tana’ pera. ⁹ Wo nisea nu neiy mouw i ka’ayola waki lewet, lumila’ mouw si Elia wia si Elisa: “Kumiwee mouw sapa e laaku tuananla wia nikoo, nu reiy’pe’ niaku nu ka’adetane wia nikoo.” Wingkot ni Elisa: “Ma’anouw satorona aku maka’to rua weteng waki rohmu.” ¹⁰ Lumila’ mouw si Elia: “Em pengiweennu i ti’i nyi’amouw em pedis. Ta’an sa koo toro lumoo’ niaku ka’adetane wia nikoo, e laa mamualila wia nikoo tanu en tuana, wo sa reiy’, e reiy’ laa mamuali.” ¹¹ Kasuatan nisea nu makelang mapawee-wee kasuatan mengila-ngila’, i kalo’ositi e mineiy mouw eng kareta maapi ampit si kawalo maapie en tima’atasla nisea nu rua, laa o ka’adetanome si Elia mea waki sorga witu e reghes tumokol. ¹² Katoroan si Elisa nu limoo’ ni’itu, takar rumekeiy mouw sia: “Ama’ku, ama’ku! Eng kareta ne Israel wo se tou-touna se mesake-sake kawalo!” Kamurian se reiy mouw linoo’ona kasi, o laa winarunala e labungna wo kurensangennala e minamuali rua nga kurensang. ¹³ Nu reiy’ mouw i tu purutennala eng karaiy ni Elia e neiy mouw i kalenta’ i ti’i, laa o sia kumelang mewareng wo rumedeiy witu e li’ilik en so’oso’an Yordan. ¹⁴ Sia medo eng karaiy ni Elia e neiy mouw i kalenta’ i ti’i, i wewenala witu natas en dano i ti’i kasuatan rimekeiy: “Wisa ku’are’en si TUHAN, Empung ni Elia?” Sia si minewe e rano i ti’i, laa o maweteng minea esa nga weka wi’i wo minea esa nga weka ti’ime, takar lumewetouw si Elisa. ¹⁵ Katoroan se rombongan ne nabi se waki Yerikho iti’i nu limoo’omi nisia waki rou’, sea lumila’: “Roh ni Elia en timeka’ mouw witu si Elisa.” Nisea se mineiy matola nisia, laa o mongkotouw sea wia nisia i ka’ayo waki tana’. ¹⁶ Nisea se limila’: “Wa’awa’an loo’on! Witu nelet ne hamba-hambamu i yi’i wawean se lima nga pulu’ tou tuama, se tou-tou lali’iket. Ma’anouw nisea i ti’i mea sumero si tuangmu, e wo’o wona’ sia niadete e Roh ni TUHAN wo i lawa-Nala waki atas e meta’esa’an kuntung ka’apa witu e meta’esa’an kewong.” Elisa si miningkot: “Te’a mouw i perereo mea!” ¹⁷ Ta’an eng katoroan nisea nu mene’ese-ne’esek nisia i ka’ayo minapairangla, takar lumila’ mouw sia: “I reo mouw mea!” Nisea se rimeo lima nga pulu’ tou. Tou-tou i yi’i se simero en telu nga endo eng keurena, ta’a se reiy’ minaatoan ampit si Elia. ¹⁸ Katoroan sea nu marengi wia si Elisa si minena’pe’ waki kota Yerikho,lumila’ mouw sia wia nisea: “Reiy’ ku’a re’en e neiyku mouw i lila’la wia nikoo: Te’a me’a?”

¹⁹ Lumila’ mouw se penduduk eng kota iti’i wia si Elisa: “Wa’awa’anouw loo’on! Reta’na eng kota i yi’i e le’os, tanu e linoo’ ni tuangku, ta’an en dano nyi’a e reiy’ le’os wo wia em banua i yi’i re’eregh se kinera’araghan dade.” ²⁰ Wingkotna: “Edonouw e nesa baki weru i wee niaku wo weeanola wuras witu eng goremna.” Takar sea malila em baki i ti’i wia nisia.