Paweruan en tinuanala ni Yosia

¹ Nu reiy’ mouw i tu si raja si rimeo tou merurla em baya se tu’a-tu’a ne Yehuda wo ne Yerusalem. ² Kamurian mea mouw si raja waki wale ni TUHAN wo mewali-wali nisia em baya ne tou Yehuda wo em baya ne penduduk Yerusalem, em baya ne imam, em baya ne nabi wo se minapekasa tou karengan, waki se rintek i ka’ayo se sela. Ampit em palingan neala sia si minacala e reiy’ samina’asa e lelila’an waki kaol teta’aran e niatola witu em bale ni TUHAN i ti’i. ³ Nu reiy’ mouw i tu rumedeiy mouw si raja tawi en tobol wo siwonna mola en teta’aran witu en sinaru ni TUHAN, kaa laa tumou ampit maki’itla si TUHAN, wo minena-ena’ maki’itla em perenta-perenta-Na, e natoran-natoran-Na wo eng katataapan-katataapan-Na ampit em pakasa’an e nate wo ampit em pakasa’an ni imukur kaa laa mapatena-tena’la e lelila’an en teta’aran neiy i kepatik witu eng kaol i ti’i. Wo se minapekasa rakyat se dimukung en teta’aran i ti’i. ⁴ Raja si minee perenta wia si imam wangko’ Hilkia wo em baya ne imam ransun karua wo wia em baya ne tumetayur em pepalen kaa laa merereu’mi waki bait ni TUHAN e reiy’ sa mina’asa pakakas en siniwo mola i wee si Baal wo si Asyera wo i wee se reiy’ sa mina’asa suraro e langit, laa o tununna mouw em baya nyi’a i ti’i waki luar eng kota Yerusalem waki padang-padang Kidron, wo i aterna mouw e nawuna mea waki Betel. ⁵ Sia si minapaena’la em baya ne imam ni dewa wo’oseiy se pinipo mola ne raja-raja Yehuda kaa laa tumunu en tetule waki kakenturan patulean waki kota-kota Yehuda wo waki kaledong e Yerusalem, o kangkasi se tou-tou se matunu en tetule i wee si Baal, i wee si dewa ni endo, i wee si dewa ni sumedot, i wee e nie’etan-nie’etan ne sumesena’ wo i wee se pakasa’an suraro e langit. ⁶ Alinna mouw em pa’asek-pa’asek berhala waki wale ni TUHAN mea waki luar eng kota Yerusalem, mea waki so’oso’an Kidron, laa o tununna witu wo e linuwekna minarinte’-rinte’ minamuali awu, kamurian i pi’ipikna mola e nawuna witu natas eng kubur ne rakyat karengan. ⁷ Sia si timonga’la en tempa-tempa pesa’amekan e lukar em bitu em bale ni TUHAN, en tampa ne wewene-wewene maayam wuyang i wee si Asyera. ⁸ I reona mola meiy em baya ne imam waki kota-kota Yehuda, laa o sia mu’ulela eng kakenturan-kakenturan patulean, en tampa em baya ne imam i ti’i matunu en tetule, waki Geba i ka’ayo e Bersyeba; i ronga’na mola kangkasi e kakenturan-kakenturan patulean em pepalen-pepalen leloangan em bitu en tawi em po’opot em pepalen leloangan ni Yosua, makua-kuasa eng kota i ti’i, em bitu esa nga weka kawii sa se tou megheghoremla em pepalen leloangan eng kota i ti’i. ⁹ Ta’an em baya ne imam eng kakenturan-kakenturan patulean i ti’i se reiy’ toro lumongkot mea waki e mezbah TUHAN waki Yerusalem, nisea se toro i te kumaan e roti reiy’ siragi witu eng keuneran ne patuari-patuari nea. ¹⁰ Sia si minu’ulela kangkasi en Tofet em baki kewong Ben-Hinom, rio te’a se tou mesempela seoki-oki’na tanume en tetule witu e napi i wee si dewa Molokh. ¹¹ I tea’na mola se kawalo-kawalo se neiy i reta’la ne raja-raja Yehuda i wee si dewa niendo witu em pepalen maghoreme mea waki wale ni TUHAN, tawi e ruragh ni Natan-Melekh, pegawai istana, si maena’ witu eng gedung li’ilik; o kangkasi eng kareta-kareta ni dewa niendo en tinununa ampit e napi. ¹² Mezbah-mezbah em bitu natas em paa, tampa paroisan ni Ahas, en siniwo ne raja-raja Yehuda, wo e mezbah-mezbah, en siniwo ni Manasye witu e rua pores em bale ni TUHAN, neiy i ronga’la ni raja, wo eng kinemula maname, laa o i pi’ipiknala e nawuna waki so’oso’an Kidron. ¹³ Kakenturan-kakenturan patulean em baki esa nga weka sendangan e Yerusalem waki esa nga weka timu eng kekenturan Kawurukan wo e neiy i redeiyla ni Salomo, raja Israel, i wee si Asytoret, dewa kari’irisan, pasempean ne tou en Sidon, wo i wee si Kamos, dewa kari’irisan pasempean ne Moab, wo i wee si Milkhom, dewa kari’irisan pasempean ne tou Amon, e winu’ulela ni raja. ¹⁴ Sia si minete’la en tugu-tugu berhala wo minele em pa’asek-pa’asek berhala, laa o tawunannala en tampa-tampa i ti’i wuta ampit e ruiy-ruiy ne tou. ¹⁵ O kangkasi e mezbah em baki Betel, eng kakenturan patulean siniwo ni Yerobeam bin Nebat e minua’la se tou Israel minakadosa, e mezbah wo eng kakenturan patulean i ti’i tu’un neiy i ronga’nala wo em batu-batuna em pinete’nala, laa o luwekenna minarinte’-rinte’ minamuali awu wo tununnala em pa’asek berhala. ¹⁶ Wo eng katoroan si Yosia nu lumenge, loo’onna mola eng kuburan-kuburan em bitu eng kuntung maname, laa o rumeo tou medo e ruiy-ruiy waki kubur-kubur i ti’i, tumunula nyi’a witu natas e mezbah wo mu’ulela nyi’a, minatoroan ampit e nuwu’ ni TUHAN e neiy mouw i aleiyla ni abdi ni Empung si minaleiy mola eng kapualitan-kapualitan i yi’i. ¹⁷ Sia si limila’: “Sapa ku’a re’n eng kowa’ keramat e linoo’oku i yi’i?” O laa se tou-tou witu eng kota i ti’i se miningkot nisia: Ni’itu mouw eng kubur ne abdi ni Empung waki Yehuda o meiy wo se minaleiy mola e reiy’ sa mina’asa kapualitan en tinuanamu mola witu e mezbah em Betel i yi’i!” ¹⁸ Laa o pokeiyna: “I waya mola i tu , te’a mouw wawean tou si lumeler e ruiy-ruiy nyi’a!” Jadi se reiy’ rimeung e ruiy-ruiy nyi’a wo e ruiy-ruiy ne nabi se waki Samaria o meiy i ti’i. ¹⁹ O kangkasi e reiy’ sa mina’asa kuil waki kakenturan-kakenturan patulean em baki kota-kota Samaria en siniwo ne raja-raja Israel kaa laa melelentutla e rara ate ni TUHAN neiy i wa’akatla ni Yosia wo witu eng kapualitan i yi’i sia si mininta’ e minakatena-tena’ tanu e winta’na waki Betel. ²⁰ Sia si rimeret witu natas e mezbah-mezbah i ti’i em baya ne imam eng kakenturan-kakenturan patulean se maname wo en tinununa e riuy-ruiy ne tou witu natasna, laa o marengouw sia mea waki Yerusalem. ²¹ Kamurian si raja si minee perenta wia se minapekasa bangsa i ti’i: “Wangko’onola em Paskah i wee si TUHAN, Empungmu, tanu neiy i kepatik witu eng kaol teta’aran i yi’i!” ²² Karengan e reiy’ mouw ma’an mekasa kasi wangko’ela em Paskah tanu ni’itu rengan en zaman em baya ne akim se maperenta witu se Israel wo eng kelabotan en zaman ne raja-raja Israel wo ne raja-raja Yehuda. ²³ Ta’an en tare mouw witu en te’un kamapulu’ o uwalu en zaman ni raja Yosia em Paskah i yi’i e winangko’la i wee si TUHAN waki Yerusalem. ²⁴ Em baya ne mengengeret tou minate, wo em baya ne mengengeret e roh mementi’, o kangkasi en Terafim, berhala-berhala wo se reiy’ sa mina’asa dewa kari’irisan se kaloo’an waki tana’ Yehuda wo e Yerusalem se rine’ila ni Yosia ampit e maksut mapatena-tena’la e lelila’an en Taurat neiy i kepatik witu eng kaol eng kina’atoanola ni imam Hilkia waki wale TUHAN. ²⁵ Nu reiy’pe’ nisia e reiy’la si raja tanu nisia si minurikit wia si TUHAN ampit em pakasa’an e natena, ampit em pakasa’an ni imukurna wo ampit em pakasa’an eng kaente’anna, minatoroan ampit e reiy’ sa mina’asa en Taurat ni Musa; wo nu reiy’ mouw nisia reiy’ mola si timo’or kasi si tanu nisia. ²⁶ Ta’an si TUHAN si reiy’ sime’epangi waki upi’-Na eng kasa melaya-layas i ti’i en timo’orola witu se Yehuda eng karengan e reiy’ sa mina’asa rara ate-Na e neiy i lentutla ni Manasye. ²⁷ Laa o mee mouw nuwu’ si TUHAN: “O kangkasi se tou Yehuda se laa-Ku i wa’akatla waki sinaru-Ku tanu Niaku nu mina’akatla se tou Israel, wo Niaku ku laa tumea’ eng kota pineleng-Ku i yi’i, nyi’a i yi’i e Yerusalem, wo em bale i yi’i, Ma’anouw tu’u Aku minee mola nuwu’ en tanume nyia’: Ngaran-Ku e laa mena’ maname!” ²⁸ Esa nga lebena waki na’asaren ni Yosia wo e reiy’ sa mina’asa en tinuananala, reiy’ ku’a re’en em baya nyi’a i ti’i neiy i kepatik witu eng kaol sejarah ne raja-raja Yehuda? ²⁹ Witu en zamanna i ti’i maju mouw si Firaun Nekho, raja Mesir, mesesaru si raja Asyur waki li’ilik en so’oso’an Efrat; raja Yosia si minea sumarula nisia; ta’an si Firaun si minunu’ nisia waki Megido, makarengan sia nu linoo’ona mola. ³⁰ Pegawai-pegawaina se minateri e mayatna ampit eng kareta waki Megido wo minali nyi’a mea waki Yerusalem, kamurian sea kumuburla nisia witu eng kuburna nuesa. Takar se rakyat em banua i ti’i se simungkul si Yoahas,oki’ ni Yosia, misu’la nisia wo mopo nisia minamuali raja simawelela si ama’na.

³¹ Yoahas si makaumur rua nga pulu’ o telu nge te’un witu e nedo sia nu minamuali raja wo en telu nga sumedot sia nu maperenta waki Yerusalem. Ngaran ni ina’na nyi’a mouw si Habutal binti Yeremia, waki Libna. ³² Sia si matuanala sapa e lewo’ witu em beren ni TUHAN e minakatena-tena’ tanu en tinuanala ne nene moyangna. ³³ Firaun Nekho si kimalero nisia waki Ribla, waki tana’ Hamat, rio te’a sia mepeperenta waki Yerusalem; o kasi si Firaun si minesa’anla witu em banua i ti’i en denda kasela esa nga atus talenta perak wo e mapulu’ talenta mas.

³⁴ Firaun Nekho si minopola si Elyakim, oki’ ni Yosia, minamuali raja, simawelela si Yosia, ama’na, wo si timo’orla e ngaranna ampit e Yoyakim. Ta’an si Yoahas si nialina; Yoahas nu i ka’ayola waki Mesir wo mate maname. ³⁵ Yoyakim si minee e mas wo em perak i ti’i wia si Firaun, ta’an nisia si makeongi pajak waki wanua rio toro meela e loit i ti’i, e minatoroan ampit en titah ni Firaun. Sia si meingkul e mas wo em perak i ti’i waki se rakyat em banua, waki se susur tou i ki’it eng kelakerna eng katataapan em pajakna, kaa laa i peweweenala wia si Firaun Nekho.

Yoyakim, raja Yehuda

³⁶ Yoyakim si makaumur rua nga pulu’ o lima nge te’un witu e nedo sia nu minamuali raja wo e mapulu’ o esa nge te’un sia nu maperenta waki Yerusalem. Ngaran ni ina’na nyi’a mouw si Zebuda binti Pedaya, waki Ruma. ³⁷ Sia si matuanala sapa e lewo’ witu em beren ni TUHAN e minakatena-tena’ tanu en tinuanala ne nene moyangna.