¹ Yosia si makaumur uwalu nge te’un witu e nedo sia nu minamuali raja wo en telu nga pulu’ o esa eng keurena sia nu mapernta waki Yerusalem. Ngaran ni ina’na nyi’a mouw e Yedida binti Adaya, waki Bozkat. ² Sia si matuanala sapa e nulit witu em beren ni TUHAN wo matou-tou masuat ampit si Daud, ama’ opo’na, wo si reiy’ mase’epang mea lele’os ka’apa mea kawii. ³ Witu en te’un kamapulu’ o uwalu en zaman ni raja Yosia takar si raja si rimeo si Safan bin Azalya bin Mesulam, si panitera i ti’i, mea waki wale ni TUHAN, pokeiyna: ⁴ “Mea mouw wia si imam wangko’ Hilkia; i reo mouw sia sumarakan e minapekasa loit e niali mola waki ghorem em bale ni TUHAN e nierurola ne tumetayur-tumetayur waki weteng ne rakyat; ⁵ le’osouw i tu i wee neala witu e lawas em baya ne memema’ayang se pinopo kaa laa mategha’la em bale ni TUHAN, rio i weela wia se meneniwo-meneniwo se witu em bale ni TUHAN kaa laa melele’osla eng katerian em bale i ti’i, ⁶ nyi’a i ti’i wia se meneniwo-meneniwo eng kayu, se meneniwo-meneniwo em bangunan wo se meneniwo-meneniwo eng kedir beton, o kangkasi i wee em pinatelesan eng kayu wo em batu pepa’at kaa laa melele’osla em bale i ti’i. ⁷ Ta’an e reiy’ mouw perlu mesesiwola rerekenan ampit nisea tanume e loit neiy i weela witu e lawas nea, karengan nisea se mepa’ayang ampit en jujur.” ⁸ Lumila’ mouw si imam wangko’ Hilkia, wia si Safan, panitera i ti’i: “E niatoku mola eng kaol Taurat i ti’i waki wale ni TUHAN!” O laa si Hilkia si mineela eng kaol i ti’i wia si Safan, wo si Safan si mapawee-wee minaca nyi’a. ⁹ Kamurian si Safan, panitera i ti’i, ghumorem sumaru si raja, i pa’ayona mola e nabar tanume e ni’itu wia si raja: “Hamba-hambamu i yi’i se minedo mola e minapekasa loit e niato witu em bale ni TUHAN wo meela nyi’a witu e lawas em baya ne memema’ayang se pinopo mategha’la em bale i ti’i.” ¹⁰ Safan, si panitera i ti’i, si minakite’ula kangkasi wia si raja: “Imam Hilkia si minee mola eng kaol wia niaku,” o laa si Safan si minacala nyi’a witu en saruan ni raja. ¹¹ Makarengan nu reiy’ mouw si raja nu limingala e lelila’an eng kaol Taurat i ti’i, o kurensangenna mola e labungna. ¹² Kamurian si raja si minee perenta wia si imam Hilkia, wia si Ahikam bin Safan, wia si Akhbor bin Mikha, wia si Safan, panitera i ti’i, wo wia si Asaya, hamba ni raja, pokeiyna: ¹³ “Mea mouw, kumiwee mouw en teturu ni TUHAN i wee niaku, i wee se rakyat wo i wee se minapekasa Yehuda, tanume e lelila’an eng kaol niatola i yi’i, karengan eng hebat eng kenanaran e nupi’ ni TUHAN e melaya-layas witu nikita, eng karengan se nene moyang ta se reiy’ minelelingala e lelila’an eng kaol i yi’i ampit en sumiwola e minakatena-tena’ tanu neiy i kepatik witu eng gorem e nyi’a.” ¹⁴ Takar mea mouw si imam Hilkia, Ahikam, Akhbor, Safan wo si Asaya wia si nabiah Hulda, ka’awu niesa tou si meurus e labung-labung, nyi’a i ti’i si Salum bin Tikwa bin Harhas; nabiah i ti’i si maena’ waki Yerusalem, waki pewanua’an weru. Nisea se minakite’ula em baya nyi’a wia nisia. ¹⁵ Wewene i ti’i si miningkot nisea: “Teinti’i mouw e nuwu’ ni TUHAN, Empung Israel! I lila’ mola wia sitou si rimeomi nikouw wia-Niaku! ¹⁶ Teinti’i mouw e nuwu’ ni TUHAN: Eng kaulitna Niaku ku laa mapa eiy eng kacilaka’an wia en tampa i yi’i wo wia se pendudukna, nyi’a i yi’i e reiy’ sa mina’asa lelila’an eng kaol em binaca mola ni raja Yehuda; ¹⁷ karengan nisea se timele’ula Niaku wo matunu tetule wia si empung walina ampit e maksut melelentutla e rara ate-Ku ampit e reiy’ sa mina’asa em pepa’ayangen e lawas nea; kaa ni’itu eng kenanaran e nupi’-Ku e laa melaya-layas wia en tampa i yi’i ampit e reiy’ laa mepate-pate. ¹⁸ Ta’an wia si raja Yehuda, si rimeo momi nikouw kaa meiy kumiwee en teturu’ ni TUHAN, e lewo’ sa reiy’ i lila’ miouwla en tuana: Teinti’i mouw e nuwu’ ni TUHAN, Empung Israel: Tanume e lelila’an e liningamu mola i ti’i, ¹⁹ eng karengan nikoo koo mineneselola wo koo kimumengola en tou witu en sinaru ni TUHAN witu e nedo nikoo nu liminga e nukuman neiy-Ku i nuwu’la witu en tampa i yi’i wo witu se pendudukna, kaa nisea se laa mereringka’la wo mamuali kutok, wo eng karengan nikoo koo kimurensangla e labungmu wo mame’ witu en sinaru-Ku, Niaku tu’u ku liminga mola nyi’a, tuana mouw e nuwu’ ni TUHAN, ²⁰ kaa ni’itu, eng kaulitna Niaku ku merurla nikoo wia se nene moyangmu, wo nikoo koo laa i le’osla witu eng gorem eng kuburmu ampit en dame, wo em berennu e reiy’ laa lumoo’ e reiy’ sa mina’asa kacilaka’an e laa i pa’eiy-Kula wia en tampa i yi’i.” Laa o sea ma’ayola e wewingkot i ti’i wia si raja.