¹ Manasye si makaumur mapulu’ o rua nge te’un witu e nedo sia nu minamuali raja wo e lima nga pulu’ o lima nge te’un eng keurena sia nu maperenta waki Yerusalem. Ngaran ni ina’na nyi’a mouw e Hefzibah. ² Sia si matuanala sapa e lewo’ witu em beren ni TUHAN, minatoroan ampit em pasiwo-siwon kasa wu’ul ne bangsa-bangsa se neiy mouw i sere’mi ni TUHAN waki rerior ne tou Israel. ³ Sia si rimedeiyla sumeup eng kakenturan-kakenturan patulean em pinunengola ni Hizkia, ama’na; sia si maredeiy e mezbah-mezbah i wee si Baal, masiwo si patong Asyera tanu en tinuanala ni Ahab, raja Israel, wo maongkot masempe wia se pakasa’an suraro e langit wo meraghes wia nisia. ⁴ Sia si rimedeiyla e mezbah-mezbah witu em bale ni TUHAN, ma’anouw tu’u e minato’orongan ampit em bale i ti’i TUHAN si minuwu’ mola: “Waki Yerusalem Niaku ku laa meela e ngaran-Ku!” ⁵ Wo nisia si rimedeiyla kangkasi e mezbah-mezbah i wee se pakasa’an suraro e langit witu e rua pores em bale ni TUHAN. ⁶ Awes tare, sia si minapasempela sioki’na tanume si tetule witu e napi, mawenti’ wo matebo, wo melaami em baya ne mengengeret se minate wo em baya ne mementi’. Sia si matuanala kelaker e lewo’ witu em beren ni TUHAN, i ka’ayo sia limentutla e rara ate-Na. ⁷ Sia si mineela kangkasi si patong Asyera si siniwona mola witu eng gorem em balena, ma’anouw tu’u e minato’orongan ampit em bale i ti’i TUHAN si minuwu’ mola wia si Daud wo wia si Salomo, oki’na: “Wia em bale i yi’i wo waki e Yerusalem, em pineleng-Ku mola waki elet ne reiy’ sa mina’asa suku Israel, Niaku ku laa meela e ngaran-Ku i wee eng keure-urena! ⁸ Niaku ku reiy’ laa mayala se bangsa Israel kasi alin rumou’mi waki tana’ e neiy-Ku mouw i weela wia se nene moyang nea, asal i te nisea se minena-ena’ masiwola e minakatena-tena’ tanu neiy-Ku mouw i perentala wia nisea wo e minakatena-tena’ i ki’it e nukum neiy mouw i perentala ni hamba-Ku Musa wia nisea.” ⁹ Ta’an nisea se so’o melelingala, wo si Manasye si simeipla nisea, i ka’ayo sea timuanala e lewo’ e lebepe’ ta’an se bangsa-bangsa se pinunengola ni TUHAN waki sinaru ne tou Israel. ¹⁰ Kamurian o mee mola nuwu’ si TUHAN ampit e nieletan em baya ne hamba-Na, nyi’a i yi’i em baya ne nabi: ¹¹ “Eng karengan si Manasye, raja Yehuda, si tumuana mola eng kawu’ulan-kawu’ulan i yi’i, simiwo e lewo limebela waki e reiy’ sa mina’asa en tinuana mola ne tou Amori se rimeriorla nisia, wo ampit em berhala-berhalana nisia si minua’ mola se tou Yehuda se minakadosa kangkasi, ¹² kaa ni’itu en teinti’i mouw e nuwu’ ni TUHAN, Empung Israel: Eng kaulitna Niaku ku laa mapa eiy eng kacilaka’an witu e Yerusalem wo e Yehuda, i ka’ayo susur tou se luminga nyi’a e laa ngumengeng e rua talingana. ¹³ Wo Niaku ku laa rumentengla witu e Yerusalem en tali peukur masuat tanu witu en Samaria wo en tali leloot masuat tanu witu se me’urang ni Ahab; wo Niaku ku ghumosola e Yerusalem tanu se tou maghoso em baki, nyi’a i yi’i nu pinakaghoso mola, ni’i purikitouw kasi tumuang. ¹⁴ Niaku ku laa metetea’la en tele’u kapunya’an pusaka-Ku wo laa sumarakanla nisea witu e lawas ne kesaru-kesaru nea, i ka’ayo sea mamuali paremu’an wo mamuali pekaatan i wee em baya ne kesaru nea, ¹⁵ eng karengan nisea se timuana mola sapa e lewo’ witu em beren-Ku wo ampit en tuana nisea se limentutola e rara ate-Ku, muleiymi waki e nendo se nene moyang nea nu rimou’mi waki Mesir i ka’ayo e nendo i yi’i.” ¹⁶ Awes kangkasi si Manasye si timoa’la e raa’ ne tou reiy’ siselok en tuana eng kelaker, i ka’ayo e winutanala waki Yerusalem waki tempok mea waki tempok, reiy’pe’ neiy i kaghorem en dosa-dosana e minua’la se tou Yehuda se minakadosa kangkasi ampit e simiwo sapa e lewo’ witu em beren ni TUHAN. ¹⁷ Esa nga lebena waki na’asaren ni Manasye, e reiy’ sa mina’asa en tinuananala wo en dosa-dosa siniwonala, reiy’ ku’a re’en em baya nyi’a i ti’i neiy i kepatik witu eng kaol sejarah ne raja-raja Yehuda? ¹⁸ Kamurian si Manasye si minaka’ato paena’an mewali-wali se nene moyangna wo nisia si kinuburla witu en taman e istanana, waki taman Uza. Takar si Amon, oki’na, si minamuali raja simawelela nisia.

¹⁹ Amon si makaumur rua nga pulu’o rua nge te’un witu e nedo sia nu minamuali raja wo e rua nge te’un eng keurena sia nu mapernta waki Yerusalem. Ngaran ni ina’na nyi’a mouw e Mesulemet binti Harus waki Yotba. ²⁰ Sia si matuanala sapa e lewo’ witu em beren ni TUHAN tanu en tinuana mola ni Manasye, ama’na.