¹ Witu en te’un kamapulu’ o rua en zaman ni Ahas, raja Yehuda, Hosea bin Ela si minamuali raja waki Samaria witu se Israel. Sia si minerenta siouw nge te’un eng kaurena. ² Sia si matuanala sapa e lewo’ witu em beren ni TUHAN, ta’an si reiy’ tanu se raja-raja Israel se rimeriorla nisia. ³ Salmaneser, raja Asyur si minaju sumaru nisia; Hosea si tu’utuk wia nisia ma’an mawear upeti. ⁴ Ta’an ka’atoanola ni raja Asyur, kaa waki weteng ni Hosea wawean paasa-asa’an, karengan si Hosea si minepelaa mouw se tetoke-tetoke wia si So, raja Mesir, wo si reiy’ mouw masempela kasi upeti wia si raja Asyur, tanu eng kenaramen en te’un lumaa en te’un; kaa ni’itu si raja Asyur si simikop nisia wo tumorongku nisia witu em pejara. ⁵ Kamurian maju mouw si raja Asyur tumerok em banua i ti’i, sia rumego en Samaria wo kumepung nyi’a telu nge te’un eng keurena. ⁶ Witu en te’un kasiouw en zaman ni Hosea takar si raja Asyur si rimo’obit en Samaria. Sia si minater se tou-tou Israel mea waki Asyur witu em pasea’an wo rumeo nisea mena’ waki Halah, waki li’ilik en so’oso’an Habor, nyi’a i yi’i en so’oso’an wanua Gozan, wo waki kota-kota ne tou Madai.

⁷ Kapualitan i ti’i e minamuali, karengan se tou Israel se minakadosa mouw wia si TUHAN, Empung nea, si rimawiromi nisea waki tana’ Mesir waki kakuasa’an ni Firaun, raja Mesir, wo eng karengan nisea se simempe mola si empung walina, ⁸ Wo se timou mouw maki’it eng kenaramen ne bangsa-bangsa se neiy mouw i sere’mi ni TUHAN waki rerior ne tou Israel, wo maki’it eng katataapan en siniwo mola ne raja-raja Israel.

⁹ Wo se tou Israel se kimelangola eng kapualitan-kapualitan reiy’ waar witu si TUHAN, Empung nea. Nisea se rimedeiyla eng kakenturan-kakenturan patulean wisa tu’u sea maena’, le’os tawi em pewale petayuran ka’apa tu’u waki kota makarereen; ¹⁰ nisea se rimrdeiyla en tugu-tugu berhala wo em pa’asek-pa’asek berhala witu natas en susur kakenturan rakek wo witu e wawa’ en susur nakana rirung; ¹¹ maname waki atas e reiy’ sa mina’asa kakenturan i ti’i nisea se matunu en tetule tanu se bangsa-bangsa se neiy mouw i ater ni TUHAN kinetaangan waki rerior nea; nisea se matuanala eng kapualitan-kapualitan e lewo’ i ka’ayo sea limentutla e rara ate ni TUHAN; ¹² nisea se meraghes wia se berhala-berhala, ma’anouw tu’u si TUHAN si minee mola nuwu’ wia nisea: “Te’a mouw kouw masiwo tanu e ni’itu!” ¹³ TUHAN si ngime’enge’ mola wia se tou Israel wo wia se tou Yehuda ampit nieletan em baya ne nabi wo em baya ne tumetebo: “Murikitomi kouw waki lalan-lalanmu e lewo’ i ti’i wo mena-ena’ mouw kumi’itla e reiy’ sa mina’asa em perenta wo eng katataapang-Ku, minatoroan ampit e reiy’ sa mina’asa undang-undang e neiy-Ku mouw i perentala wia se nene moyangmu wo e neiy-Ku mouw i pa’ayola wia nisea ampit e nieletan ne hamba-hamba-Ku, em baya ne nabi.” ¹⁴ Ta’an nisea se so’o minelelingala, ta’an i te nisea se kimetela e lo’ongna tanu se nene moyangna se reiy’ ma’eman wia si TUHAN, Empung nea. ¹⁵ Nisea se simede’ eng katataapan-Na wo en teta’aran-Na, en siniwo mola ampit se nene moyang nea, o kangkasi e natoran-natoran-Na e neiy mouw i nge’enge’-Nala wia nisea; nisea se maki’itla si dewa reiy’ sipenoron, i ka’ayo sea maki’itla se bangsa-bangsa se witu eng kaledong nea, ma’anouw tu’u si TUHAN si minerenta mola wia nisea: te’a mouw masiwo en tanu nisea i ti’i. ¹⁶ Nisea se timele’u mola e reiy’ sa mina’asa em perenta ni TUHAN, Empung nea, wo simiwo mola se rua sapi tinoa’; o kangkasi nisea se simiwo si patong Asyera, maongkot masempe wia se pakasa’an suraro e langit wo meraghes wia si Baal. ¹⁷ awesla kangkasi nisea se masempela se oki-oki’na tanume en tetule witu e napi wo matuanala en sobar wo e wenti’ wo mapabudak en tou ampit matuanala e lewo’ witu em beren ni TUHAN, i ka’ayo sea limentutla e rara ate-Na. ¹⁸ Kaa ni’itu si TUHAN si kasa meupi’ wia se Israel, wo mina’akati nisea waki sinaru-Na; reiy’la si timele’u kacuali se suku Yehuda i te. – ¹⁹ O kangkasi si Yehuda si reiy’ timiboiy witu em perenta ni TUHAN, Empung nea, ta’an nisea se matou-tou maki’it eng katataapan en siniwo mola ni Israel, ²⁰ jadi si TUHAN si simede’ se pakasa’an see’ ni Israel: Sia si limotoiy nisea wo simarakanla nisea witu se rumerampok-rumerampok, i ka’ayo mina’apu sea neiy i tea’-Nami waki sinaru-Na. – ²¹ Katoroan Sia nu kimurensangla e Israel waki se me’urang ni Daud, takar nisea se minopo si Yerobeam bin Nebat minamuali raja, ta’an si Yerobeam si simiwo se tou Israel sime’epangi waki maki’itla si TUHAN wo e minua’la nisea se matuanala en dosa kewangko’. ²² Tuana mouw se tou Israel matou-tou maki’it e reiy’ sa mina’asa dosa en tinuana mola ni Yerobeam; nisea se reiy’ mina’akati nyi’a, ²³ i ka’ayo si TUHAN nu mina’akati se tou Israel waki sinaru-Na tanu e neiy mouw i nuwu’-Nala ampit e nieletan em baya ne hamba-Na, em baya ne nabi. Tou Israel se neiy i ateri waki tana’na mea waki Asyur witu em pasea’an. Tuana mouw i ka’ayomi e nendo i yi’i.

Tou-tou en Samaria

²⁴ Raja Asyur si minateri tou waki Betel, waki Kuta, waki Awa, waki Hamat wo waki Sefarwaim, laa o rumeo nisea mena’ waki kota-kota Samaria sumawelela se tou Israel; takar se tou-tou i ti’i tu’un se rimuberla en Samaria wo mena’ witu eng kota-kotana. ²⁵ Witu eng ketarena e nedo nisea nu maena’ maname nisea se reiy’ meide’la wia si TUHAN, kaa ni’itu si TUHAN si minayala se singa-singa witu nelet nea se minunu’ se pirala tou witu e nelet nea. ²⁶ Laa o lumila’ mouw se tou wia si raja Asyur: “Bangsa-bangsa se neiy i ateri ni tuangku kinetaangan wo se neiy i reo ni tuangku mena’ wia eng kota-kota Samaria se reiy’ makasine’u e nukum meraghes wia si Empung em banua i ti’i, kaa ni’itu i waya-Na mola se singa-singa witu e nelet nea eng kaulitna se minunu’ nisea, eng karengan nisea se reiy’ makasine’u e nukum meraghes wia si Empung em banua i ti’i.”

²⁷ O laa si raja Asyur si minee perenta: “I reo mouw mea maname si meta’esa’an imam si neiy mouw i ater miouwmi maname mea witu em pasea’an. Ma’anouw sia mea wo mena’ maname wo maturu’la wia nisea e nukum meraghes wia si Empung em banua i ti’i!” ²⁸ Meta’esa’an imam si neiy mouw i ater neami waki Samaria mea witu em pasea’an si minea wo mena’ waki Betel. Sia si maturu’la wia nisea kumura e lewo’ sa reiy’na lumukar wia si TUHAN. ²⁹ Ta’an susur se bangsa i ti’i se simiwo mola si empungna nuesa wo timampala nisia witu eng kuil waki atas eng kakenturan-kakenturan patulean, en siniwo ne tou-tou Samaria; susur bangsa se mawinta’ en tuana witu eng kota-kota paena’an nea: ³⁰ tou-tou em Babel se simiwo si patong Sukot-Benot, tou-tou eng Kuta se simiwo si patong Nergal, tou-tou eng Hamat se simiwo si patong Asima, ³¹ wo se tou-tou Awa se simiwo si patong Nibhas wo si Tartak. Tou-tou en Sefarwaim se matunu se oki-oki’ nea tanume si tetule i wee si Adramelekh wo si Anamelekh, em baya se empung waki Sefarwaim. ³² Witu eng kasuatan e ni’itu nisea se malukar wia si TUHAN wo minopomi waki kaledong nea si imam i wee eng kakenturan-kakenturan patule’an, takar se tou-tou i yi’i mouw se matuanala e raghes i wee nisea witu eng kuil waki atas eng kakenturan-kakenturan patulean i ti’i. ³³ Nisea se malukar wia si TUHAN, ta’an witu e ni’itu nisea se meraghes wia si empung nea minatoroan ampit e nadat ne bangsa-bangsa waki eletna nisea se neiy i ater kinetaangan. ³⁴ I ka’ayo e nendo i yi’i nisea se masiwo e minatoroan ampit e nadat ketareanna. Nisea se reiy’ malukar wia si TUHAN wo se reiy’ masiwo e minatoroan ampit eng katataapa, nukum, undang-undang wo em perenta neiy i perentala ni TUHAN wia se oki-oki’ ni Yakub se nginaranan-Na mola Israel. ³⁵ TUHAN si simiwo mola teta’aran ampit nisea wo minee perenta wia nisea: “Te’a mouw malukar wia si empung walina, te’a mouw maongkot masempe wia nisia, te’a mouw meraghes wia nisia wo te’a mouw masempela tetule wia nisia. ³⁶ Ta’an si TUHAN si timeperomi nikouw waki tana’ Mesir ampit eng kaente’an wangko’ wo ampit e lawas neiy i ka’ayat, wia-Nisia mouw kouw lewo’ sa reiy’ lumukar, wia-Nisia mouw kouw lewo’ sa reiy’ mongkot sumempe wo sumempela en tetule. ³⁷ Ta’an nikouw kouw lewo’ sa reiy’ tumiboiy wia eng katataapan-katataapan, natoran-natoran, nukum wo em perenta e neiy mouw i patik-Na i wee nikoo ampit en timuanala nyi’a reiy’ maena-ena’ ampit e lale’, wo te’a mouw kouw melelukar wia se empung-empung walina. ³⁸ Te’a mouw kouw meleliurla en teta’aran en siniwo-Ku mola ampit nikouw wo te’a mouw kouw melelukar wia si empung walina, ³⁹ ta’an i te wia si TUHAN, Empungmu, kouw lewo’ sa reiy lumukar, takar nisia si laa mayami nikouw waki lawas em baya ne kesarumu.” ⁴⁰ Ta’an nisea se so’o minelelingala, ta’an i te nisea se simiwo e minatoroan ampit e nadat nea eng ketareanna. ⁴¹ Tuana mouw se bangsa-bangsa i yi’i malukar wia si TUHAN, ta’an witu e ni’itu nisea se meraghes kangkasi wia se patong-patong nea; le’os se oki-oki’ nea ka’apa tu’un se puyun cece nea se matuanala tanu en tinuana mola ne nene moyang nea, i ka’ayomi e nendo i yi’i.