¹ Witu en te’un kamapulu’ o pitu en zaman ni Pekah bin Remalya, Ahas oki’ ni Yotam raja Yehuda si minamuali raja. ² Ahas si makaumur rua nga pulu’ nge te’un witu e nedo sia nu minamuali raja wo mapulu’ o enem nge te’un eng keurena sia maperenta waki Yerusalem. Sia si reiy’ matuanala sapa e nulit witu em beren ni TUHAN, Empungna, tanu si Daud, ama’ opo’na, ³ ta’an nisia si matou-tou maki’it eng kapawinta-winta’ ne raja-raja Israel, awes tare si minapasempela sioki’na tanume si tetule witu e napi, minatoroan ampit em pasiwo-siwon kasa wuruk ne bangsa-bangsa se neiy mouw i sere’mi ni TUHAN waki rerior ne bangsa Israel. ⁴ Sia si minapasempela wo matunu tetule waki kakenturan-kakenturan patulean wo waki atas en tampa-tampa kerakekan wo witu e wawa’ e nakana rirung. ⁵ Witu e nedo ni’itu maju mouw si Rezin, raja Aram, wo si Pekah bin Remalya, raja Israel, kaa laa meseseke’la e Yerusalem. Wo sea kumepung si Ahas, ta’an nisea se reiy’ mete’u kumalala nisia. ⁶ Witu e masa ni’itu si Rezin, raja Aram, si minarengla e Elat wia si Edom, laa o sia mure’mi se tou-tou Yehuda waki Elat. Meiy mouw se tou-tou Edom mineiy waki Elat wo minena’ maname i ka’ayomi e nendo i yi’i. ⁷ Ahas si rimeo se tetoke-tetoke wia si Tiglat-Pileser, raja Asyur, lumila’la: “Niaku i yi’i ku hambamu wo oki’mu. Maju mouw wo lawirenola aku waki lawas ni raja Aram wo waki lawas ni raja Israel, se timo’oromi marego niaku.” ⁸ Ahas si minedo em perak wo e mas e niato witu em bale ni TUHAN wo witu em penu’utu-nu’utulan e istana ni raja, wo minapa’alila nyi’a wia si raja Asyur tanume en sesempe. ⁹ Takar si raja Asyur si limingala em pengiweenna wo maju sumaru en Damsyik, rimo’obit nyi’a wo minater se pendudukna kinetaangan mea waki Kir, ta’an si Rezin si winunu’na. ¹⁰ Nu reiy’ mouw i tu mea mouw si raja Ahas matola si Tiglat-Pileser, raja Asyar, mea waki Damsyik. Nu reiy’ mouw si raja Ahas nu limoo’ e mezbah em baki Damsyik, i papa’alina mouw wia si imam Uria e nukuran wo eng gambar e mezbah i ti’i, i ki’it eng kesesiwona e makatena-tena’. ¹¹ O laa i redeiyla ni imam Uria e mezbah ; minakatena-tena’ tanu eng katerangan neiy i papa’alimi ni raja Ahas waki Damsyik. ¹² Nu reiy’ mouw si raja nu minarengi waki Damsyik, takar si raja si limoo’ola e mezbah i ti’i. Laa o tumawi mouw si raja witu e mezbah i ti’i, lumongkot witu natasna, ¹³ tumunu en tetule tinununa wo en tetule sesakeiyna, timoa’la en tetule tetoa’na witu natas e mezbah i ti’i, wo sumerewla e raa’ en tetule kelawiranna witu nyi’a. ¹⁴ Ta’an nisia si rimeo minensongla e mezbah tambaga em bitu en sinaru ni TUHAN waki saruan em bale ni TUHAN, waki elet e mezbah weru ampit em bale i ti’i, wo meela nyi’a witu esa nga weka amian e mezbah weru i ti’i. ¹⁵ Kamurian si raja Ahas si minerentala wia si imam Uria: “Tumunu mouw witu natas e mezbah wangko’ i ti’i en tetule tinunu memo’odo wo en tetule sesakeiy mawengindo, o kangkasi en tetule tinunu wo en tetule sesakeiy ni raja, o kasi en tetule tinunu wo en tetule sesakeiy wo en tetule-tetule neiy i toa’ ne minapekasa rakyat em banua; wo i serewola wia nisia em pakasa’an e raa’ en tetule tinunu wo em pakasa’an e raa’ en tetule rineret; ta’an e mezbah tambaga i ti’i nyi’a mouw e nurusangku.” ¹⁶ O laa si imam Uria si timuanala e minakatena-tena’ tanu neiy i perentala ni raja Ahas. ¹⁷ Nu reiy’ mouw i tu si raja Ahas si kimetor em papang pepenet eng kareta patobol wo sumingkiri eng kure’ paoasan waki atasna, o kangkasi en “tasik” i ti’i neiy i tumpanami waki atas ni sapi tambaga si dimukung nyi’a wo meela nyi’a witu natas en to’otolan watu. ¹⁸ Tumodongla nyi’a, demi si raja Asyur, neiy i singkirnami waki wale ni TUHAN em podol minapenet i wee e nendo Sabat e neiy mouw i redeiyla witu em bale ni TUHAN, o kangkasi em pepalen maghorem i wee si raja em bitu esa nga weka luar. ¹⁹ Esa nga lebena waki na’asaren ni Ahas wo en sapa en tinuananala, reiy’ ku’a re’en em baya nyi’a i ti’i neiy i kepatik witu eng kaol sejarah ne raja-raja Yehuda? ²⁰ Kamurian si Ahas si minaka’ato paena’an mewali-wali ampit se nene moyangna, wo nisia si neiy i kuburla witu e li’ilik ne nene moyangna waki kota Daud. Takar si Hizkia , oki’na, si minamuali raja simawelela nisia.