¹ Witu en te’un karua en zaman ni Yoas bin Yoahas, raja Israel, Amazia, oki’ ni Yoas raja Yehuda si minamuali raja. ² Sia si makaumur rua nga pulu’ o lima nge te’un witu e nedo sia nu minamuali raja wo e rua nga pulu’ o siouw eng keurena sia nu maperenta waki Yerusalem. ³ Sia si matuanala sapa e nulit witu em beren ni TUHAN, ta’an i te e reiy’ tanu si Daud, ama opo’na. Sia si simiwo e minakatena-tena’ tanu em pasiwon ni Yoas, ama’na. ⁴ Ma’anouw tu’u tuana, eng kakenturan-kakenturan patulean e reiy’ neiy i wa’akatla. Bangsa i ti’i se masempepe’la wo matunu en tetule waki kakenturan-kakenturan i ti’i. ⁵ Makarengan nu reiy’ mouw eng kuasa keraja’an i ti’i en te’etepouw witu e lawasna, wunu’unna mola se pegawai-pegawaina se minunu’ mola si raja, nyi’a i ti’i si ama’na. ⁶ Ta’an se oki-oki’ em baya ne minunu’ i ti’i se reiy’ niukumna paten, tanu neiy i kepatik witu eng kaol Taurat ni Musa, witu e wisa si TUHAN si minee mola perenta: “Te’a mouw si ama’ ukumen paten karengan sioki’na, te’a mouw kangkasi sioki’ si ukumen paten karengan si ama’na, ta’an i te susur tou si lewo’ sa reiy’ ukumen paten karengan en dosana nuesa.” ⁷ Sia si kimalala si Edom waki Kewong Wurasen, se mapulu’ nga riwu tou eng kelakerna, wo rimo’obit en Sela witu em paseke’an i ti’i, laa o ngarananna mola eng kota i ti’i Yokteel; en tuana mouw i ka’ayomi e nendo i yi’i. ⁸ Witu e nedo ni’itu Amasia si rimeo tetoke wia si Yoas bin Yoahas bin Yehu, raja Israel, lumila’la: “Meiy mouw kita sumaka’ eng keter!” ⁹ Ta’an si Yoas, raja Israel, si rimeo tou wia si Amazia, raja Yehuda, lumila’la: “Rukut tetunean em baki kuntung Libanon minapa’ali e nower wia si akana aras si waki kuntung Libanon, em palingan: ”I wee mola sioki’mu wewene wia sioki’ku tuama mamuali ka’awuna. Ta’an se sumesena’-sumesena’ en talun se waki kuntung e Libanon i ti’i se makelang limangkoiymi maname, laa o lume’ek e rukut tetunean i ti’i. ¹⁰ Memang nikoo koo kimala mola si Edom, kaa ni’itu koo mina tingkeiy mouw. Awesouw i wee nikoo minaka’ato eng kaormatan i ti’i wo mena’ mouw witu em balemu. I wee en sapa koo mekawar eng kacilaka’an, i ka’ayo koo i ka’anu wo si Yehuda si mewali-wali nikoo?” ¹¹ Ta’an si Amazia si so’o minelelingala, kaa ni’itu maju mouw si Yoas, raja israel, laa o mesesaka’anouw eng keter sea, sia wo si Amazia, raja Yehuda, waki Bet-Semes neiy i kaghorem wilayah Yehuda. ¹² Yehuda si kinawewean minekala ne Israel, i ka’ayo siesa o siesa se timingkas minea waki dasingna. ¹³ Yoas, raja Israel si simikop si Amazia, raja Yehuda, oki’ ni Yoas bin Ahazia, waki Bet-Semes. O laa si Yoas si ghimoreme waki Yerusalem, wo ghumoghar em beton Yerusalem waki Pepalen Leloangan Efraim i ka’ayo waki Pepalen Leloangan Ruuna, e nepat nga atus hasta eng kelabotna. ¹⁴ Nu reiy’ mouw i tu sia medo e reiy’ sa mina’asa mas wo em perak wo e reiy’ sa mina’asa pakakas e niato witu em bale ni TUHAN wo witu em penu’utu-nu’utulan e istana ni raja, o kangkasi se tou-tou tinaang, kamurian marengouw sia waki Samaria. ¹⁵ Esa nga lebena waki na’asaren ni Yoas, sapa en tinuananala wo eng kapahlawananna wo kumura sia maseke’ mesaru si Amazia, raja Yehuda, reiy’ ku’a re’en em baya nyi’a i ti’i neiy i kepatik witu eng kaol sejarah ne raja-raja Israel? ¹⁶ Kamurian si Yoas si minaka’ato paena’an mewali-wali ampit se nene moyangna, wo nisia si kinuburla waki Samaria witu e li’ilik ne raja-raja Israel. Takar si Yerobeam, oki’na, si minamuali raja simawelela nisia. ¹⁷ Amazia bin Yoas, raja yehuda, si timoupe’ mapulu’ o lima nge te’un eng keurena nu reiy’ mouw eng kinepepate ni Yoas bin Yoahas, raja Israel. ¹⁸ Esa nga lebena waki na’asaren ni Amazia, reiy’ ku’a re’en em baya nyi’a i ti’i neiy i kepatik witu eng kaol sejarah ne raja-raja Yehuda? ¹⁹ Waki Yerusalem se tou se simiwola em paasa-asa’an sumaru nisia, kaa ni’itu tumingkasouw sia waki Lakhis. Ta’an nisea se rimeo ki’iten sia waki Lakhis, laa o wunu’unouw sia maname. ²⁰ I ateromi sia ampit si kawalo Laa o i kuburla waki Yerusalem witu e li’ilik ne nene moyangna waki kota Daud. ²¹ Se pakasa’an bangsa Yehuda se minedo si Azarya, si makaumure’ mapulu’ o enem nge te’un wo minopo nisia minamuali raja simawelela si ama’na, Amazia. ²² Sia si minente’la e Elat wo marengla nyi’a wia se Yehuda, nu reiy’ mouw si raja nu minaka’ato paena’an mewali-wali ampit se nene moyangna.

²³ Witu en te’un kamapulu’ o lima en zaman ni Amazia bin Yoas, raja Yehuda, Yerobeam, oki’ ni Yoas, raja Israel, si minamuali raja waki Samaria. Sia si minerenta epat nga pulu’ o esa nge te’un eng keurena. ²⁴ Sia si matuanala sapa e lewo’ witu em beren ni TUHAN. Sia si reiy’ mina’akati waki e reiy’ sa mina’asa en dosa ni Yerobeam bin Nebat, e minua’la se tou Israel se minakadosa kangkasi. ²⁵ Sia si minarengla en daerah Israel, waki lalan maghoreme mea waki Hamat i ka’ayome waki Tasik Araba minatoroan ampit e nuwu’ ni TUHAN, Empung Israel, e neiy mouw i totor-Nala ampit e nieletan ni hamba-Na, nabi Yunus bin Amitai waki Gat-Hefer.