¹ Witu en te’un kapitu en zaman ni Yehu, Yoas si minamuali raja wo epat nga pulu’ nge te’un eng keurena sia maperenta waki Yerusalem. Ngaran ni ina’na nyi’a mouw si Zibya, waki Bersyeba. ² Yoas si matuanala sapa e nulit witu em beren ni TUHAN esa nga umur em patou-touanna, eng keurean si imam Yoyada nu maturu’ nisia. ³ Ma’anouw tu’u tuana, eng kakenturan-kakenturan patulean e reiy’ neiy i wa’akatla. Bangsa i ti’i se masempepe’la wo matunu en tetule waki kakenturan-kakenturan i ti’i. ⁴ Lumila’ mouw si Yoas wia em baya ne imam: “E reiy’ sa mina’asa loit em paalini witu eng gorem em bale ni TUHAN tanume en sesempe kudus, nyi’a i yi’i e loit maghorem i wee em pepatikan e imukur, e loit tetubuus e imukur i ki’it em paloo’ala pepaken i wee siesa nga touan, wo e reiy’ sa mina’asa loit em paalini witu eng gorem em bale ni TUHAN karengan eng kepa’aran e nate ni esa nga touan, ⁵ Le’osouw em baya ne imam nuesa se sumungkulela nyi’a, siesa o siesa waki se makasine’uan nisia, wo makela nyi’a kaa laa melele’osla en teri witu em bale i ti’i, wisa i te eng ka’atoan eng katerian.” ⁶ Ta’an witu en te’un karua nga pulu’ o telu en zaman ni raja Yoas em baya ne imam se reiy’pe’ kangkasi lime’osla eng katerian em bale i ti’i. ⁷ Kaa ni’itu si raja Yoas si kimeret si imam Yoyada, wo se imam-imam walina ampit limila’ wia nisea: “Ka’a kouw reiy’ lume’osla eng katerian em bale i ti’i? Takar en teakan, reiy’ mouw toro kasi kouw sumungkul e loit waki se makasine’uan-makasine’uannu, ta’an i sarakanola i tu kaa laa melele’osla eng katerian em bale i ti’i.” ⁸ Laa o esa nga iyonouw em baya se imam i ti’i kaa laa reiy’ sumungkul e loit waki se rakyat, ta’an nisea tu’u se reiy’ mouw perlu kasi melele’osla eng katerian em bale i ti’i. ⁹ Kamurian si imam Yoyada si minedo e nesa piti, simiwo po’opot witu em pepenetna wo meela nyi’a witu li’ilik e mezbah, witu esa nga weka lele’os sakawisa se tou ghumorem witu em bale ni TUHAN. Em baya ne imam tumetayur em pepalen se mineela witu eng goremna e reiy’ sa mina’asa loit e nialimi ne tou witu eng gorem em bale ni TUHAN. ¹⁰ Wo sakawisa loo’on nea kaa lakerouw e loit witu eng gorem em piti i ti’i, takar meiy mouw se panitera ni raja ma’an si imam wangko’, laa o sumaput wo rumeken e loit kina’atoan witu em bale ni TUHAN i ti’i. ¹¹ Nisea se simarakanla kelakerna e loit neiy i tantula witu e lawas em baya ne memema’ayang se pinopo mategha’la em bale ni TUHAN, wo nisea i yi’i se mawearla nyi’a wia se meneniwo-meneniwo kayu, wia se meneniwo-meneniwo bangunan se mepa’ayangla em bale ni TUHAN i ti’i, ¹² wia se meneniwo-meneniwo em beton wo wia se meneniwo-meneniwo se mema’at em batu; nisea se mepakela nyi’a kangkasi i wee em patelesan eng kayu wo em batu pepa’at kaa laa melele’osla em bale ni TUHAN wo i wee e reiy’ sa mina’asa ni’i pareu’la kaa laa melele’osla em bale i ti’i. ¹³ Ta’an i wee em bale ni TUHAN e reiy’ siniwoan kure’ perak, pai’, bokor paserewan, nafiri, ka’apa e wo’o sapa pakakas mas wo em perak waki e loit e niali mola witu eng gorem em bale ni TUHAN i ti’i. ¹⁴ Ta’an i te nisea se simarakanla nyi’a wia em baya ne memema’ayang, rio paken melele’osla em bale ni TUHAN. ¹⁵ Nisea eng kamurian se reiy’ simiwola rerekenan ampit se tou-tou se sinarakanala e loit i ti’i kaa laa meela nyi’a wia se meneniwo-meneniwo, karengan nisea se mepa’ayang ampit en jujur. ¹⁶ Ta’an e loit en tetule tetubuus en selok wo e loit en tetule pare’i en dosa e reiy’ mouw niali witu eng gorem em bale ni TUHAN; em baya nyi’a i ti’i nyi’a mouw e weteng em baya ne imam. ¹⁷ Witu e nedo ni’itu maju mouw si Hazael, raja Aram, seke’enna mola eng Gat wo e rinemu’na. Kamurian si Hazael si pa’ar mererego e Yerusalem, ¹⁸ ta’an si Yoas, raja Yehuda, si minedo e reiy’ sa mina’asa sesempe kudus eng kinudusola em baya ne opo’na nyi’a i yi’i si Yosafat, Yoram wo si Ahazia, se raja-raja Yehuda, wo en sesempe-sesempe kudusna nuesa, o kangkasi e reiy’ sa mina’asa mas e niato witu em penu’utu-nu’utulan em bale ni TUHAN wo e istana ni raja. I papa’alina mola em baya nyi’a i ti’i wia si Hazael, raja Aram, Takar e reiy’ mouw mamuali kasi si Hazael mererego e Yerusalem. ¹⁹ Esa nga lebena waki na’asaren ni Yoas wo e reiy’sa mina’asa en tinuananala, reiy’ ku’a re’en em baya nyi’a i ti’i neiy i kepatik witu eng kaol sejarah ne raja-raja Yehuda? ²⁰ Pegawai-pegawaina se tomo’or simiwola em paasa’asa’an, laa o munu’ si Yoas witu em bale Milo e reta’na waki pemerosan mea waki Sila. ²¹ Yozakar, oki’ ni Simeat, wo si Yozabad, oki’ ni Somer, nyi’a mouw se pegawai-pegawaina se minunu’ nisia. Laa o sia i kuburla witu esa nga weka ne nene moyangna waki kota Daud, takar si Amazia, oki’na , si minamuali raja simawelela nisia.