¹ Katoroan si Atalya, ina’ ni Ahazia, limoo’ kaa sioki’na si minate mouw, takar tumo’orouw sia minunengla em baya ne see’ ni raja. ² Ta’a si Yoseba, oki’ wewene ni raja Yoram, patuari wewene ni Ahazia, si minedomi si Yoas bin Ahazia, minu’isi nisia waki keuneran ne oki-oki’ ni raja se laa pewewunu’un i ti’i, ghimoremla nisia ampit si inang me’uru-urus witu eng gorem eng godoong patekelan, wo kimirongi nisia waki si Atalya, i ka’ayo sia reiy’ wunu’un. ³ Takar mena’ mouw sia enem nge te’un eng keurena mewali-wali si wewene i ti’i ampit kimirongla witu em bale ni TUHAN, kasuatan si Atalya nu maperenta em banua. ⁴ Witu en te’un kapitu Yoyada si mineri’ em baya se kapala pasukan esa nga atus waki se tou eng Kari wo waki se pasukan rereo ni raja se menaang. I reona mouw sea meiy wia nisia witu em bale ni TUHAN, laa o wa’akesenna en teta’aran ampit nisea ampit rimeo nisea tumiwa’ witu em bale ni TUHAN. Kamurian i papaloo’ona mola sioki’ ni raja i ti’i wia nisea. ⁵ Nu reiy’ mouw i tu sia merentala wia nisea: “Nyi’i mouw e lewo’ sa reiy’ tuanan niouwla: esa nga patelu waki nikouw, nyia’ i yi’i se simampetouw malukar witu e nendo Sabat wia nyi’i, ta’an se kumawal waki istana ni raja – ⁶ se esa nga patelu kasi se waki pepalen leloangan Sur wo se esa nga patelu tu’un se waki pepalen leloangan waki muri em baya ne rereo ni raja se menaang – se lewo’ sa reiy’ mouw kumawal e istana; ⁷ wo se rua regu waki nikouw, nyi’a i yi’i em baya ne tou se malukar wia nyi’i witu e nendo Sabat wo mekawal em bale ni TUHAN, ⁸ e lewo’ sa reiy’ mouw lumedongla si raja waki e reiy’ sa mina’asa ruuna, siesa o siesa ampit e lelutamna witu e lawasna, wo seiy si ma’eiyla witu em barisan si lewo’ sa reiy’ mouw mate wunu’un. Wo le’osouw kouw merapitla si raja susur sia rumou’mi ka’apa ghumorem.” ⁹ Em baya ne pasukan esa nga atus i ti’i se timuanala e minakatena-tena’ tanu neiy i perentala ni imam Yoyada. Siesa o siesa minedo se tou-touna se simampetouw malukar witu e nendo Sabat mewali-wali ampit se tou-tou se megheghorem melelukar witu e nendo ni’itu, laa o meiy mouw sea wia si imam Yoyada. ¹⁰ Imam si mineela wia em baya ne kapala pasukan esa nga atus i ti’i em bengkouw-bengkouw wo eng kekelung-kekelung kapunya’an ni raja Daud em bitu em bale ni TUHAN. ¹¹ Kamurian em baya ne rereo ni raja i ti’i, siesa o siesa ampit e lelutamna witu e lawasna, se minedo en tampana esa nga weka e neber lele’os i ka’ayo waki eber kawii em bale i ti’i, ampit limedongla e mezbah wo em bale i ti’i kaa laa mekekedirla si raja. ¹² Nu reiy’ mouw i tu si Yoyada si minali sioki’ ni raja i ti’i mea witu luar, makela lelo’or en tuintung wia nisia wo meela e nukum ni Empung wia nisia. Nisea se minopola nisia minamuali raja ma’an minisu’la nisia, wo eng kasuatan masepe’ e lawas rumekeiy mouw sea: “Esa nga petorouw si raja!” ¹³ Katoroan si Atalya nu liminga en suara ne rereo-rereo ni raja se menaang wo se rakyat, mea mouw sia matola se rakyat i ti’i witu eng gorem em bale ni TUHAN. ¹⁴ Laa o loo’onna mola si raja si rimedeiy tawi en tobol i ki’it eng kenaramen, kasuatan em baya ne ma’aka-aka ampit em baya ne timiboiy e nafiri se witu reten ni raja. Wo se minapekasa rakyat em banua se mepa’a-pa’ar kasuatan masengo e nafiri. Takar si Atalya si kimurensangla e labungna kasuatan marekeiy: “Khianat, khianat!” ¹⁵ Ta’an si imam Yoyada si minerentala em baya ne kapala pasukan esa nga atus, nyi’a i yi’i se tou-tou se mekapalala se suraro, pokeiyna wia nisea: “Alinouw sia i rou’mi waki barisan! Seiy si maedo-edo nisia wunu’unouw ampit en santi!” Karengan eng ketarena si imam i ti’i si limila’ mola: “Te’a mouw sia wunu’un witu em bale ni TUHAN!” ¹⁶ Laa o sea sumikop si wewene i ti’i. Witu e nedo sia nu maghoreme waki istana ni raja ampit timorola em pepalen i wee se kawalo, winunu’ mola witu sia. ¹⁷ Kamurian si Yoyada si mina’akes teta’aran e nelet ni TUHAN ampit ni raja wo ne rakyat, kaa nisea se mamuali umat ni TUHAN; o kangkasi e nelet ni raja ampit ne rakyat. ¹⁸ Nu reiy’ mouw i tu ghumoremouw se minapekasa rakyat em banua witu em bale ni Baal, laa o rumonga’la nyi’a; nisea se minete’la minengulit e mezbah-mezbahna wo se patong-patong wo munu’ si Matan, imam Baal, witu en saruan e mezbah-mezbah i ti’i. Kamurian si imam Yoyada si minopo tumetayur-tumetayur i wee em bale ni TUHAN. ¹⁹ Nu reiy’ mouw i tu sia maruiy em baya ne kapala pasukan esa nga atus ne tou-tou eng Kari wo em baya ne rereo ni raja se menaang wo se minapekasa rakyat em banua, laa o sea mali si raja tumumpami waki wale ni TUHAN; sea ghumorem witu e istana ni raja timorola em pepalen leloangan ne rereo ni raja; kamurian rumuberouw si raja witu natas en takhta keraja’an. ²⁰ Mepa’a-pa’arouw se minapekasa rakyat em banua wo amanouw eng kota i ti’i, nu reiy’ mouw si Atalya nu minate winunu’ ampit en santi witu e istana ni raja.

²¹ Yoas si makaumur pitu nge te’un witu e nedo sia nu minamuali raja.