¹ Nu reiy’ mouw i tu mate mouw si Nahas, raja ne bani Amon, o laa sioki’na si minamuali raja simawelela nisia. ² Laa o lumila’ mouw si Daud: “Niaku ku laa mapa’atola em pekaloan wia si Harun bin Nahas karengan si ama’na si minapa’ato mola em pekaloan wia niaku.” Kaa ni’itu si Daud si minapa’ali tetoke kaa laa mapa’ayola e nower kumi’it mengasi’ wia nisia karengan em pinatean ni ama’na. Ta’an eng katoroan se pegawai-pegawai ni Daud nu i ka’ayola waki wanua ne bani Amon i ti’i, wia si Hanun, kaa laa ma’ayola e nower kumi’it mengasi’ wia nisia, ³ lumila’ mouw se pamuka-muka ne bani Amon i ti’i wia si Hanun: “Sapa ku’a re’en i ki’it em papokeiymu si Daud si laa ma’ormatla si ama’mu, karengan nisia si timoke momi wia nikoo se tou-tou se mina’ayola e nower kumi’it mengasi’? Reiy’ ku’a re’en ampit e maksut kaa meiy mesesoisap kaa meiy metetegha’ wo mekekemula em banua i yi’i takar se pegawai-pegawaina se mineiy wia nikoo?” ⁴ O laa si Hanun si rimeo sikopen se pegawai-pegawai ni Daud i ti’i, neiy i reona sumukur nisea wo kumetor e labung nea witu e weteng uner i ka’ayo nakana em pa’a nea, kamurian i wayanala sea. ⁵ Katoroan sea nu makelang mewareng, neiy i pakite’ula wia si Daud en tanume se tou-tou i ti’i, laa o reona se tou matola nisea, karengan se tou-tou i ti’i se kasa neiy i papaira-irangla . Raja si limila’: Mena’ mouw waki Yeriho i ka’ayo en sokommu i ti’i tumou, kamurian meiy mouw sumeup.” ⁶ Ni’itu nu linoo’ mola ne bani Amon, kaa nisea se simiwo mola en tou nea i kari’iris ni Daud, takar si Hanun wo se bani Amon i ti’i se minapa’ali esa nga riwu talenta perak kaa laa ma’erami eng kareta wo se tou-tou mesake-sake kawalo waki Aram-Mesopotania, waki Aram-Maakha wo waki Aram Zoba. ⁷ Nisea se minerami en telu nga pulu’ o rua nga riwu kareta, ma’an si raja em banua Maakha ampit se surarona, se mineiy dumasing tawi e Medeba. O kangkasi se bani Amon i ti’i se mineruri waki kota-kota nea wo se mineiy kaa meiy meseseke’. ⁸ Katoroan si Daud nu liminga eng kapualitan i ti’i, i reona mouw si Yoab maju ampit se pakasa’an suraro wo se pahlawan. ⁹ O laa se bani Amon se minaju, tinu’utulnala se barisan i paseke’na waki saruan em pepalen kota, kasuatan se raja-raja se kimi’it mineiy se neiy i ketampas waki padang. ¹⁰ Katoroan si Yoab nu limoo’, kaa em paregoan i ti’i e me’iweti nisia waki rerior wo waki muri, takar pelengennala se esa nga weteng waki se tou pineleng ne Israel, laa o sia tumu’utul em barisan nea minesaruan ampit se tou Aram i ti’i. ¹¹ Se esa nga lebena waki se rakyat i ti’i se neiy i tampanala witu e wawa’ em pa’aka-aka’an ni Abisai, tuarina, wo nisea se timu’utul em barisanna minesaruan ampit se bani Amon i ti’i. ¹² Laa o lumila’ mouw si Yoab: “Sa se tou Aram i ti’i se lebe ente’ ta’an niaku, takar e lewo’ sa reiy’ mouw koo tumulung niaku, ta’an sa se bani Amon i ti’i se lebe nete’ ta’an nikoo, takar niaku ku laatumulung nikoo. ¹³ Ente’enola e natemu wo meiy mouw kita mente’ela e nate i wee se bangsa ta wo i wee eng kota-kota ni Empung ta. TUHAN satorona si tumuanala e le’os witu em beren-Na.” ¹⁴ O laa si Yoab wo se suraro mewali-wali ampit nisia se minaju mesarula se tou Aram i ti’i kaa laa sumeke’ wo se tou-tou i ti’i se timingkasi en tou waki sinaruna. ¹⁵ Katoroan se bani Amon nu limoo’, kaa se tou Aram se timingkasola en tou, takar sea tu’u tumingkasi waki sinaru ni Abisai, tuari ni Yoab, wo ghumorem witu eng kota. Nu reiy’ mouw i tu Yoab si minareng waki Yerusalem. ¹⁶ Katoroan se tou Aram i ti’i nu limoo’, kaa nisea se kinaweweanouw minekala ne tou israel, takar sea mapa’ali tetoke-tetoke wo rumeo se tou Aram se waki lewet en so’oso’an Efrat maju sumeke’ witu e wawa’ em pa’aka-aka’an ni Sofakh, panglima ne suraro ni Hadadezer. ¹⁷ Nu reiy’ mouw eng kapualitan i ti’i neiy i pakite’ula wia si Daud, takar nierurnala se minapekasa tou Israel, lewetennala en so’oso’an Yordan, laa o i ka’ayola waki tawi nea, wo tu’utulennala se barisanna sumaru nisea. Katoroan si Daud nu matu’utul se barisanna mesaruan ampit se tou Aram i ti’i kaa laa sumeke’, takar sea sumeke’ sumaru nisia, ¹⁸ ta’an se tou Aram i ti’i se timingkasi waki sinaru ne tou israel, wo si Daud si minunu’mi waki se tou Aram i ti’i se pitu nga riwu nga ipus kawalo eng kareta wo se epat nga pulu’ nga riwu tou se pasukan makela-kelang; o kangkasi si Sofakh, panglima ne suraro iti’i, si winunu’na. ¹⁹ Katoroan linoo’ ne tou-tou se tu’utuk wia si Hadadezer, kaa nisea se kinaweweanouw minekala ne tou Israel, takar sea sumiwola pedamean ampit si Daud wo tu’utuk wia nisia; nu reiy’ mouw i tu se tou Aram se so’o mouw kasi mee tetulungan wia se bani Amon.