¹ Witu em pesawelan en te’un, witu e nedo se raja-raja witu eng kenaramenna se memaju maseke’, takar si Yoab si minali kumaluar em baya se surarona, laa o sia munengla em banua ne bani Amon, kamurian sia maju wo kumepung eng kota Raba, kasuatan si Daud nuesa si maena’ waki Yerusalem. Yoab si minewe minekala e Raba wo rimewala nyi’a. ² Nu reiy’ mouw i tu Daud si minedomi e mahkota waki kokong ni raja nea, kawuterna kaloo’ala e nesa nga talenta mas, winatuan e nesa watu permata maal wo ni’itu neiy i pakela witu eng kokong ni Daud. O kangkasi neiy i aterna eng kasa ka’asa’an e rinemu’mi waki kota i ti’i. ³ Penduduk eng kota i ti’i se neiy i aterna wo se pinupusanna ma’ayang ampit e gheghi’ighir, tetegher wesi wo em pati. Tuana mouw kangkasi en tinuanala ni Daud witu e reiy’ sa mina’asa eng kota ne bani Amon. Nu reiy’ mouw i tu marengouw si Daud ampit se minapekasa suraro waki Yerusalem.

⁴ Nu reiy’ mouw i tu lumentutouw em paseke’an mesaru se tou em Filistin waki Gezer; witu e nedo ni’itu si Sibkhai, tou eng Husa, si minewe minekala si Sipai, siesa tou waki se see’ ne raksasa, wo nisea se neiy i tu’utukla. ⁵ Takar mamuali mouw kasi em paseke’an mesaru se tou em Filistin, o laa si Elhanan bin Yair si minatela si Lahmi, patuari ni Goliat, tou eng Gat i ti’i, parungan em bengkouwna tanu eng kekulilitan ne mengengayam.