¹ Nu reiy’ mouw i tu Daud si minewe kala se tou em Filistin wo timu’utukla nisea; laa o sia rumo’obiti eng Gat wo e reiy’ sa mina’asa oki’ eng kotana waki se tou em Filistin. ² Wo si Daud si minewe kala se tou e Moab, i ka’ayo se tou Moab se tu’utuk wia nisia wo se lewo’ sa reiy’ sumempela upeti. ³ Tumodongla nyi’a si Daud si minewe kala si Hadadezer, raja en Zoba,tawi eng Hamat, katoroan sia nu minea malinto’orla eng kakuasa’anna witu en so’oso’an Efrat. ⁴ Daud si rimo’obiti waki nisia esa nga riwu kareta, pitu nga riwu tou mesake-sake kawalo wo se rua nga pulu’ nga riwu tou se pasukan makela-kelang, o laa si Daud si rimeo kumetor eng kenter ne reiy’ sa mina’asa kawalo eng kareta, ta’an ampit timele’ula se esa nga atus nga ipus kawalo eng kareta. ⁵ O laa se tou Aram waki Damsyik se mineiy tumulung si Hadadezer, raja Zoba, ta’an waki elet ne tou Aram i ti’i Daud si minatela se rua nga pulu’ o rua nga riwu tou. ⁶ Kamurian si Daud si timampala se pasukan-pasukan i paruber waki daerah ne tou Aram waki Damsyik, wo se tou Aram i ti’i se minamuali budak ni Daud se lewo’sa reiy’ sumempela upeti. TUHAN si mawee kamenangan wia si Daud wisa i te tu’u sia mea sumeke’. ⁷ Nu reiy’ mouw i tu si Daud si minater eng kekelung-kekelung mas em pinake ne tou-tou ni Hadadezer, laa o mali nyi’a waki Yerusalem. ⁸ Wo waki Tibhat wo waki Kun, nyi’a i ti’i eng kota-kota ni Hadadezer, Daud si minateri eng ka’asa’an en tambaga; waki nyi’a si Salomo si simiwo en “tasik” tambaga , em pa’asek-pa’asek wo em pakakas tambaga. ⁹ Katoroan e lininga ni Tou, raja eng Hamat, kaa si Daud si minewe mouw minekala se minapekasa suraro ni Hadadezer, raja en Zoba, ¹⁰ takar nisia si timoke si Hadoram, oki’na, wia si raja Daud kaa laa ma’ayola en tabea wo metetotorla eng kelawiran wia nisia, karengan nisia si simeke’ mola simaru si Hadadezer wo minewe nisia minekala, karengan si Hadadezer si re’eregh maseke’la si Tou. Wo si Hadoram si minali e reiy’ sa mina’asa barang mas, perak wo en tambaga. ¹¹ O kangkasi em barang-barang i yi’i neiy i wuntulela ni raja Daud i wee si TUHAN , mewali-wali em perak wo e mas neiy i aternami waki se reiy’sa mina’asa bangsa, nyi’a i yi’i waki se tou Edom, waki se tou Moab, waki se bani Amon, waki se tou em Filistin wo waki se tou Amalek. ¹² Abisai, oki’ ni Zeruya, si minatela se mapulu’ o uwalu nga riwu tou Edom waki Kewong Wurasen. ¹³ Laa o sia tumampala se pasukan-pasukan i paruber waki Edom, i ka’ayo e minapekasa Edom se binudak ni Daud. TUHAN si mawee kamenangan wia si Daud wisa i te tu’u sia mea sumeke’.

¹⁴ Tuana mouw si Daud si minerenta mola witu se minapekasa Israel, wo si minalinto’orla eng ka’adilan wo eng kaulitan i wee se minapekasa bangsana. ¹⁵ Yoab, oki’ ni Zeruya, si minamuali panglima; Yosafat bin Ahilud si minamuali bendahara; ¹⁶ Zadok bin Ahitub wo si Ahimelekh bin Abyatar se minamuali imam; Sausa si minamuali panitra; ¹⁷ Benaya bin Yoyada si minamuali panglima ne tou eng Kreti wo ne tou em Pleti; wo se oki-oki’ ni Daud nyi’a mouw se tou kasa pe’uku-ukumen se i pesawangla wia si raja.