¹ Mapulu epat kumelangako, nyaku marengei sumaup witu kota Yerusalem kaampit si Barnabas wo malimei si Titus mawali-wali nyaku. ² Nyaku minange ka wewehan tanu nyai paloloho'mei wia nyaku wo kaampit mateterang wia nisea kumura Ninjil tiin, nyai ku habar witu nantara nea se tou raai Yahudi. Taan nyaku sumiwo taintu, witu paharuran sandiri, sea se tou-tou wewehan se mengiit, ka matatantu sapa pinaayang-eku wo kina paayangan ku mong ndaai mamuali raai si kaaraan. ³ Wo si Titus mawali-wali nyaku, ndaai pasusunaten maane nisia tou Yunani. ⁴ Nyaai waya minamuali ka wewehan se patuari se raai patuari karengan se memene-menes minu n tepei, wo ma sinde-sindek ka se paar ma loloho kabebasanta sapa kinaindoan tunggorem ni Yesus Kristus rior nikita alin sumaup witu pabudaken. ⁵ Taan nikai raai mapaar kumiit nisea maan nokite, rior kaulitan Ninjil, menaate wia gorem nate niu. ⁶ Taan, witu se tou-tou se masaandag tiin, rurumunan nea ndaai kasa kapaareku, ka siEmpung si raai menisir, nisea se raai minawes sapa-sapa wia nyaku. ⁷ Pasui mei, sea limoho, kawia nyaku nyai'nong percaya mei Ninjil tiin wehe se tou-tou raai sinunat, masuat tanu si Petrus sipinercaya Ninjil wehe se tou-tou sinunat. ⁸ Ka, nisia si minaayangou limalan witu Petrus mamuali rasul witu se tou-tou sinunat. Sia kahai si minaayangou limalan wia nyaku mamuali rasul wia se tou-tou raai Yahudi. ⁹ Tumongdongako si Yakobus, Petrus wo si Yohanis minamuali guru witu se jemaat se timerima anugerah nyai wehemei wia nyaku, nisea se minehe lawas leleos paharuran. Witu si Barnabas wo wia nyaku rior nikai mange witu se tou-tou raai Yahudi, wo nisea mange witu se tou-tou sinunat. ¹⁰ Nisea se maki wehete nikai, gumenang se tou-tou sasah, nesate mamuali nyaku maka semangat. ¹¹ Taan, witu se Kefas mai witu kota Antiokhia, nyaku ku raai paar nisia, ka kalolohoan ka sumelokan na. ¹² Ka se raaipe tou-tou wisate sea witu makiit si Yakobus mai, si Kefas minanaramong matikoho mawali-wali o se tou raai Yahudi. Taan witu sea mai, nisia tumuur mahundur wo sumeeng ketei kasi mainde witu se minerur tou sinunat. ¹³ Se tou-tou Yahudi walina se makii-kiit mawali nisea, wo si Barnabas nyai kakiit witu katowoan nea. ¹⁴ Kalohoan kume ka nisea ndaai masuat wo najaran Ninjil, wo nyaku wo nyaku lumila witu si Kefas tu sinaru ne tou, sakou tou Yahudi tumou tanu se tou raai Yahudi, kumurate nikou mapapaksa se tou raai Yahudi, tumou tanu se tou Yahudi?'' ¹⁵ Nikita ta tou-tou nyai toumei tu bangsa Yahudi, wo raai tou-tou berdosa witu se bangsa raai Yahudi. ¹⁶ Taan kailekanta, ndaai wana si esa tou si niulit kasi makiit nukum taurat, taan limalan ete witu iman tunggorem Kristus. Wo nikita kahai mapercaya witu Yesus Kristus rior nikita uliten witu iman tunggorem Kristus, ndaai ka masiwo nukum taurat ka ndaai wana si tou niulit ka makiit nukum taurat. ¹⁷ Taan witu nikita maulid, ta uliten tunggorem Kristus, ta makailekei nawak eta masiwo ndosa, sapa niitu nartina Kristus si pelayan dosa? Niitu ndaai! ¹⁸ Saaku tumoorei sumaup sapa nyai'kumong rombek nyaku ku toro pailaan limangkoi hukum. ¹⁹ Ka sa witu nukum taurat nyaku, kuminatemong witu nukum taurat, rior nyaku tumong we si Empung. ²⁰ Nyaku ku sinalipou kaampit si Kristus, ndaai mong nyaku tumou. Taan si Kristus timou wia gorem-eku, penou-nouanku tarekan yaai tinoan ku tunggorem leona niitu katotouan witu iman tunggorem anakni Empung, si leos wia nyaku wo minehe nawakena ka nyaku. ²¹ Nyaku ku raai mararai anugerah ni Empung, ka saitu raulitan mai, lumalan tu nukum taurat, ndaai si kaaraan pinatean ni Yesus.