¹ Boi, oi Saulus, mongancame tarus ma momate nu murit-muritu Siopu, na'o nolapur Imam Giombang ma momongi tulade la'eio, untuke sinagoge-sinegoge li Damsyik bala onjo io mo'odua'e baiiga sanu momaracaya Jalange injoo'e, bai langkai atau bengkele, io mongkaimae jimo untuke no bato'i li Yerusalem. ³ E'endenye io la-lampa, io ense-ense'oma'e li Damsyik, injopa tiba-tiba nelelate la'e golung nensilaage papaliteio. ⁴ Injopa, io nabangkul petuma'e ma no'olongo suara sanu negombo'e kangkaiio, "Saulus, Saulus, inoga no'aniayame Lia'e?" ⁵ Saulus no'utanya, "Oiga Li'oe, Tuan?" Injopa, Io negombo'e, "Lia'umei Yesus, sanu no'aniayame. ⁶ Tapi, pembaung ma pensio'oma kotama'e, injopa lio'e adaanga sanu nopeilua'e nuga sanu haruse nopogutuume." ⁷ Too-too sanu na'o kangkai Saulus u'noloa'e labai no'ogogombo'e la'emae no'olongo suara injoo'e, tapi labai ne'e ito bai igaunge. ⁸ Saulus nopo'olo la'e petu, ma sabii matanye njin-jilate, io labai me'e ito bainugaunge. Injoma, too-too injoo'e nongintide unbungonye ma nongkoniio nensio'e li Damsyik. ⁹ Injopa, tolu eleo e'endenye, Saulus labai ne'e ito malabai uninang atau nonginung. ¹⁰ Watuma'e injoo'e, adaange sotoo murit li Damsyik, totopei Ananias. Siopu negombo'e kangkaiio lilalongu sounge pe'ito, "Ananias!" Injopai, Ananias negombo'e, "Injeina lia'e, Siopu." ¹¹ Injopa, Siopu negombo'e kangkaiio, "Pembaung ma na'o jalangoma'e sanu notope jalange mondolong, injopa li labongi Yudas, intuga too nu Tarsus sanu totopei Saulus pa, siliga, too injoo'e pepeese mesusuyang, ¹² Ma io nodoongome ponyiligonye pa sotoo totopei Ananias nongengkata'e umbungonye libabo'u ba'inye bala io me'e ito babalii." ¹³ Boi, Ananias nengimbat, "Siopu, ilongo'uma la'e too goote tentange too injeine, gotome tutuu sanu majaa'e pinogutunye antage umato-Me sanu mo kudus li Yerusalem, ¹⁴ injopa liine io adaange kuasa la'e imam-imam kapala untuke mombato'e jojoo too sanu moleba topee-Me." ¹⁵ Tapi, Siopu negombo'e kangkaiio, "Na'oma pa too injeine nu alate sanu pinileanu'u-Me untuke mongkoni tope-E toloma'e nu bangsa-bangsa taninye, ma raja-raja, kangkai bangsa Israel. ¹⁶ Saba'e, Lia'e mopoitaa'e kangkaiio haruse gootonya io menderita untuke tope-E." ¹⁷ Injomai, Ananias nelampa ma nensio'e labongoma'e injoo'e, injopa nopuse nolamba'a'e umbungonye kangkai Saulus, io negombo'e, "Soungaange Saulus, Siopu Yesus, sanu nopoita kangkaioe lilalongu pela-lampame bengee'e, nejaimae lia'e ba li'oe me'e ito babalii ma nohu'einu Roh Kudus." ¹⁸ Injopa, watuma'e injoo'e teule, adaange aime unapu ii'ang nanahu la'e matanye ma io ne'e ito babalii. injopa io nembaung ma binaptis. Mobambala'e Tentangei Yesus ¹⁹ Injopa, nopuse u'ninang, Saulus pino'o'uige. Io kangkai murit-murit li Damsyik bai sogau eleo. ²⁰ Injopa, io sengane nobambala'ei Yesus li sinagoge-sinagoge kangkai negombo'e, Yesus Unga nu Allah." ²¹ Jojoo too sanu no'olongoma'eio neherang ma negombo'e, "Lauje liio injeine sanu adange li Yerusalem momate jimo sanu monope tope injoo'e ma sanu nodua'omae liine kangkai paraluu mongkoni jimo lilalongu keadaane babato'e toloma'e nu imam-imam kapala?" ²² Tapi, Saulus nebali no'uige tutuu ma me'ebingunge too-too nu Yahudi sanu momoiya li Damsyik kangkai mombuktikan onjoi Yesus Iome Kristus. Saulus Nololos La'e Baisogautoo nu Yahudi ²³ Bai sogau eleo la'emae injoo'e, too-too nu Yahudi nosituru'e momatei Saulus, ²⁴ tapi posituruangu jimo injoo'e inotouangomeni Saulus. Jimo monyinyilige taruse pintu-pintu gerbang eleleo ma libeng ba magade nopateinu jimoaio. ²⁵ Tapi, murit-muriti Saulus nongkoniio watu libenge minjopa nonyaua'eio la'emae tembok kangkai nonutuseio lilalongu karanjing. Saulus li Yerusalem ²⁶ Watui Saulus nodua'e li Yerusalem io monyoale untuke mogabunge kangkai nu murit. Tapi jimo jojoo mohule kangkaiio lantarane labai noparacayanu jimo onjo io nu murit. ²⁷ Boi, Barnabas nogandengei Saulus ma nongkoiio nu rasuloma'e, injopa nociritaa'e kangkai jimo onjoio ne'e itome Siopu li lalongu pela-lampanye, injopa Siopu negombo'omae kangkaiio, aiyo'e teule io nabaranime negombo'a'e lilalongu topeni Yesus li Damsyik. ²⁸ Injopai, Saulus kangkaime jimo nensio'e ma meluang la'e Yerusalem kangkai barani negombo'e lilalongu topenu Siopu. ²⁹ Liio negombo'e ma nembaroane kangkai too nu Helenis, tapi jomo mongusaha momateio. ³⁰ so-soungaange se'iman mo'ootoi so'ale injeine, jimo nongkoniio nesau Kaisarea ma'e ma nejaiio Tarsus soma'e. ³¹ Lantarane injo, jemaate jojoo li Yudea, ma Galilea, injopa Samaria na'agaade damai ma nasanang. injopa, tunuhu lilalongu mohule antage Siopu ma lilalong pohiburu Roh Kudus, jimo moniange tarus o'gotonye. Petrus li Kota Lida ma Kota Yope ³² Sounge watu, oi Petrus nelologe jojoo wilaya injoo'e, io teule mongita too-too mo kudus sanu momoiya li Lida. ³³ Lio'e, io no'odua'e sotoo sanu totopei Eneas, sanu kengkelunge taruse li pongkelunangonye owalu tounge e'endenye lantarane io nepi'it. ³⁴ Injopai, Petrus negombo'e kangkaiio, "Eneas, Kristus Yesus nopo o'doonge'oe. Pembaungoma injopa ndolona'a pongkelunangoome!" Injopa, boi watuma'e injoo'ei, Eneas nembaung. ³⁵ Injoma, jojoo too sanu nomoiya li Lida ma Saron ne'e itoio ma jimo neteule kangkai Siopu. ³⁶ Sounge watu, li Yope, adaange murit bengkel topenyei Tabita, sanu onjo noantua'e antu'onyei Dorkas. Io huhu'e kangkai pogutu sanu paila'e ma mombee sedekah. ³⁷ Watu ele-eleoma'e injoo'e nebalime, io nepeese ma nate. Injopa, watu ilinangoma'e nu too liio, ngkineluna'u jimo li ruangane li tuhunye. ³⁸ Lantarane Lida adaange mense'e Yope, nu murit, la'emae no'olongo onjoi Petrus adaange ampio'e, nejai do too kangkai Petrus ma momongi kangkaiio, "Inyaa notunda ma'o pomoiyangomame!" ³⁹ Injomai, Petrus u'noloa'e ma na'o kangkai jimo. Injopa, io nodua'e, jimo nongkoni oi Petrus ruanganoma'e li tuhunye. jojoo janda nopo'olo li jeini Petrus kangkai nengiinge, kangaki nomo'itaa'e tunik-tunik ma pakean-pakeane taninye sanu biasa nopogutuni Dorkas watu io ulenge kangkai jimo. ⁴⁰ Boi, oi Petrus nejai jimo jojoo neluang, injopa nopotuu ma nesusuyang. Injopa io nonyiligomae antage mayati Tabita ma io negombo'e, "Tabita, pembaungoma!" injopa bengkele injoo'e nomboaa'e matanye ma watu io ne'e itoi Petrus, io nodungko'e. ⁴¹ Injomai, Petrus nongabate unbungonye kangkaiio ma mondulua'eio mopo'olo. Injopa, noleba too-too mokudus ma nu janda, io nopo'itaa'e onjoi Tabita tu-tuhu. ⁴² Injopa, kejadiane injoo'e nadadage li jojooma'e Yope, ma gooa too nomaracaya kangkai Siopu. ⁴³ Injomai, Petrus nomoiya neende tutuu li Yope kangkai sotoo totopei Simon, topo nisi ungkul binatang.