¹ Injopai, Saulus teule nosituru'e momatei Stefanus injoo'e. Saulus Nongancura'e Jemaate li Yerusalem Watu eleo injoo'e, sounge ponganiaya sanu giombang nebali antage jemaat li Yerusalem, ma jimo jojoo nadadage wilaya-wilayama'e nu Yudea ma Samaria, sangadinya nu rasul. ² Bai sogau too sanu meiman nontanongei Stefanus ma nodua'a nu o'ondonge sanu giombang antageio. ³ Tapi, oi Saulus mogusaha mongancura'e jemaat kangkai nensio'e li labonge salalange-salalang. Io nongiule langkai ma nu bengkel, injopa nonyarakane jimo panjarama'e. Filipus Nobambala'e Injil li Samaria ⁴ Injopa, jimo sanu sanu ne'antaane injoo'e nokuliling kangkai nobambala'e Injil. ⁵ Filipus nesau soungoma'e kota li Samaria ma nobambala'e tentange Kristus. ⁶ Injopa, goota too no'osounge nyaa noniina'e nuga sanu pineilua'i Filipus watu jimo no'olongo ma ne'e ito tanda-tanda ajaip sanu pinogutunye. ⁷ Saba'e, roh-roh majaa'e neluange la'e too-too sanu pinensio'angonye, injopa neloloa kangkai suara mo'ombonge, ma goote too molumpu ma kingkido'e sanu pino'odoonge. ⁸ Lantarane injoo, adaange adandalane giombang li kota injoo'e. ⁹ Boi, adaange sotoo langkai totopei Simon sanu ule lulumae neguru sihir li kota ma nogutu too nu Samaria neherang, kangkai nomeilu onjo liio too giombang. ¹⁰ Jojoo too, nompamula la'e too moloose dudua'e too sanu giombangonye, negombo'e, "Too injeine kinuasangu Allah sanu notope 'Giombang'. ¹¹ Injoma, neseilunu jimo kangkaiio lantarane neendeme tutuu io nogutu jimo neherange kangkai ilmu sihironye. ¹² Boi, laemae too-too injoo'e nomaracayai Filipus sanu nobambala'e Injil tentange Kerajaan Allah ma tope ni Kristus Yesus, jimo binaptis, langkai aiyo'e teule bengkel. ¹³ Kangkai, ambo-amboi Simon nomaracaya nopuse io binaptis, io adaange tarus meense'ei Filipus, injopa watu ne'e ito bagiana'u mujizat ma tanda-tanda ajaip sanu nebali, io nebali neherang. ¹⁴ Watuma'e injoo'e, rashl-rasul li Yerusalem no'olongo onjo too-too nu Samaria nonarimame Gombo'u Allah, jimo nejai io Petrus mai Yohanaes kangkai too-too ampio'e, ¹⁵ sanu nodua'e ma nesusuyang antage jimo bala jimo monrima Roh Kudus. ¹⁶ Saba'e, Roh Kudus laupe nenyau antage sabii sotoo la'e jimo, boi jimo binaptisome li lalongu topenu Siopu Yesus. Injopai, Petrus mai Yohanes nongengkata'e umbung antage jimo ma jimo nonarima Roh Kudus. ¹⁸ Watui Simon e'e ito onjo Roh Kudus bineea'e la'emae pongengkate umbungu rasul-rasul, Simon nombeea'e doi kangkai rasul-rasule injoo'e, ¹⁹ kangkai negombo'e, "Benimai teulea antage lia'e kuasa injeine bala tunggalu sotoo sanu upongengati umbunge monarima Roh Kudus." ²⁰ Tapi, oi Petrus negombo'e kangkai Simon, "Ambo'onya doime injoo'e mogonu kangkai'oe lantarane lio'e momikire lio'e maagaade karunia la'e Allah kangkai doi! ²¹ Lio'e labai ma'agaade tilal atau hake lilalongu so'ale injeine lantarane nyaame labai mondolonge litolonu Allah. ²² Jadi, patoba'oma la'e a'jaa'oome injeine ma pesusuyangoma kangakai Siopu supaya, onjo tutuu, niatu nyaame magaade noampuni antage'oe. ²³ Lantarane, u'ito onjo li'oe adaange li lalongu poyu sanu mepeit ma lilalongu subintale majaa'e. ²⁴ Boi, oi Simon nengimbate ma negombo'e, "pesusuyanga untuke lia'e kangkai Siopu bala nuga sanu ginombo'aome labai mo'ono lia'e." ²⁵ Injoma, nopusoma'ei Petrus mai Yohanes nosaksi tu-tutuu ma nomeilua'e Gombo'u Siopu, jimo nongulele Yerusale moma'e kangkai nobambala'e Injil li desa-desa too nu Samaria. Filipus Nombaptis Too nu Etiopia ²⁶ Injopa, malaikattu Siopu negombo'e kangkai Filipus, pineilunye, "Pembaungoma injopa pelampama Selatanoma'e, jalangoma'e sanu mesasau la'e Yerusalem monungga nu Gaza. Jalange injoo'e jalange sanu mogolintoo'e." ²⁷ Filipus nembaung ma na'ome. injopa, initoma'a sotoo nu Etiopia, sanu injoo'ume nu sida-sida la'e sotoo pejabattu pengadilan Sri Kandake, Ratu nu Kerajaan Etiopia. io tanggung jawap antage jojoo harta nu ratu. io nodua'ome li Yerusalem untuke moibadah, ²⁸ injopa mongulelome babalii, dudungko'e lilalongu keretanye injopa nombaca kitap Nabi Yesaya. ²⁹ Injopa, Roh negombo'e kangkai Filipus, na'ome ma pogabungome kangkai kereta injoo'e. ³⁰ Injomai, Filipus netaimbulaane keretama'e ma no'olongo too injoo'e pepeese mombaca kitap Nabi Yesaya. oi Filipus no'utanya kangkaiio, notoima nuga sanu nobacaame? ³¹ Injopa, too injoo'e nengimbat, baitutuua u'otoi, sangadi o'too mongunde lia'e? Injoma, io nomeihuanei Filipus untuke mesabe ma modungko'e kangkaiio. ³² Watu injoo'e, bagiane la'e Kitap Suci sanu pepeese nobacanye injoo'e, "Io inoni aime sounge domba pongkolotangoma'e, injopa aime sounge unga nu domba laupe ginoncinge huo'onye nopoodoye injoma Io labai momboa nganga-Nye. ³³ Lilalongu e'hina-Nye, sanu labai ma'adil inagoange la'e-Io. Iga sanu maagaade mociritaa'e Keturunano-Nye? Saba'e, tutuhuango-Nye inagoangome la'e juniaa." ³⁴ Injopa, sida-sida injoo'e nengimbat ma negombo'e kangkai Filipus, "Lia'e momongi kangkai'oe,tentange iga nu nabi nomeilua'e injeine. tentange ambo-ambo'onye atau tentange too taninye?" ³⁵ Injopa, Filipus nombo'aa'e nganganye, ma nompamula la'e Kitap Suci injeine, io nohotbah tentangei Yesus kangkaiio. ³⁶ Injopa, watu jimo se'elampa, jimo nodua'e antage sanu o'ogo, sida-sida injoo'e negombo'e, "Siligoma'a, adaange ogo! Nuga sanu mongambotia'e untuke nobaptise?" ³⁷ [ Injopai, Filipus negombo'e, "Onjo lio'e momaracaya la'e nyaame tu-tutuu, li'oe mebali. "Injopa, io nengimbate ma negombo'e, "Lia'e momaracaya onjoi Kristus Yesus injoo'e Unga nu Allah."] ³⁸ Injopa sida-sida injoo'e nomarintaa'e kereta untuke modoong. Injopa, jimo doluo nenyau ogoma'e, Filipus ma sida-sida injoo'e, injopai Filipus nombaptiseio. ³⁹ Injopa jimo doluo neluange la'e ogo, Roh nu Siopu nongkoni oi Filipus nelampa, injopa laume initonu sida-sida injoo'e babalii, ma nonarusa'e pelampanye kangkai neege. ⁴⁰ Boi, Filipus no'odua'e liio adaange li Asdod, ma watu io nalabate kawasane injoo'e, io nobambala'e Injil li jojoo kota dudua'e io nodua'e li Kaisarea.