¹ La'e injoo'e, Imam Giombang negombo'e, "Tutuua a'aiyo'e?" ² Injopa, Stefanus negombo'e, "So-soungange ma si-siama, pe'ilongoa'a lia'e. Allah sanu mo Mulia nopoita kangkai sioputomae, oi Abraham, watu io ulenge li Mesopotamia, laupe io nomoiya li Haran, ³ ma negombo'e kangkaiio, 'Pelampama la'e petuume ma la'emae so-soungaangoome, injopa podua'e li petu sanu utujua'e kangkaioe.' ⁴ La'emae injoo'ei, Abraham nolinjo'i petu too nu Kasdim ma nomoiya li Haran. injopa la'eyo'e, la'e natema'e siamanye, Allah nejaiio nombali'e petuma'e injeine, pomoiyaange a'alaine nopomoiyaime. ⁵ Boi, Allah labai nombeea'e warisana kangkaiio, injopa sabii aime laab petu labai adaang, tapi nojanji untuke mombeea'e kangkai Abraham antage io togunye ma keturunan mopusoma'e liio, soulai Abraham laupe no'ounga. ⁶ Tapi, Allah negombo'e aiine, onjo keturunanonye mebali pendatange li petu sanu laupe nootoi injopa jimo nopebali pejaiyong kangkai no'aniaya e'eendenye apagatuse toung. ⁷ 'Boi, Lia'e mehukume bangsa sanu meja-jai jimo,' pineilunu Allah, 'Injopa, la'emae injoo'e jomo meluange la'eo'e ma mo'ibadah kangkai Lia'e li pomoiyange injeine.' ⁸ injopa, Allah mombeea'e kangkai Abraham pejanjianange suna, injomai Abraham nebali siamani Ishak ma nonyunaio watu umuronye owalu eleo, injopai Ishak nebali siamani Yakup, injopai Yakup, sompuluma doluo siama nu siopumae. ⁹ Lantarane meelate kangkai Yusup siamanu siopute nobalu'eio li Mesir. Tapi, Allah kangkai Yusup, ¹⁰ injopa nonyalamata'eio la'e jojoo penderitaan, kangkai nombeea'e anugrah ma kebijaksanaan li toloni Firaun, Raja nu Mesir, sanu nopebaliio nebali topomimpin antage Mesir ma jojooma'e istana. ¹¹ Sounge watu, bencana lulumbuong nebali li jojooma'e Mesir ma nu Kanaan, kangkai ne'ebali penderitaane sanu giombangetuu, injopa sioputomae labai ma'agaade saunoinang. ¹² Tapi, watui Yakup no'olongo onjo adaange bo'ung li Mesir, io nejai sioputomae nodua'e ampio'e diapa seinsangeo'e. ¹³ Watu o'doinsanaonye, Yusup nogutu liio inotouangu so-soungaangonye, ma keluargani Yusup nebali napatas antagei Firaun. ¹⁴ Nopuse injoo'e, Yusup nongirime pa'atu ma nongundangei Yakup, siamanye, ma jojoo soungaangonye, jojooma'e o'gootonye 75 too. ¹⁵ Injomai, Yakup nesau Mesir roma'e injopa io nate ampio'e, io ma nu sioputomae. ¹⁶ La'emaeo'e, jimo binali'a'e Sikhem moma'e ma ngkineluna'e li pekuhurang sanu inolime ni Abraham kangkai o'gootu doi la'e unga-ungani Hemor li Sikhem. ¹⁷ Tapi, eense-eense'oma watu pinejanjianange injoo'e, sanu jinanjia'ome nu Allah kangkai Abraham, bangsa injoo'e noniange ma netilale doluo li Mesir, ¹⁸ dudua'e adaange raja taninye te'olo antage jojoo Mesir, sanu labai mootoinu jimo tantangei Yusup. ¹⁹ raja injoo'e monipu bangsate ma monganiaya sioputomae injoma momaksa jimo melumbua'e unga moloosu jimo dua'e jimo labai montaane tumuhu. ²⁰ Watu jamane injoo'e, Musa nembua ma io mologase li matanu Allah. Injopai, Musa piniara li labongi siamanye tolu mbulange e'endenye. ²¹ Injopa, watu io ilumbua'ome, ungalagani Firaun nongaadeio ma nombaaye aime unganu ambo-ambo'onye. ²² Injomai, Musa dinidike lilalong bagiana'u hikmat too-too nu Mesir ma io o'kuasa lilalongu pegombo'e a pepeihuonye. ²³ Boi, watu umuri Musa nagana'e apampulu toung, nomumcule li lalongu nyaanye untuke mondua'i so-songaangonye, ijo'ume keturuna nu Israel. ²⁴ Injopa, watu ne'e i'to sala sotoo la'e jimo pinogutu kangkai labai ma'adil la'e toonu Mesir, Musa nodua'e nonyebiaa'e too sanu no'aniaya injoo'e ma nombalase kangkai nomate too nu Mesir injoo'e. ²⁵ notoi ni Musa onjo so-soungaangonye mengerti onjo Allah mombeni jimo a'salamate la'emae liio, tapi jimo labai mengerti ²⁶ Babalii seeleonye, oi Musa nondua'i toonu Israel sanu pepeese me'oungkulan, injopa io na'o mongampo jimo, kangkai negombo'e, 'Hey, lauje ulenge soungaanga li'eme, inoga menge pe-peesane?' ²⁷ Boi, too sanu nomeese soungaangonye injoo'e nongiulei Musa jeinyoma'e kangkai negombo'e, 'Oiga nopobalioe penguasa ma hakim antage li'ame? ²⁸ Bai li'oe malani momate lia'e aime li'oe nomate too nu Mesir injoo'e bengee'e?' ²⁹ No'olongo pogombo'u too injoo'ei, Musa uninjo'e ma nebali pendatange li petu nu Midian. Ampio'e, io nebali siama la'e dotoo unga langai. ³⁰ Nagana'oma'e apampulu toung, sotoo malaikat nopo'ita kangkai Musa li padang belantara huyulu Sinai, lilalong oyonu api li ombogu lui. ³¹ Watui Musa nonyiligoma'e, io neherang kangkai pe'itonye injooe. Injopa, watu io nomamatasoma'e, nodua'a suaranu Siopu, ³² 'Lia'ume Allah nu siopumomae, Allah Abraham, ma Allah Ishak, ma Allah Yakup.' oi Musa gunugule nohuhuleong ma laume barani momatasoma'e. ³³ No'uma'e, Siopu negombo'e kangkaiio, 'Alisa'a sandale la'e bibisoome pa lantarane pomoiyaange oliga po'oloangoome nu petu mo suci. ³⁴ Lia'e tu-tutuu ne'e itome penderitaannu umat-Toe sanu adaange li Mesir ma no'olongome jimo o'mo-mosusa. Injopa, Lia'e nenyaume untuke monyalamata'e jimo. Ma sekarange maime, Lia'e mejaioe Mesir roma'e.' ³⁵ Musa, sanu tinolakome nu jimo kangkai negombo'e, 'Jeiga sanu nopobali'oe penguasa ma hakim antage li'ame?' Liiome too sanu inejainu Allah untuke mebali, penguasa aiyo'e teule toponyalamat, la'emae umbungu malaikat sanu nopo'ita kangkaiio li ombogu lui. ³⁶ Too injeine nomimpine jimo neluang, kangkai nogutu mujisat ma tanda-tanda ajaip li petu nu Mesir, ma li dagate meegang, ma li padang belantara apampulu toung e'endenye. ³⁷ oi Musa meine sanu negombo'e kangkai bangsa Israel, 'Allah mobangkita'e antage li'eme sotoo nabi aime lia'e li tatanganu so-soungaangoome.' ³⁸ Liiome injeine too sanu adaange li tatanganu jemaat li padang belantara kangkai malaikat sanu negombo'e kangkaiio li huyulu Sinai, ma kangkai sioputomae, injopa io nonarimame Gombo'u Siopu sanu tutuhu untuke nobeea'e li'ite. ³⁹ Sioputomae nonolake untuke ma taat kangkai Musa, tapi nogalisa'eio injopa malani mongulele Mesir roma'e li lalongu nyaanu jimo, ⁴⁰ kangkai negombo'e kangkai Harun, 'Pogutua'oma li'ame dewa-dewa sanu melampa li tolomame lantaranei Musa injeine, li'ame neluange la'e petunu Mesir, labai nootoimama nuga sanu nebali kangkaiio.' ⁴¹ Watuma'e injoo'e, jimo jimo nogutu sounge patung unganu sapi, injopa nombee persembahan kangkai berhala injoo'e, injopa nora-rame kangkai pokarajaangu umbungu jimo. ⁴² Tapi, Allah labai nonyinyiila'e jimo ma nomatubaya jimo nonyomba tantara nu golung, aime sanu tutulis lilalongu kitap pu nabi, Bai no'onia'omimae kangkai Lia'e nu binaatang no'olote ma persembahane e'endenye apampulu toung li padang belantara, hey umatu Israel? ⁴³ Li'oe nongkoni kemani Molokh ma bituongu dewame, Refan, patung sanu pinogutumie untuke nosomba ma Lia'e melumbua'e'oe sintabama'e nu Babel.' ⁴⁴ Sioputomae adaange kemah kesaksian li padang belantara, aime sanu pinarintaai Allah watu negombo'e kangkai Musa, untuk mogutuio sesuai kangkai gambarrane sanu initonyome. ⁴⁵ La'emae nonarima kmah injoo'e, sioputomae nongkoniio nensoi'e kangkai Yosua, watu jimo la'e bangsa-bangsa taninye, sanu inalisa'ome nu Allah la'emae tolonu sioputomae, dudua'e watu jamani Daut. ⁴⁶ Daut na'agaade sayangge ma karunia li tolonu Allah injopa nomongi untuke ma'agaade nupomoiyange antage Allah ni Yakup. ⁴⁷ Tapi, Salomo sanu nombaunge salalange labong antage Liio. ⁴⁸ Boi, sanu mokuasa labai momoiya lilalongu labonge sanu pinogutu la'e umbungu manusia, aime sanu pineilua'u nabi, ⁴⁹ Golunge pudungko'ang-Ngo'e ma petu pongumpagangu bibiso-E. Labonge gauga sanu nopogutuume antage Lia'e? Allah ne Gombo'e, atau, pomoiyaang-Ngo'e mongondo'e? ⁵⁰ Jelauje unbung-Ngo'a sanu nogutu jojoom'e injeine? ⁵¹ Hey, li'eme too-too sanu mo'oase ba'i, kangkai nyaa ma nu tuli'e sanu labai sinuna, li'eme kalipu mongeva Roh Kudus, aime sanu pinogutu la'e siopuumome! ⁵² Nabi-nabi liga sanu labai sisesa la'e siopumomae? Injopa, jimo nomate too-too sanu ulepamulanye nomeilua'ome podua'u sanu tu-tutuu paila, sanu sekarangeine nopebaliambo-ambo'ome nu penghianat ma topomate. ⁵³ Lio'e, sanu nonarimame Hukum Taurat aime sanu pineilua'e la'emae nu malaikat, tapi labai jinagaangoome! Stefanus Pinateang ⁵⁴ Watu jimo no'olongo so'ale-so'ale injeine, nyaanu jimo aime sinusu'e ma moungkula jimo kangkai Stefanus. ⁵⁵ Tapi, oi Stefanus sanu hinu'eange la'emae Roh Kudus nonyilige golungoma'e ma ne'e ito kemuliaanu Allah, injopai Yesus o'olo li sebia moanongu Allah. ⁵⁶ Stefanus negombo'e, Pe'ilongoa'a! Lia'e ne'e ito golunge tebo'a injopa Unganu Manusia o'olo li sebia moanongu Allah. ⁵⁷ Tapi, jimo boi se-se'eloa kangkai suara mo,ombong, ma nonapole tuli'u jimo, ma nosituru'e nehulugei Stefanus. ⁵⁸ Injopa, jimo nonggiuleio neluange la'e kota injopa nompamulame nombalatu'eio kangkai polu. La'emae injoo'e, too ne'e ito nongalisa'e jubanu jimo li bibisu sotoo unga molumba totopei Saulus. ⁵⁹ Injopa, jimo mehukume tarusei Stefanus sanu pepeese meloloa ma negombo'e, "Siopu Yesus, tarimama roh'e." ⁶⁰ No'uma'e, nopuse nopotuu, io neloloa kangkai suara mo'ombonge, tanguna'a dosa injeine kangkai jimo!" Injopa, noopuse nomeiluae, io nateme.