¹ Sounge watu, li Kaisarea, adaange sotoo sanu totopei Kornelius, sotoo perwira la'e sanu notope pasukanu Italia, ² too me'iman sanu mohule kangakai Allah, aiyo'e teule kangkai jojoo too sanu adaange li labongonye, ma mombee goote sedeka kangkai too ma kalepu mesusuyang kangkai Allah. ³ Sebeim-bengianga, sekitare jame totolu beimbenge, initonye napatas lilalongu sounge pe'itonye, sotoo malaikattu Allah nodua'e ma negombo'e kangkaiio, "Kornelius!" ⁴ Injopa, io nonyilige malaikate injoo'e kangkai nohule ma negombo'e, "Nugaine, Tuan?" Injopa, malaikate injoo'e negombo'e kangkaiio, Susuyangoome ma sedekahme nomene'ome mebali sounge polambote li tolonu Allah. ⁵ Sekarange, pejaima too-too Yope ma'e ma peihuana sotoo totopei Simon, sanu notopei Petrus teule, ⁶ io momoiya kangkai sotoo topo nisi ungkulu binatang totopei Simon, sanu labongonye adaange li pipitu dagat." ⁷ Watu malaikat sanu negombo'e kangkaiio injoo'e nelampame, Kornelius nomeihuan do'too pelayan ma so'too sanu me'iman la'e ta-tanganu too sanu molayani keperluanu ambo-ambo'onye, ⁸ ma nopuse nonjelaasa'e bagiana'onye kangkai jimo, io nejai jimo Yope ma'e. ⁹ Do'dondomonyomae, watu jimo ulenge lilalongu pelampaange ma mense'oma'ome kota injoo'e, Petrus nomene'e babo'oma'e nu atopu labong, sekitare jame sompuluma doluo tanga eleo, untuke mesusuyang. ¹⁰ Injopa, irasangonye molumbus ma malani uminang, tapi watu too-too pepeese mongatura'e sanu no'inang, Petrus na'agaade sounge pe'ito, ¹¹ injopa io ne'e ito golunge tebo'a ma adaange aime kaing sanu mebilaye tutuu nenyau ma unalendaa'e la'e apate pasunye dudua'e petu. ¹² Lilalongonye, adaange bagiana'u binaatange apate bibisonye ma binatang-binaatang mendoyule li petu, injopa mamanu'e li tanganuang. ¹³ Injopa, nodua'a suara negombo'e kangkaiio, "Pembaungoma, Petrus, olotoma ma inangoma!" ¹⁴ Tapi, Petrus negombo'e, "Lauje, Siopu. Saba'onye, lia'e labai pernah uninange bainuga sanu maharam atau melehu." ¹⁵ Injopa, suara injoo'e negombo'e babalii kangkaiio o'doinsana'onye, " Nuga sanu pino'osucime nu Allah, inyaa se-sinsanga notope maharame." ¹⁶ So'ale injeine toluinsangome nebali, injopa tiba-tiba jojoo injoo'e teengkate golungoma'e. ¹⁷ Watu injoo'ei, Petrus ulenge mebingunge tu-tuu momikira'e nuga antu'u pe'itonye injoo'e, biasa too-too sanu pinejaini Kornelius pepeese mongintuge bai liga labongi Simon, kangkai nopo'olo li tolonu pintu gerbang, ¹⁸ ma kangkai moleba, jimo ne'utanya biasai Simon, sanu notopei Petrus, nosa'oye apio'e. ¹⁹ Ulenge pepeese momikira'e sanu initonye injoo'ei Petrus, Roh negombo'e kangkaiio, "Siligoma'a, adaange totolu langkai sanu pepese mengintuge'oe. ²⁰ Pembaung ma penyauma, na'ome kangkai jimo inyaa maragu pa Lia'a sanu nejai jimo." ²¹ Injpai, Petrus nenyauma'e kangkai too-too injoo'e ma negombo'e, "Siliga, lia'ume too sanu nointugomie. Alasanega pinodua'a'omomae?" ²² Jimo negombo'e, "Kornelius, sotoo perwira, too sanu tutuu ma mohule kangkai Allah, sanu nootoi paila'e li ta-tanga nu jojoo bangsa nu Yahudi, pina'ingatome nu malaikat mo kudus untuke mejai'oe modua'e li labongonye ma untuke meilongoa'e pegombo'oome." ²³ Petrus nomeihuane jimo nensio'e ma nombeea'e jimo pomoiyaange lio'e. Do'dondomonyomae, io nembaung ma na'o kangkai jimo, ma baisoga soungaange se'iman la'e Yope nonjeiio. ²⁴ Babalii seeleo, jimo nensio'ome Kaisarea. Kornelius nedadaangome jimo ma nolinsona'ome so-soungaange kangkai jeiyang meense'e io. ²⁵ Watui Petrus nensio'e, Kornelius nondua'iio, injopa nopotu'u li bibisi Petrus ma nonyombaio. ²⁶ Tapi, Petrus nonduluio unoloa'e kangkai negombo'e, "Oloa'oma! Lia'e boi manusia biasa teule." ²⁷ Petrus ulenge gogombo'e kangkai Kornelius, Petrus nensio'e lalongomae ma no'oduaoma'e adaange goote too nelinsonge kangkai. ²⁸ Injopai, Petrus negombo'e kangkai jimo, "No'toimia onjo melinsonange majaa'e antage too nu Yahudi mesouhuane ma mongita labai too nu Yahudi, tapi tinujua'omr nu Allah kangkai lia'e e'seilunye labai lia'a momeilu bai'oiga maharaame ma melehu. ²⁹ Injoo'a saba'onye, lia'e labai keberatane watu li'eme nejaimae lia'e modua'e. Lantarane injo, lia'e mo'utanya alasanega pinoleba'omie lia'e?" ³⁰ Injopai, Kornelius negombo'e, "Apaeleo luulu dua'e jame injeine, watu e'sesio jama'onye, lia'e pepeese mesusuyanga li labonho'e, ma siliga, adaange sotoo o'olo li tolo'e papake pkeane sanu nentinage. ³¹ Injopa, Kornelius, negombo'e, susuyangoome ilongoma ma sedekahme ilambotome li tolonu Allah. ³² Lantarane injo, pejaima Yope ma'e ma pomongimai Simon sanu notopei Petrus modua'omae. Io nosa'oye li labongi Simon, sotoo topo nisi ungkulu binatang, li pipitu dagat.' ³³ Lantarane injo'a, lia'e neingkase nejai too li'omoma'e, ma napaila'a nyaame nodua'omae. Sekarange, li'ite jojoo liine, li tolonu Allah, untuke meilongoa'e bagiana'onye sanu pinarintaa'ome kangkai'oe la'e Siopu." Petrus Nobambala'e Injil li Labongi Kornelius ³⁴ Injopai, Petrus nombo'aa'e nganganye ma negombo'e, "Sekarangeine, lia'e tu-tutuu u'otoi onjo Allah labai mopoitaa'e pomihake. ³⁵ Tapi, li tunggalu bangsa, too sanu mohule kangkai Liio ma mogutu sanu tutuu, no'eseilua'o-Nye. ³⁶ Gombo'e sanu pino'odua'u Allah antage bangsa nu Israel momeilua'e bambale paila'e damai sejahta la'emaei Kristus Yesus, Liiome Siopu antage jojooma'e. ³⁷ Ambo-ambo'ome mo'ootoi kejadiane sanu nebalime li jojooma'e Yudea, nompamula la'e Galilea, nopuse binaptis sanu bineea'i Yohanes, ³⁸ notoimimai Yesus, Too nu Nazaret, sanu inurapangome nu Allah kangkai Roh Kudus ma kangkai kuasa. Io na'o nekulilinge nogutu sanu paila'e ma no po'odoonge jojoo too sanu pinensio'u roh majaa'e lantarane Allah tutuute Liio. ³⁹ Li'ameine sabi-sabi la'e jojoo so'ale sanu pinogutumeni Yesus, oli daera too nu Yahudi aiyo'e teule li Yerusalem. Jimo nomatemei Yesus kangkai nentoena'e-Io li babo'u ayu salip. ⁴⁰ Boi, Allah nobangkita'e Liio watu o'tolueleoanaonye ma nombeea'e Liio nopo'ita'e ambo-ambo'o-Nye, ⁴¹ labai untage jojoo too, tapi antage li'ame, saksi-saksi sanu pinileangome nu Allah la'e luulu, sanu uninange ma nonginung kangkai-Io nopuse Io nabangkite la'e ta-tanganu too nate. ⁴² Injopa, Io nomarintaa'e li'ame untuke momeilua'e kangkai too-too ma monyabia'e tu-tutuu pa Liiome sanu tinantua'ome nu Allah mebali Hakim antage sanu tutuhu ma sanu mate. ⁴³ Antage Liio, jojoo nabii monyebiaa'e onjo tunggalu too sanu momaracaya lilalongo-Nye monarima pongampune dosa la'emae tope-Nye." Allah Nopoitaa'e Onjo Io Monarima Jojoo Too ⁴⁴ Petrus ulenge pepeese momeilua'e gombo-gombo'e injoo'e, Roh Kudus nenyau antage jojoo sanu no'olongo Gombo'u Siopu injoo'e ⁴⁵ Injopa, too-too momaracaya sanu sinuna, sanu nodua'e kangkai Petrus, neherang lantarane karunianu Roh Kudus jinuana'omaime, kangkai bangsa-bangsa taninye. ⁴⁶ Saba'onye, jimo no'olongo too-too injoo'e megombo'e bahasa ma momuliakane Allah. injopai Petrus negombo'e, ⁴⁷ Palabai adaanga sabii sotoo sanu mebali mongambote ogo sanu nopombaptisa'e kangkai too sanu monarima Roh Kudus selilio aime li'ite injeine?" ⁴⁸ Injomai, Petrus nomarintaa'e jimo untuke no baptis lilalongu tope nu Kristus Yesus. Injopa too-too injoo'e nomongi balai Petrus momoiya kangkai jomo baisogau eleo e'endenye.